६. चालासुत्तवण्णना

१६७. छट्ठे को नु तं इदमादपयीति को नु मन्दबुद्धि बालो तं एवं गाहापेसि? परिक्लेसन्ति अञ्ञम्पि नानप्पकारं उपद्दवं. इदानि यं मारो आह – ‘‘को नु तं इदमादपयी’’ति, तं मद्दन्ती – ‘‘न मं अन्धबालो आदपेसि, लोके पन अग्गपुग्गलो सत्था धम्मं देसेसी’’ति दस्सेतुं, बुद्धोतिआदिमाह. तत्थ सच्चे निवेसयीति परमत्थसच्चे निब्बाने निवेसेसि. निरोधं अप्पजानन्ताति निरोधसच्चं अजानन्ता. छट्ठं.