१. पदसोधनवारो

(क) अनुलोमं

९४. (क) चक्खु चक्खुन्द्रियन्ति?

दिब्बचक्खु पञ्ञाचक्खु चक्खु, न चक्खुन्द्रियं. चक्खुन्द्रियं चक्खु चेव चक्खुन्द्रियञ्च.

(ख) चक्खुन्द्रियं चक्खूति? आमन्ता.

(क) सोतं सोतिन्द्रियन्ति?

दिब्बसोतं तण्हासोतं सोतं, न सोतिन्द्रियं. सोतिन्द्रियं सोतञ्चेव सोतिन्द्रियञ्च.

(ख) सोतिन्द्रियं सोतन्ति? आमन्ता.

(क) घानं घानिन्द्रियन्ति? आमन्ता.

(ख) घानिन्द्रियं घानन्ति? आमन्ता.

(क) जिव्हा जिव्हिन्द्रियन्ति? आमन्ता.

(ख) जिव्हिन्द्रियं जिव्हाति? आमन्ता.

(क) कायो कायिन्द्रियन्ति?

कायिन्द्रियं ठपेत्वा अवसेसो कायो [अवसेसा कायो (सी. स्या. क.)], न कायिन्द्रियं. कायिन्द्रियं कायो चेव कायिन्द्रियञ्च.

(ख) कायिन्द्रियं कायोति? आमन्ता.

(क) मनो मनिन्द्रियन्ति? आमन्ता.

(ख) मनिन्द्रियं मनोति? आमन्ता.

(क) इत्थी इत्थिन्द्रियन्ति? नो.

(ख) इत्थिन्द्रियं इत्थीति? नो.

(क) पुरिसो पुरिसिन्द्रियन्ति? नो.

(ख) पुरिसिन्द्रियं पुरिसोति? नो.

(क) जीवितं जीवितिन्द्रियन्ति? आमन्ता.

(ख) जीवितिन्द्रियं जीवितन्ति? आमन्ता.

(क) सुखं सुखिन्द्रियन्ति? आमन्ता.

(ख) सुखिन्द्रियं सुखन्ति? आमन्ता.

(क) दुक्खं दुक्खिन्द्रियन्ति? आमन्ता.

(ख) दुक्खिन्द्रियं दुक्खन्ति? आमन्ता.

(क) सोमनस्सं सोमनस्सिन्द्रियन्ति? आमन्ता.

(ख) सोमनस्सिन्द्रियं सोमनस्सन्ति? आमन्ता.

(क) दोमनस्सं दोमनस्सिन्द्रियन्ति? आमन्ता.

(ख) दोमनस्सिन्द्रियं दोमनस्सन्ति? आमन्ता.

(क) उपेक्खा उपेक्खिन्द्रियन्ति?

उपेक्खिन्द्रियं ठपेत्वा अवसेसा उपेक्खा, न उपेक्खिन्द्रियं. उपेक्खिन्द्रियं उपेक्खा चेव उपेक्खिन्द्रियञ्च.

(ख) उपेक्खिन्द्रियं उपेक्खाति? आमन्ता.

(क) सद्धा सद्धिन्द्रियन्ति? आमन्ता.

(ख) सद्धिन्द्रियं सद्धाति? आमन्ता.

(क) वीरियं वीरियिन्द्रियन्ति? आमन्ता.

(ख) वीरियिन्द्रियं वीरियन्ति? आमन्ता.

(क) सति सतिन्द्रियन्ति? आमन्ता.

(ख) सतिन्द्रियं सतीति? आमन्ता.

(क) समाधि समाधिन्द्रियन्ति? आमन्ता.

(ख) समाधिन्द्रियं समाधीति? आमन्ता.

(क) पञ्ञा पञ्ञिन्द्रियन्ति? आमन्ता.

(ख) पञ्ञिन्द्रियं पञ्ञाति? आमन्ता.

(क) अनञ्ञातञ्ञस्सामीति अनञ्ञातञ्ञस्सामीतिन्द्रियन्ति? आमन्ता.

(ख) अनञ्ञातञ्ञस्सामीतिन्द्रियं अनञ्ञातञ्ञस्सामीति? आमन्ता.

(क) अञ्ञं अञ्ञिन्द्रियन्ति? आमन्ता.

(ख) अञ्ञिन्द्रियं अञ्ञन्ति? आमन्ता.

(क) अञ्ञातावी अञ्ञाताविन्द्रियन्ति? आमन्ता.

(ख) अञ्ञाताविन्द्रियं अञ्ञातावीति? आमन्ता.

(ख) पच्चनीकं

९५. (क) न चक्खु न चक्खुन्द्रियन्ति? आमन्ता.

(ख) न चक्खुन्द्रियं न चक्खूति?

दिब्बचक्खु पञ्ञाचक्खु न चक्खुन्द्रियं, चक्खु. चक्खुञ्च चक्खुन्द्रियञ्च ठपेत्वा अवसेसा न चेव चक्खु न च चक्खुन्द्रियं.

(क) न सोतं न सोतिन्द्रियन्ति? आमन्ता.

(ख) न सोतिन्द्रियं न सोतन्ति?

दिब्बसोतं तण्हासोतं न सोतिन्द्रियं, सोतं. सोतञ्च सोतिन्द्रियञ्च ठपेत्वा अवसेसा न चेव सोतं न च सोतिन्द्रियं.

(क) न घानं न घानिन्द्रियन्ति? आमन्ता.

(ख) न घानिन्द्रियं न घानन्ति? आमन्ता.

(क) न जिव्हा न जिव्हिन्द्रियन्ति? आमन्ता.

(ख) न जिव्हिन्द्रियं न जिव्हाति? आमन्ता.

(क) न कायो न कायिन्द्रियन्ति? आमन्ता.

(ख) न कायिन्द्रियं न कायोति?

कायिन्द्रियं ठपेत्वा अवसेसो न कायिन्द्रियं, कायो. कायञ्च कायिन्द्रियञ्च ठपेत्वा अवसेसो न चेव कायो न च कायिन्द्रियं.

(क) न मनो न मनिन्द्रियन्ति? आमन्ता.

(ख) न मनिन्द्रियं न मनोति? आमन्ता.

(क) न इत्थी न इत्थिन्द्रियन्ति?

इत्थिन्द्रियं न इत्थी, इत्थिन्द्रियं. इत्थिञ्च इत्थिन्द्रियञ्च ठपेत्वा अवसेसा न चेव इत्थी न च इत्थिन्द्रियं.

(ख) न इत्थिन्द्रियं न इत्थीति?

इत्थी न इत्थिन्द्रियं, इत्थी. इत्थिञ्च इत्थिन्द्रियञ्च ठपेत्वा अवसेसा न चेव इत्थी न च इत्थिन्द्रियं.

(क) न पुरिसो न पुरिसिन्द्रियन्ति?

पुरिसिन्द्रियं न पुरिसो, पुरिसिन्द्रियं. पुरिसञ्च पुरिसिन्द्रियञ्च ठपेत्वा अवसेसा न चेव पुरिसो न च पुरिसिन्द्रियं.

(ख) न पुरिसिन्द्रियं न पुरिसोति?

पुरिसो न पुरिसिन्द्रियं, पुरिसो. पुरिसञ्च पुरिसिन्द्रियञ्च ठपेत्वा अवसेसा न चेव पुरिसो न च पुरिसिन्द्रियं.

(क) न जीवितं न जीवितिन्द्रियन्ति? आमन्ता.

(ख) न जीवितिन्द्रियं न जीवितन्ति? आमन्ता.

(क) न सुखं न सुखिन्द्रियन्ति? आमन्ता.

(ख) न सुखिन्द्रियं न सुखन्ति? आमन्ता.

(क) न दुक्खं न दुक्खिन्द्रियन्ति? आमन्ता.

(ख) न दुक्खिन्द्रियं न दुक्खन्ति? आमन्ता.

(क) न सोमनस्सं न सोमनस्सिन्द्रियन्ति? आमन्ता.

(ख) न सोमनस्सिन्द्रियं न सोमनस्सन्ति? आमन्ता.

(क) न दोमनस्सं न दोमनस्सिन्द्रियन्ति? आमन्ता.

(ख) न दोमनस्सिन्द्रियं न दोमनस्सन्ति? आमन्ता.

(क) न उपेक्खा न उपेक्खिन्द्रियन्ति? आमन्ता.

(ख) न उपेक्खिन्द्रियं न उपेक्खाति?

उपेक्खिन्द्रियं ठपेत्वा अवसेसा न उपेक्खिन्द्रियं, उपेक्खा. उपेक्खञ्च उपेक्खिन्द्रियञ्च ठपेत्वा अवसेसा न चेव उपेक्खा न च उपेक्खिन्द्रियं.

(क) न सद्धा न सद्धिन्द्रियन्ति? आमन्ता.

(ख) न सद्धिन्द्रियं न सद्धाति? आमन्ता.

(क) न वीरियं न वीरियिन्द्रियन्ति? आमन्ता.

(ख) न वीरियिन्द्रियं न वीरियन्ति? आमन्ता.

(क) न सति न सतिन्द्रियन्ति? आमन्ता.

(ख) न सतिन्द्रियं न सतीति? आमन्ता.

(क) न समाधि न समाधिन्द्रियन्ति? आमन्ता.

(ख) न समाधिन्द्रियं न समाधीति? आमन्ता.

(क) न पञ्ञा न पञ्ञिन्द्रियन्ति? आमन्ता.

(ख) न पञ्ञिन्द्रियं न पञ्ञाति? आमन्ता.

(क) न अनञ्ञातञ्ञस्सामीति न अनञ्ञातञ्ञस्सामीतिन्द्रियन्ति? आमन्ता.

(ख) न अनञ्ञातञ्ञस्सामीतिन्द्रियं न अनञ्ञातञ्ञस्सामीति? आमन्ता.

(क) न अञ्ञं न अञ्ञिन्द्रियन्ति? आमन्ता.

(ख) न अञ्ञिन्द्रियं न अञ्ञन्ति? आमन्ता.

(क) न अञ्ञातावी न अञ्ञाताविन्द्रियन्ति? आमन्ता.

(ख) न अञ्ञाताविन्द्रियं न अञ्ञातावीति? आमन्ता.