८. फलकदायकत्थेरअपदानं

३७. ‘‘यानकारो पुरे आसिं, दारुकम्मे सुसिक्खितो;

चन्दनं फलकं कत्वा, अदासिं लोकबन्धुनो.

३८. ‘‘पभासति इदं ब्यम्हं, सुवण्णस्स सुनिम्मितं;

हत्थियानं अस्सयानं, दिब्बयानं उपट्ठितं.

३९. ‘‘पासादा सिविका चेव, निब्बत्तन्ति यदिच्छकं;

अक्खुब्भं [अक्खोभं (सी.)] रतनं मय्हं, फलकस्स इदं फलं.

४०. ‘‘एकनवुतितो कप्पे, फलकं यमहं ददिं;

दुग्गतिं नाभिजानामि, फलकस्स इदं फलं.

४१. ‘‘सत्तपञ्ञासकप्पम्हि, चतुरो निम्मिताव्हया;

सत्तरतनसम्पन्ना, चक्कवत्ती महब्बला.

४२. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा फलकदायको थेरो इमा गाथायो अभासित्थाति.

फलकदायकत्थेरस्सापदानं अट्ठमं.