६. कदम्बपुप्फियत्थेरअपदानं

३०. ‘‘हिमवन्तस्साविदूरे, कुक्कुटो नाम पब्बतो;

तम्हि पब्बतपादम्हि, सत्त बुद्धा वसन्ति ते.

३१. ‘‘कदम्बं पुप्फितं दिस्वा, दीपराजंव उग्गतं;

उभो हत्थेहि पग्गय्ह, सत्त बुद्धे समोकिरिं.

३२. ‘‘चतुन्नवुतितो कप्पे, यं पुप्फमभिरोपयिं;

दुग्गतिं नाभिजानामि, बुद्धपूजायिदं फलं.

३३. ‘‘द्वेनवुते इतो कप्पे, सत्तासुं पुप्फनामका;

सत्तरतनसम्पन्ना, चक्कवत्ती महब्बला.

३४. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा कदम्बपुप्फियो थेरो इमा गाथायो अभासित्थाति;

कदम्बपुप्फियत्थेरस्सापदानं छट्ठं.