९. सूकसुत्तवण्णना

९. नवमे मिच्छापणिहितन्ति सूकं नाम उद्धग्गं कत्वा ठपितं हत्थं वा पादं वा भिन्दति, तथा अट्ठपितं पन मिच्छापणिहितं नाम. मिच्छापणिहिताय दिट्ठियाति मिच्छाठपिताय कम्मस्सकतपञ्ञाय. अविज्जं भिन्दिस्सतीति चतुसच्चपटिच्छादकं अविज्जं भिन्दिस्सति. विज्जं उप्पादेस्सतीति अरहत्तमग्गविज्जं उप्पादेस्सति. मिच्छापणिहितत्ता, भिक्खवे, दिट्ठियाति कम्मस्सकतपञ्ञाय चेव मग्गभावनाय च मिच्छा ठपितत्ता, अप्पवत्तितत्ताति अत्थो. इमस्मिं सुत्ते कम्मस्सकतञाणं मग्गनिस्सितं कत्वा मिस्सकमग्गो कथितो.