९. कुतूहलसालासुत्तवण्णना

४१८. नवमे कुतूहलसालायन्ति कुतूहलसाला नाम पच्चेकसाला नत्थि, यत्थ पन नानातित्थिया समणब्राह्मणा नानाविधं कथं पवत्तेन्ति, सा बहूनं ‘‘अयं किं वदति, अयं किं वदती’’ति कुतूहलुप्पवत्तिट्ठानतो कुतूहलसालाति वुच्चति. दूरम्पि गच्छतीति याव आभस्सरब्रह्मलोका गच्छति. इमञ्च कायं निक्खिपतीति चुतिचित्तेन निक्खिपति. अनुपपन्नो होतीति चुतिक्खणेयेव पटिसन्धिचित्तस्स अनुप्पन्नत्ता अनुपपन्नो होति.