१०. उपोसथसुत्तवण्णना

२०. दसमे निसिन्नो होतीति उपोसथकरणत्थाय उपासिकाय रतनपासादे निसिन्नो. निसज्ज पन भिक्खूनं चित्तानि ओलोकेन्तो एकं दुस्सीलपुग्गलं दिस्वा ‘‘सचाहं इमस्मिं पुग्गले निसिन्नेयेव पातिमोक्खं उद्दिसिस्सामि, सत्तधा तस्स मुद्धा फलिस्सती’’ति तस्स अनुकम्पाय तुण्हीयेव अहोसि. अभिक्कन्ताति अतिक्कन्ता परिक्खीणा. उद्धस्ते अरुणेति उग्गते अरुणसीसे. नन्दिमुखियाति तुट्ठमुखिया. अपरिसुद्धा, आनन्द, परिसाति ‘‘असुकपुग्गलो अपरिसुद्धो’’ति अवत्वा ‘‘अपरिसुद्धा, आनन्द, परिसा’’ति आह. सेसं सब्बत्थ उत्तानमेवाति.

महावग्गो दुतियो.