३. अग्गिसुत्तवण्णना

२३४. ततिये सतिञ्च ख्वाहं, भिक्खवे, सब्बत्थिकं वदामीति लोणधूपनं विय सब्बकम्मिकामच्चं विय च सब्बत्थ इच्छितब्बं वदामीति अत्थो. यथा हि लोणधूपनं सब्बब्यञ्जनेसुपि निविसति, यथा च सब्बकम्मिको अमच्चो योधकम्मम्पि करोति मन्तकम्मम्पि पटिहारकम्मम्पीति सब्बकिच्चानि साधेति, एवं उद्धतस्स चित्तस्स निग्गण्हनं, लीनस्स पग्गण्हनन्ति सब्बमेतं सतिया इज्झति, न सक्का विना सतिया एतं सम्पादेतुं, तस्मा एवमाह. इमस्मिं सुत्ते पुब्बभागविपस्सना बोज्झङ्गाव कथिता.