५. अञ्ञतित्थियपेय्यालवग्गवण्णना

४१-४८. अञ्ञतित्थियपेय्याले अद्धानपरिञ्ञत्थन्ति संसारद्धानं निब्बानं पत्वा परिञ्ञातं नाम होति. तस्मा निब्बानं ‘‘अद्धानपरिञ्ञा’’ति वुच्चति, तदत्थन्ति अत्थो. अनुपादापरिनिब्बानत्थन्ति अपच्चयपरिनिब्बानत्थं. इति इमस्मिं पेय्याले विज्जाविमुत्तिफलेन अरहत्तं कथितं. ञाणदस्सनेन पच्चवेक्खणा, सेसेहि निब्बानन्ति.

अञ्ञतित्थियपेय्यालवग्गो.