२. पञ्ञासुत्तवण्णना

२. दुतिये आदिब्रह्मचरियिकायाति मग्गब्रह्मचरियस्स आदिभूताय. पञ्ञायाति विपस्सनाय. गरुट्ठानियन्ति गारवुप्पत्तिपच्चयभूतं गरुभावनीयं. तिब्बन्ति बहलं. परिपुच्छतीति अत्थपाळिअनुसन्धिपुब्बापरं पुच्छति. परिपञ्हतीति पञ्हं करोति, इदञ्चिदञ्च पटिपुच्छिस्सामीति वितक्केति. द्वयेनाति दुविधेन. अनानाकथिकोति अनानत्तकथिको होति. अतिरच्छानकथिकोति नानाविधं तिरच्छानकथं न कथेति. अरियं वा तुण्हीभावन्ति अरियतुण्हीभावो नाम चतुत्थज्झानं, सेसकम्मट्ठानमनसिकारोपि वट्टति. जानं जानातीति जानितब्बकं जानाति. पस्सं पस्सतीति पस्सितब्बकं पस्सति. पियत्तायाति पियभावत्थाय. गरुत्तायाति गरुभावत्थाय. भावनायाति भावनत्थाय गुणसम्भावनाय वा. सामञ्ञायाति समणधम्मत्थाय. एकीभावायाति निरन्तरभावत्थाय.