४. मणिभद्दसुत्तवण्णना

२३८. चतुत्थे सुखमेधतीति, सुखं पटिलभति. सुवे सेय्योति सुवे सुवे सेय्यो, निच्चमेव सेय्योति अत्थो. वेरा न परिमुच्चतीति अहं सतिमाति एत्तकेन वेरतो न मुच्चति. यस्साति यस्स अरहतो. अहिंसायाति करुणाय चेव करुणापुब्बभागे च. मेत्तंसोति सो मेत्तञ्चेव मेत्तापुब्बभागञ्च भावेति. अथ वा अंसोति कोट्ठासो वुच्चति. मेत्ता अंसो एतस्साति मेत्तंसो. इदं वुत्तं होति – यस्स अरहतो सब्बकालं अहिंसाय रतो मनो, यस्स च सब्बभूतेसु मेत्ताकोट्ठासो अत्थि, तस्स केनचि पुग्गलेन सद्धिं वेरं नाम नत्थि यक्खाति. चतुत्थं.