३. पञ्हापुच्छकवण्णना

१८५. पञ्हापुच्छके अट्ठारसन्नं धातूनं हेट्ठा वुत्तनयानुसारेनेव कुसलादिभावो वेदितब्बो. आरम्मणत्तिकेसु पन छ धातुयो परित्तारम्मणाति इदं पन पञ्चन्नं चक्खुविञ्ञाणादीनं मनोधातुया च एकन्तेन पञ्चसु रूपारम्मणादीसु पवत्तिं सन्धाय वुत्तं. द्वे धातुयोति वुत्तानं पन धम्मधातुमनोविञ्ञाणधातूनं मनायतनधम्मायतनेसु वुत्तनयेनेव परित्तारम्मणादिता वेदितब्बा. इति इमस्मिम्पि पञ्हापुच्छके सोळस धातुयो कामावचरा, द्वे चतुभूमिका लोकियलोकुत्तरमिस्सका कथिता. एवमयं धातुविभङ्गोपि तेपरिवट्टं नीहरित्वाव भाजेत्वा देसितोति.

सम्मोहविनोदनिया विभङ्गट्ठकथाय

धातुविभङ्गवण्णना निट्ठिता.