१-२. मातुगामसुत्तादिवण्णना

२८०-२८१. मातुगामसंयुत्तस्स पठमे अङ्गेहीति अगुणङ्गेहि. न च रूपवाति न रूपसम्पन्नो विरूपो दुद्दसिको. न च भोगवाति न भोगसम्पन्नो निद्धनो. न च सीलवाति न सीलसम्पन्नो दुस्सीलो. अलसो चाति कन्तनपचनादीनि कम्मानि कातुं न सक्कोति, कुसीतो आलसियो निसिन्नट्ठाने निसिन्नोव, ठितठाने ठितोव निद्दायति एव. पजञ्चस्स न लभतीति अस्स पुरिसस्स कुलवंसपतिट्ठापकं पुत्तं न लभति, वञ्झित्थी नाम होति. सुक्कपक्खो वुत्तविपरियायेन वेदितब्बो. दुतियं पठमे वुत्तनयेनेव परिवत्तेतब्बं.