१०. दसमनयो विप्पयुत्तेनविप्पयुत्तपदवण्णना

३५३. इदानि विप्पयुत्तेनविप्पयुत्तपदं भाजेतुं रूपक्खन्धेनातिआदि आरद्धं. तत्थ ये सम्पयोगविप्पयोगपदनिद्देसे रूपक्खन्धादयो धम्मा उद्धटा, सब्बपुच्छासु तेयेव उद्धटा. सदिसविस्सज्जनानं पन एकतो गहितत्ता पदानि अञ्ञाय पटिपाटिया आगतानि. तत्थ यं पदं पुच्छाय उद्धटं, तं येहि धम्मेहि विप्पयुत्तं, तेसं वसेन खन्धादिविभागो वेदितब्बो. रूपक्खन्धेन हि वेदनादयो विप्पयुत्ता, तेहि च रूपक्खन्धो विप्पयुत्तो. निब्बानं पन सुखुमरूपगतिकमेव. सो रूपक्खन्धो चतूहि खन्धेहि, एकेन मनायतनेन सत्तहि विञ्ञाणधातूहि, धम्मायतनधम्मधातूसु, केहिचि वेदनादीहि धम्मेहेव विप्पयुत्तो. एसेव नयो सब्बत्थाति.

विप्पयुत्तेनविप्पयुत्तपदवण्णना.