१०. एसनावग्गो

१. एसनासुत्तवण्णना

१६१. एसनावग्गे कामेसनाति कामानं एसना गवेसना मग्गना पत्थना. भवेसनाति भवानं एसना. ब्रह्मचरियेसनाति मिच्छादिट्ठिसङ्खातस्स ब्रह्मचरियस्स एसना.

२-११. विधासुत्तादिवण्णना

१६२-१७१. विधाति मानकोट्ठासा मानठपना वा. सेय्योहमस्मीति विधाति अहमस्मि सेय्योति एवं मानकोट्ठासो मानठपना वा. नीघाति दुक्खा. वचनत्थो पनेत्थ यस्स उप्पज्जन्ति, तं पुरिसं नीहनन्तीति नीघा. सेसमेत्थ उत्तानमेवाति.

एसनावग्गो दसमो.