३. सुद्धधम्मवारो

(क) अनुलोमं

२५. (क) कुसला धम्माति? आमन्ता.

(ख) धम्मा कुसला धम्माति?

कुसला धम्मा धम्मा चेव कुसला धम्मा च. अवसेसा धम्मा न कुसला धम्मा.

(क) अकुसला धम्माति? आमन्ता.

(ख) धम्मा अकुसला धम्माति?

अकुसला धम्मा धम्मा चेव अकुसला धम्मा च. अवसेसा धम्मा न अकुसला धम्मा.

(क) अब्याकता धम्माति? आमन्ता.

(ख) धम्मा अब्याकता धम्माति?

अब्याकता धम्मा धम्मा चेव अब्याकता धम्मा च. अवसेसा धम्मा न अब्याकता धम्मा.

(ख) पच्चनीकं

२६. (क) न कुसला न धम्माति?

कुसलं ठपेत्वा अवसेसा धम्मा न कुसला, धम्मा. कुसलञ्च धम्मे च ठपेत्वा अवसेसा न चेव कुसला न च धम्मा.

(ख) न धम्मा न कुसला धम्माति? आमन्ता.

(क) न अकुसला न धम्माति?

अकुसलं ठपेत्वा अवसेसा धम्मा न अकुसला, धम्मा. अकुसलञ्च धम्मे च ठपेत्वा अवसेसा न चेव अकुसला न च धम्मा.

(ख) न धम्मा न अकुसला धम्माति? आमन्ता.

(क) न अब्याकता न धम्माति?

अब्याकतं ठपेत्वा अवसेसा धम्मा न अब्याकता, धम्मा. अब्याकतञ्च धम्मे च ठपेत्वा अवसेसा न चेव अब्याकता न च धम्मा.

(ख) न धम्मा न अब्याकता धम्माति? आमन्ता.