८. सप्पुरिससुत्तवण्णना

३८. अट्ठमे अत्थायाति अत्थत्थाय. हिताय सुखायाति हितत्थाय सुखत्थाय. पुब्बपेतानन्ति परलोकगतानं ञातीनं. इमस्मिं सुत्ते अनुप्पन्ने बुद्धे चक्कवत्तिराजानो बोधिसत्ता पच्चेकबुद्धा लब्भन्ति, बुद्धकाले बुद्धा चेव बुद्धसावका च. यथावुत्तानञ्हि एतेसं अत्थाय हिताय सुखाय संवत्तन्ति. बहुन्नं वत अत्थाय, सप्पञ्ञो घरमावसन्ति सप्पञ्ञो घरे वसन्तो बहूनं वत अत्थाय होति. पुब्बेति पठमेव. पुब्बेकतमनुस्सरन्ति मातापितूनं पुब्बकारगुणे अनुस्सरन्तो. सहधम्मेनाति सकारणेन पच्चयपूजनेन पूजेति. अपचे ब्रह्मचारयोति ब्रह्मचारिनो अपचयति, नीचवुत्तितं नेसं आपज्जति. पेसलोति पियसीलो.