१-५. पठमपियसुत्तादिवण्णना

१-५. सत्तकनिपातस्स पठमे अनवञ्ञत्तिकामोति अभिञ्ञातभावकामो. ततिये योनिसो विचिने धम्मन्ति उपायेन चतुसच्चधम्मं विचिनाति. पञ्ञायत्थं विपस्सतीति सहविपस्सनाय मग्गपञ्ञाय सच्चधम्मं विपस्सति. पज्जोतस्सेवाति दीपस्सेव. विमोक्खो होति चेतसोति तस्स इमेहि बलेहि समन्नागतस्स खीणासवस्स दीपनिब्बानं विय चरिमकचित्तस्स वत्थारम्मणेहि विमोक्खो होति, गतट्ठानं न पञ्ञायति. चतुत्थे सद्धो होतीतिआदीनि पञ्चकनिपाते वण्णितानेव. पञ्चमे धनानीति अदालिद्दियकरणट्ठेन धनानि.