४. नवसुत्तवण्णना

२३८. चतुत्थे अप्पोस्सुक्कोति निरुस्सुक्को. सङ्कसायतीति विहरति. वेय्यावच्चन्ति चीवरे कत्तब्बकिच्चं. आभिचेतसिकानन्ति अभिचित्तं उत्तमचित्तं निस्सितानं. निकामलाभीति इच्छितिच्छितक्खणे समापज्जनसमत्थताय निकामलाभी. अकिच्छलाभीति झानपारिपन्थिके सुखेन विक्खम्भेत्वा समापज्जनसमत्थताय अदुक्खलाभी. अकसिरलाभीति यथापरिच्छेदेन वुट्ठानसमत्थताय विपुललाभी, पगुणज्झानोति अत्थो. सिथिलमारब्भाति सिथिलवीरियं पवत्तेत्वा. चतुत्थं.