६. अतीतानागतवारो

(क) अनुलोमं

४७५. (क) यो चक्खुन्द्रियं परिजानित्थ सो दोमनस्सिन्द्रियं पजहिस्सतीति? नो.

(ख) यो वा पन दोमनस्सिन्द्रियं पजहिस्सति सो चक्खुन्द्रियं परिजानित्थाति? नो.

(क) यो चक्खुन्द्रियं परिजानित्थ सो अनञ्ञातञ्ञस्सामीतिन्द्रियं भावेस्सतीति? नो.

(ख) यो वा पन अनञ्ञातञ्ञस्सामीतिन्द्रियं भावेस्सति सो चक्खुन्द्रियं परिजानित्थाति? नो.

(क) यो चक्खुन्द्रियं परिजानित्थ सो अञ्ञिन्द्रियं भावेस्सतीति? नो.

(ख) यो वा पन अञ्ञिन्द्रियं भावेस्सति सो चक्खुन्द्रियं परिजानित्थाति? नो.

(क) यो चक्खुन्द्रियं परिजानित्थ सो अञ्ञाताविन्द्रियं सच्छिकरिस्सतीति? नो.

(ख) यो वा पन अञ्ञाताविन्द्रियं सच्छिकरिस्सति सो चक्खुन्द्रियं परिजानित्थाति? नो. (चक्खुन्द्रियमूलकं)

४७६. (क) यो दोमनस्सिन्द्रियं पजहित्थ सो अनञ्ञातञ्ञस्सामीतिन्द्रियं भावेस्सतीति? नो.

(ख) यो वा पन अनञ्ञातञ्ञस्सामीतिन्द्रियं भावेस्सति सो दोमनस्सिन्द्रियं पजहित्थाति? नो.

(क) यो दोमनस्सिन्द्रियं पजहित्थ सो अञ्ञिन्द्रियं भावेस्सतीति?

द्वे पुग्गला दोमनस्सिन्द्रियं पजहित्थ, नो च अञ्ञिन्द्रियं भावेस्सन्ति. अनागामी दोमनस्सिन्द्रियञ्च पजहित्थ अञ्ञिन्द्रियञ्च भावेस्सति.

(ख) यो वा पन अञ्ञिन्द्रियं भावेस्सति सो दोमनस्सिन्द्रियं पजहित्थाति?

छ पुग्गला अञ्ञिन्द्रियं भावेस्सन्ति, नो च दोमनस्सिन्द्रियं पजहित्थ. अनागामी अञ्ञिन्द्रियञ्च भावेस्सति दोमनस्सिन्द्रियञ्च पजहित्थ.

(क) यो दोमनस्सिन्द्रियं पजहित्थ सो अञ्ञाताविन्द्रियं सच्छिकरिस्सतीति?

अरहा दोमनस्सिन्द्रियं पजहित्थ, नो च अञ्ञाताविन्द्रियं सच्छिकरिस्सति. द्वे पुग्गला दोमनस्सिन्द्रियञ्च पजहित्थ अञ्ञाताविन्द्रियञ्च सच्छिकरिस्सन्ति.

(ख) यो वा पन अञ्ञाताविन्द्रियं सच्छिकरिस्सति सो दोमनस्सिन्द्रियं पजहित्थाति?

छ पुग्गला अञ्ञाताविन्द्रियं सच्छिकरिस्सन्ति, नो च दोमनस्सिन्द्रियं पजहित्थ. द्वे पुग्गला अञ्ञाताविन्द्रियञ्च सच्छिकरिस्सन्ति दोमनस्सिन्द्रियञ्च पजहित्थ. (दोमनस्सिन्द्रियमूलकं)

४७७. (क) यो अनञ्ञातञ्ञस्सामीतिन्द्रियं भावित्थ सो अञ्ञिन्द्रियं भावेस्सतीति?

द्वे पुग्गला अनञ्ञातञ्ञस्सामीतिन्द्रियं भावित्थ, नो च अञ्ञिन्द्रियं भावेस्सन्ति. पञ्च पुग्गला अनञ्ञातञ्ञस्सामीतिन्द्रियञ्च भावित्थ अञ्ञिन्द्रियञ्च भावेस्सन्ति.

(ख) यो वा पन अञ्ञिन्द्रियं भावेस्सति. सो अनञ्ञातञ्ञस्सामीतिन्द्रियं भावित्थाति?

द्वे पुग्गला अञ्ञिन्द्रियं भावेस्सन्ति नो च अनञ्ञातञ्ञस्सामीतिन्द्रियं भावित्थ. तयो पुग्गला अञ्ञिन्द्रियञ्च भावेस्सन्ति अनञ्ञातञ्ञस्सामीतिन्द्रियञ्च भावित्थ.

(क) यो अनञ्ञातञ्ञस्सामीतिन्द्रियं भावित्थ सो अञ्ञाताविन्द्रियं सच्छिकरिस्सतीति?

अरहा अनञ्ञातञ्ञस्सामीतिन्द्रियं भावित्थ, नो च अञ्ञाताविन्द्रियं सच्छिकरिस्सति. छ पुग्गला अनञ्ञातञ्ञस्सामीतिन्द्रियञ्च भावित्थ अञ्ञाताविन्द्रियञ्च सच्छिकरिस्सन्ति.

(ख) यो वा पन अञ्ञाताविन्द्रियं सच्छिकरिस्सति सो अनञ्ञातञ्ञस्सामीतिन्द्रियं भावित्थाति?

द्वे पुग्गला अञ्ञाताविन्द्रियं सच्छिकरिस्सन्ति, नो च अनञ्ञातञ्ञस्सामीतिन्द्रियं भावित्थ. छ पुग्गला अञ्ञाताविन्द्रियञ्च सच्छिकरिस्सन्ति अनञ्ञातञ्ञस्सामीतिन्द्रियञ्च भावित्थ. (अनञ्ञातञ्ञस्सामीतिन्द्रियमूलकं)

४७८. (क) यो अञ्ञिन्द्रियं भावित्थ सो अञ्ञाताविन्द्रियं सच्छिकरिस्सतीति? नो.

(ख) यो वा पन अञ्ञाताविन्द्रियं सच्छिकरिस्सति सो अञ्ञिन्द्रियं भावित्थाति? नो. (अञ्ञिन्द्रियमूलकं)

(ख) पच्चनीकं

४७९. (क) यो चक्खुन्द्रियं न परिजानित्थ सो दोमनस्सिन्द्रियं नप्पजहिस्सतीति?

पञ्च पुग्गला चक्खुन्द्रियं न परिजानित्थ, नो च दोमनस्सिन्द्रियं नप्पजहिस्सन्ति. चत्तारो पुग्गला चक्खुन्द्रियञ्च न परिजानित्थ दोमनस्सिन्द्रियञ्च नप्पजहिस्सन्ति.

(ख) यो वा पन दोमनस्सिन्द्रियं नप्पजहिस्सति सो चक्खुन्द्रियं न परिजानित्थाति?

अरहा दोमनस्सिन्द्रियं नप्पजहिस्सति, नो च चक्खुन्द्रियं न परिजानित्थ. चत्तारो पुग्गला दोमनस्सिन्द्रियञ्च नप्पजहिस्सन्ति चक्खुन्द्रियञ्च न परिजानित्थ.

(क) यो चक्खुन्द्रियं न परिजानित्थ सो अनञ्ञातञ्ञस्सामीतिन्द्रियं न भावेस्सतीति?

ये पुथुज्जना मग्गं पटिलभिस्सन्ति ते चक्खुन्द्रियं न परिजानित्थ, नो च अनञ्ञातञ्ञस्सामीतिन्द्रियं न भावेस्सन्ति. अट्ठ पुग्गला चक्खुन्द्रियञ्च न परिजानित्थ अनञ्ञातञ्ञस्सामीतिन्द्रियञ्च न भावेस्सन्ति.

(ख) यो वा पन अनञ्ञातञ्ञस्सामीतिन्द्रियं न भावेस्सति सो चक्खुन्द्रियं न परिजानित्थाति?

अरहा अनञ्ञातञ्ञस्सामीतिन्द्रियं न भावेस्सति, नो च चक्खुन्द्रियं न परिजानित्थ. अट्ठ पुग्गला अनञ्ञातञ्ञस्सामीतिन्द्रियञ्च न भावेस्सन्ति चक्खुन्द्रियञ्च न परिजानित्थ.

(क) यो चक्खुन्द्रियं न परिजानित्थ सो अञ्ञिन्द्रियं न भावेस्सतीति?

सत्त पुग्गला चक्खुन्द्रियं न परिजानित्थ, नो च अञ्ञिन्द्रियं न भावेस्सन्ति. द्वे पुग्गला चक्खुन्द्रियञ्च न परिजानित्थ अञ्ञिन्द्रियञ्च न भावेस्सन्ति.

(ख) यो वा पन अञ्ञिन्द्रियं न भावेस्सति सो चक्खुन्द्रियं न परिजानित्थाति?

अरहा अञ्ञिन्द्रियं न भावेस्सति, नो च चक्खुन्द्रियं न परिजानित्थ. द्वे पुग्गला अञ्ञिन्द्रियञ्च न भावेस्सन्ति चक्खुन्द्रियञ्च न परिजानित्थ.

(क) यो चक्खुन्द्रियं न परिजानित्थ सो अञ्ञाताविन्द्रियं न सच्छिकरिस्सतीति?

अट्ठ पुग्गला चक्खुन्द्रियं न परिजानित्थ, नो च अञ्ञाताविन्द्रियं न सच्छिकरिस्सन्ति. ये पुथुज्जना मग्गं न पटिलभिस्सन्ति ते चक्खुन्द्रियञ्च न परिजानित्थ अञ्ञाताविन्द्रियञ्च न सच्छिकरिस्सन्ति.

(ख) यो वा पन अञ्ञाताविन्द्रियं न सच्छिकरिस्सति सो चक्खुन्द्रियं न परिजानित्थाति?

अरहा अञ्ञाताविन्द्रियं न सच्छिकरिस्सति, नो च चक्खुन्द्रियं न परिजानित्थ. ये पुथुज्जना मग्गं न पटिलभिस्सन्ति ते अञ्ञाताविन्द्रियञ्च न सच्छिकरिस्सन्ति चक्खुन्द्रियञ्च न परिजानित्थ. (चक्खुन्द्रियमूलकं)

४८०. (क) यो दोमनस्सिन्द्रियं नप्पजहित्थ सो अनञ्ञातञ्ञस्सामीतिन्द्रियं न भावेस्सतीति?

ये पुथुज्जना मग्गं पटिलभिस्सन्ति ते दोमनस्सिन्द्रियं नप्पजहित्थ, नो च अनञ्ञातञ्ञस्सामीतिन्द्रियं न भावेस्सन्ति. छ पुग्गला दोमनस्सिन्द्रियञ्च नप्पजहित्थ अनञ्ञातञ्ञस्सामीतिन्द्रियञ्च न भावेस्सन्ति.

(ख) यो वा पन अनञ्ञातञ्ञस्सामीतिन्द्रियं न भावेस्सति सो दोमनस्सिन्द्रियं नप्पजहित्थाति?

तयो पुग्गला अनञ्ञातञ्ञस्सामीतिन्द्रियं न भावेस्सन्ति, नो च दोमनस्सिन्द्रियं नप्पजहित्थ. छ पुग्गला अनञ्ञातञ्ञस्सामीतिन्द्रियञ्च न भावेस्सन्ति दोमनस्सिन्द्रियञ्च नप्पजहित्थ.

(क) यो दोमनस्सिन्द्रियं नप्पजहित्थ सो अञ्ञिन्द्रियं न भावेस्सतीति?

छ पुग्गला दोमनस्सिन्द्रियं नप्पजहित्थ, नो च अञ्ञिन्द्रियं न भावेस्सन्ति. ये पुथुज्जना मग्गं न पटिलभिस्सन्ति ते दोमनस्सिन्द्रियञ्च नप्पजहित्थ अञ्ञिन्द्रियञ्च न भावेस्सन्ति.

(ख) यो वा पन अञ्ञिन्द्रियं न भावेस्सति सो दोमनस्सिन्द्रियं नप्पजहित्थाति?

द्वे पुग्गला अञ्ञिन्द्रियं न भावेस्सन्ति, नो च दोमनस्सिन्द्रियं नप्पजहित्थ. ये पुथुज्जना मग्गं न पटिलभिस्सन्ति ते अञ्ञिन्द्रियञ्च न भावेस्सन्ति दोमनस्सिन्द्रियञ्च नप्पजहित्थ.

(क) यो दोमनस्सिन्द्रियं नप्पज्जहित्थ सो अञ्ञाताविन्द्रियं न सच्छिकरिस्सतीति?

छ पुग्गला दोमनस्सिन्द्रियं नप्पजहित्थ, नो च अञ्ञाताविन्द्रियं न सच्छिकरिस्सन्ति. ये पुथुज्जना मग्गं न पटिलभिस्सन्ति ते दोमनस्सिन्द्रियञ्च नप्पजहित्थ अञ्ञाताविन्द्रियञ्च न सच्छिकरिस्सन्ति.

(ख) यो वा पन अञ्ञाताविन्द्रियं न सच्छिकरिस्सति सो दोमनस्सिन्द्रियं नप्पजहित्थाति?

अरहा अञ्ञाताविन्द्रियं न सच्छिकरिस्सति, नो च दोमनस्सिन्द्रियं नप्पजहित्थ. ये पुथुज्जना मग्गं न पटिलभिस्सन्ति ते अञ्ञाताविन्द्रियञ्च न सच्छिकरिस्सन्ति दोमनस्सिन्द्रियञ्च नप्पजहित्थ. (दोमनस्सिन्द्रियमूलकं)

४८१. (क) यो अनञ्ञातञ्ञस्सामीतिन्द्रियं न भावित्थ सो अञ्ञिन्द्रियं न भावेस्सतीति?

द्वे पुग्गला अनञ्ञातञ्ञस्सामीतिन्द्रियं न भावित्थ, नो च अञ्ञिन्द्रियं न भावेस्सन्ति. ये पुथुज्जना मग्गं न पटिलभिस्सन्ति ते अनञ्ञातञ्ञस्सामीतिन्द्रियञ्च न भावित्थ अञ्ञिन्द्रियञ्च न भावेस्सन्ति.

(ख) यो वा पन अञ्ञिन्द्रियं न भावेस्सति सो अनञ्ञातञ्ञस्सामीतिन्द्रियं न भावित्थाति?

द्वे पुग्गला अञ्ञिन्द्रियं न भावेस्सन्ति, नो च अनञ्ञातञ्ञस्सामीतिन्द्रियं न भावित्थ. ये पुथुज्जना मग्गं न पटिलभिस्सन्ति ते अञ्ञिन्द्रियञ्च न भावेस्सन्ति अनञ्ञातञ्ञस्सामीतिन्द्रियञ्च न भावित्थ.

(क) यो अनञ्ञातञ्ञस्सामीतिन्द्रियं न भावित्थ सो अञ्ञाताविन्द्रियं न सच्छिकरिस्सतीति?

द्वे पुग्गला अनञ्ञातञ्ञस्सामीतिन्द्रियं न भावित्थ, नो च अञ्ञाताविन्द्रियं न सच्छिकरिस्सन्ति. ये पुथुज्जना मग्गं न पटिलभिस्सन्ति ते अनञ्ञातञ्ञस्सामीतिन्द्रियञ्च न भावित्थ अञ्ञाताविन्द्रियञ्च न सच्छिकरिस्सन्ति.

(ख) यो वा पन अञ्ञाताविन्द्रियं न सच्छिकरिस्सति सो अनञ्ञातञ्ञस्सामीतिन्द्रियं न भावित्थाति?

अरहा अञ्ञाताविन्द्रियं न सच्छिकरिस्सति, नो च अनञ्ञातञ्ञस्सामीतिन्द्रियं न भावित्थ. ये पुथुज्जना मग्गं न पटिलभिस्सन्ति ते अञ्ञाताविन्द्रियञ्च न सच्छिकरिस्सन्ति अनञ्ञातञ्ञस्सामीतिन्द्रियञ्च न भावित्थ. (अनञ्ञातञ्ञस्सामीतिन्द्रियमूलकं)

४८२. (क) यो अञ्ञिन्द्रियं न भावित्थ सो अञ्ञाताविन्द्रियं न सच्छिकरिस्सतीति?

अट्ठ पुग्गला अञ्ञिन्द्रियं न भावित्थ, नो च अञ्ञाताविन्द्रियं न सच्छिकरिस्सन्ति. ये पुथुज्जना मग्गं न पटिलभिस्सन्ति ते अञ्ञिन्द्रियञ्च न भावित्थ अञ्ञाताविन्द्रियञ्च न सच्छिकरिस्सन्ति.

(ख) यो वा पन अञ्ञाताविन्द्रियं न सच्छिकरिस्सति सो अञ्ञिन्द्रियं न भावित्थाति?

अरहा अञ्ञाताविन्द्रियं न सच्छिकरिस्सति, नो च अञ्ञिन्द्रियं न भावित्थ. ये पुथुज्जना मग्गं न पटिलभिस्सन्ति ते अञ्ञाताविन्द्रियञ्च न सच्छिकरिस्सन्ति अञ्ञिन्द्रियञ्च न भावित्थ. (अञ्ञिन्द्रियमूलकं).

परिञ्ञावारो.

इन्द्रिययमकं निट्ठितं.

यमकपकरणं निट्ठितं.