४. गिलानसुत्तवण्णना

१०५०. चतुत्थे न खो पनेतन्ति न खो अम्हेहि एतं. सप्पञ्ञो उपासकोति सोतापन्नो अधिप्पेतो. अस्सासनीयेहि धम्मेहीति अस्सासकरेहि धम्मेहि. अस्सासतायस्माति अस्सासतु आयस्मा. मारिसोति मरणपटिबद्धो. मरणधम्मोति मरणसभावो. अधिमोचेहीति ठपेहि. अधिमोचितन्ति ठपितं. एवं विमुत्तचित्तस्साति एवं अरहत्तफलविमुत्तिया विमुत्तचित्तस्स. यदिदं विमुत्तिया विमुत्तन्ति यं इदं विमुत्तिं आरब्भ विमुत्तिया नानाकरणं वत्तब्बं सिया, न तं वदामि. भिक्खुसङ्घस्स हि चेतियङ्गणबोधियङ्गणवत्तेसु चेव असीतिक्खन्धकवत्तेसु चाति आगमनीयगुणेसु पमाणं नाम नत्थि, पटिविद्धे पन मग्गे वा फले वा उपासकानञ्च भिक्खूनञ्च नानाकरणं नत्थि.