९. अचेलकस्सपसुत्तवण्णना

३५१. नवमे कीवचिरं पब्बजितस्साति कीवचिरो कालो पब्बजितस्साति अत्थो. उत्तरि मनुस्सधम्माति मनुस्सधम्मो नाम दसकुसलकम्मपथा, ततो मनुस्सधम्मतो उत्तरि. अलमरियञाणदस्सनविसेसोति अरियभावं कातुं समत्थताय अलमरियोति सङ्खातो ञाणदस्सनविसेसो. नग्गेय्याति नग्गभावतो. मुण्डेय्याति मुण्डभावतो. पवाळनिप्फोटनायाति पावळनिप्फोटनतो, भूमियं निसीदन्तस्स आनिसदट्ठाने लग्गानं पंसुरजवालिकानं फोटनत्थं गहितमोरपिञ्छमत्ततोति अत्थो.