१. अपारसुत्तवण्णना

८१३. इद्धिपादसंयुत्तस्स पठमे छन्दं निस्साय पवत्तो समाधि छन्दसमाधि. पधानभूता सङ्खारा पधानसङ्खारा. समन्नागतन्ति तेहि धम्मेहि उपेतं. इद्धिया पादं, इद्धिभूतं वा पादन्ति इद्धिपादं. सेसेसुपि एसेव नयो. अयमेत्थ सङ्खेपो, वित्थारो पन इद्धिपादविभङ्गे (विभ. ४३१ आदयो) आगतोव. विसुद्धिमग्गे (विसुद्धि. २.३.६९ आदयो) पनस्स अत्थो दीपितो. तथा मग्गबोज्झङ्गसतिपट्ठानसंयुत्तेसु चेव इध च एकपरिच्छेदोव.