५. इसिमुग्गदायकत्थेरअपदानं

२४. ‘‘उदेन्तं सतरंसिंव, पीतरंसिंव [सितरंसिंव (सी.)] भाणुमं;

ककुधं विलसन्तंव, पदुमुत्तरनायकं.

२५. ‘‘इसिमुग्गानि पिसित्वा [इसिसुग्गानि पिंसेत्वा (सी.), इसिमुग्गं निमन्तेत्वा (स्या.)], मधुखुद्दे अनीळके;

पासादेव ठितो सन्तो, अदासिं लोकबन्धुनो.

२६. ‘‘अट्ठसतसहस्सानि, अहेसुं बुद्धसावका;

सब्बेसं पत्तपूरेन्तं [पत्तपूरं तं (सी.)], ततो चापि बहुत्तरं.

२७. ‘‘तेन चित्तप्पसादेन, सुक्कमूलेन चोदितो;

कप्पानं सतसहस्सं, दुग्गतिं नुपपज्जहं.

२८. ‘‘चत्तालीसम्हि सहस्से, कप्पानं अट्ठतिंस ते;

इसिमुग्गसनामा [महिसमन्तनामा (स्या.)] ते, चक्कवत्ती महब्बला.

२९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा इसिमुग्गदायको थेरो इमा गाथायो अभासित्थाति.

इसिमुग्गदायकत्थेरस्सापदानं पञ्चमं.