३. तिस्सब्रह्मासुत्तवण्णना

५६. ततिये भिक्खुनियोति महापजापतिया परिवारा पञ्चसता भिक्खुनियो. विमुत्ताति पञ्चहि विमुत्तीहि विमुत्ता. अनुपादिसेसाति उपादानसेसं अट्ठपेत्वा पञ्चहि विमुत्तीहि अनवसेसाहिपि विमुत्ता. सउपादिसेसे वा सउपादिसेसोति सउपादानसेसे पुग्गले ‘‘सउपादानसेसो अय’’न्ति. इतरस्मिम्पि एसेव नयो. तिस्सोति थेरस्स सद्धिविहारिकब्रह्मा. अनुलोमिकानीति पटिपत्तिया अनुलोमानि विवित्तानि अन्तिमपरियन्तिमानि. इन्द्रियानीति सद्धादीनि विपस्सनिन्द्रियानि. समन्नानयमानोति समन्नाहारे ठपयमानो. न हि पन तेति इदं कस्मा आरभि? सत्तमस्स पुग्गलस्स दस्सनत्थं. सत्तमो हि सद्धानुसारिपुग्गलो न दस्सितो. अथ भगवा बलवविपस्सकवसेन तं दस्सेन्तो एवमाह. तत्थ सब्बनिमित्तानन्ति सब्बेसं निच्चनिमित्तादीनं. अनिमित्तन्ति बलवविपस्सनासमाधिं.