१०. अधिकरणसमथसुत्तवण्णना

८४. दसमे अधिकरणानि समेन्ति वूपसमेन्तीति अधिकरणसमथा. उप्पन्नुप्पन्नानन्ति उप्पन्नानं उप्पन्नानं. अधिकरणानन्ति विवादाधिकरणं अनुवादाधिकरणं आपत्ताधिकरणं किच्चाधिकरणन्ति इमेसं चतुन्नं. समथाय वूपसमायाति समथत्थञ्चेव वूपसमनत्थञ्च. सम्मुखाविनयो दातब्बो…पे… तिणवत्थारकोति इमे सत्त समथा दातब्बा. तेसं विनिच्छयो विनयसंवण्णनतो (चूळव. अट्ठ. १८६-१८७ आदयो) गहेतब्बो. अपिच दीघनिकाये सङ्गीतिसुत्तवण्णनायम्पि (दी. नि. अट्ठ. ३.३३१ अधिकरणसमथसत्तकवण्णना) वित्थारितोयेव, तथा मज्झिमनिकाये सामगामसुत्तवण्णनायाति (म. नि. अट्ठ. ३.४६).

विनयवग्गो अट्ठमो.