१०. थेरनामकसुत्तवण्णना

२४४. दसमे वण्णवादीति आनिसंसवादी. यं अतीतं तं पहीनन्ति अतीते खन्धपञ्चके छन्दरागप्पहानेन तं पहीनं नाम होति. अनागतन्ति अनागतम्पि खन्धपञ्चकं तत्थ छन्दरागपटिनिस्सग्गेन पटिनिस्सट्ठं नाम होति. सब्बाभिभुन्ति सब्बा खन्धायतनधातुयो च तयो भवे च अभिभवित्वा ठितं. सब्बविदुन्ति तं वुत्तप्पकारं सब्बं विदितं पाकटं कत्वा ठितं. सब्बेसु धम्मेसूति तेस्वेव धम्मेसु तण्हादिट्ठिलेपेहि अनुपलित्तं. सब्बञ्जहन्ति तदेव सब्बं तत्थ छन्दरागप्पहानेन जहित्वा ठितं. तण्हक्खये विमुत्तन्ति तण्हक्खयसङ्खाते निब्बाने तदारम्मणाय विमुत्तिया विमुत्तं. दसमं.