४. देसपूजकत्थेरअपदानं

१८. ‘‘अत्थदस्सी तु भगवा, लोकजेट्ठो नरासभो;

अब्भुग्गन्त्वान वेहासं, गच्छते अनिलञ्जसे.

१९. ‘‘यम्हि देसे ठितो सत्था, अब्भुग्गच्छि महामुनि;

ताहं देसं अपूजेसिं, पसन्नो सेहि पाणिभि.

२०. ‘‘अट्ठारसे कप्पसते, अद्दसं यं महामुनिं;

दुग्गतिं नाभिजानामि, देसपूजायिदं फलं.

२१. ‘‘एकादसे कप्पसते, गोसुजातसनामको;

सत्तरतनसम्पन्नो, चक्कवत्ती महब्बलो.

२२. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा देसपूजको थेरो इमा गाथायो अभासित्थाति.

देसपूजकत्थेरस्सापदानं चतुत्थं.