८. लोमसकङ्गियत्थेरअपदानवण्णना

अट्ठमापदाने इमम्हि भद्दके कप्पेतिआदिकं आयस्मतो लोमसकङ्गियत्थेरस्स अपदानं. अयम्पि पुरिमबुद्धेसु कताधिकारो तत्थ तत्थ भवे विवट्टूपनिस्सयानि पुञ्ञानि उपचिनन्तो कस्सपस्स भगवतो काले ब्राह्मणकुले निब्बत्तो सद्धो पसन्नो अहोसि. अपरो चन्दनो नाम तस्स सहायो चासि. ते द्वेपि सत्थु सन्तिके धम्मं सुत्वा पसन्नमानसा पब्बजित्वा यावजीवं सीलं रक्खित्वा सुपरिसुद्धसीला ततो चुता देवलोके निब्बत्तित्वा एकं बुद्धन्तरं दिब्बसुखं अनुभविंसु. तेसु अयं इमस्मिं बुद्धुप्पादे साकियकुले निब्बत्तित्वा अपरो चन्दनो देवपुत्तो हुत्वा तावतिंसभवने निब्बत्ति. अथ सो सक्यकुलप्पसादकेन काळुदायिना आराधितेन भगवता सक्यराजूनं मानमद्दनाय कतं वेस्सन्तरधम्मदेसनायं (जा. २.२२.१६५५ आदयो) पोक्खरवस्सइद्धिपाटिहारियं दिस्वा पसन्नमानसो पब्बजित्वा मज्झिमनिकाये वुत्तं भद्देकरत्तसुत्तन्तदेसनं सुत्वा अरञ्ञवासं वसन्तो भद्देकरत्तसुत्तन्तदेसनानुसासनं (म. नि. ३.२८६ आदयो) सरित्वा तदनुसारेन ञाणं पेसेत्वा कम्मट्ठानं मनसि करित्वा अरहत्तं पापुणि.

२२५. अरहत्तं पत्वा अत्तनो पुब्बकम्मं सरित्वा सञ्जातसोमनस्सो पुब्बचरितापदानं पकासेन्तो इमम्हि भद्दके कप्पेतिआदिमाह. तत्थ कप्पो ताव चतुब्बिधो – सारकप्पो, वरकप्पो, मण्डकप्पो, भद्दकप्पोति. तेसु यस्मिं कप्पे एको बुद्धो उप्पज्जति, अयं सारकप्पो नाम. यस्मिं द्वे वा तयो वा बुद्धा उप्पज्जन्ति, अयं वरकप्पो नाम. यस्मिं चत्तारो बुद्धा उप्पज्जन्ति, अयं मण्डकप्पो नाम. यस्मिं पञ्च बुद्धा उप्पज्जन्ति, अयं भद्दकप्पो नाम. अञ्ञत्थ पन –

‘‘सारकप्पो मण्डकप्पो, सारमण्डकप्पो तथा;

वरकप्पो भद्दकप्पो, कप्पा पञ्चविधा सियुं.

‘‘एको द्वे तयो चत्तारो, पञ्च बुद्धा यथाक्कमं;

एतेसु पञ्चकप्पेसु, उप्पज्जन्ति विनायका’’ति. –

एवं पञ्च कप्पा वुत्ता. तेसु अयं कप्पो ‘‘ककुसन्धो कोणागमनो कस्सपो गोतमो मेत्तेय्यो’’ति पञ्चबुद्धपटिमण्डितत्ता भद्दकप्पो नाम जातो.

तस्मा इमस्मिं भद्दकप्पम्हि कस्सपो नायको उप्पज्जीति सम्बन्धो. सेसं उत्तानत्थमेवाति.

लोमसकङ्गियत्थेरअपदानवण्णना समत्ता.