७. आनापानवग्गो

१. अट्ठिकमहप्फलसुत्तादिवण्णना

२३८. सत्तमादीसु अट्ठिकसञ्ञाति अट्ठिकं अट्ठिकन्ति भावेन्तस्स उप्पन्नसञ्ञा. तं पनेतं भावयतो याव निमित्तं न उप्पज्जति, ताव छविपि चम्मम्पि उपट्ठाति. निमित्ते पन उप्पन्ने छविचम्मानि नेव उपट्ठहन्ति, सङ्खवण्णो सुद्धअट्ठिकसङ्घाटोव उपट्ठाति हत्थिक्खन्धगतं धम्मिकतिस्सराजानं ओलोकेन्तस्स सामणेरस्स विय, पटिमग्गे हसमानं इत्थिं ओलोकेन्तस्स चेतियपब्बतवासिनो तिस्सत्थेरस्स विय चाति. वत्थूनि विसुद्धिमग्गे (विसुद्धि. १.१५) वित्थारितानि. सति वा उपादिसेसेति गहणसेसे उपादानसेसे विज्जमानम्हि.

२-१०. पुळवकसुत्तादिवण्णना

२३९-२४७. पुळवकसञ्ञाति पुळवं पुळवन्ति भावेन्तस्स उप्पन्नसञ्ञा. विनीलकसञ्ञादीसुपि एसेव नयो. विनिच्छयकथा पनेत्थ सद्धिं भावनानयेन विसुद्धिमग्गे (विसुद्धि. १.१०२) वुत्ता. मेत्तादयो तिकचतुक्कज्झानवसेन वेदितब्बा, उपेक्खा चतुत्थज्झानवसेनेव.