२. दुतियविहारसुत्तवण्णना

१२. दुतिये पटिसल्लानकारणं वुत्तनयेनेव वेदितब्बं. मिच्छादिट्ठिवूपसमपच्चयाति मिच्छादिट्ठिवूपसमो नाम सम्मादिट्ठि. तस्मा यं सम्मादिट्ठिपच्चया वेदयितं वुत्तं, तदेव मिच्छादिट्ठिवूपसमपच्चया वेदितब्बं. इमस्मिं पन सुत्ते विपाकवेदनं अतिदूरेति मञ्ञमाना न गण्हन्तीति वुत्तं. इमिना नयेन सब्बत्थ अत्थो वेदितब्बो. यस्स यस्स हि वूपसमपच्चयाति वुच्चति, तस्स तस्स पटिपक्खधम्मपच्चयाव तं तं वेदयितं अधिप्पेतं. छन्दवूपसमपच्चयातिआदीसु पन छन्दवूपसमपच्चया ताव पठमज्झानवेदना वेदितब्बा. वितक्कवूपसमपच्चया दुतियज्झानवेदना. सञ्ञापच्चया छसमापत्तिवेदना. सञ्ञावूपसमपच्चया नेवसञ्ञानासञ्ञायतनवेदना. छन्दो च वूपसन्तोतिआदीनि वुत्तत्थानेव.