(५) पच्चुप्पन्नानागतवारो

(क) अनुलोमपुग्गलो

२०९. (क) यस्स कुसला धम्मा उप्पज्जन्ति तस्स अकुसला धम्मा निरुज्झिस्सन्तीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे तेसं कुसला धम्मा उप्पज्जन्ति, नो च तेसं अकुसला धम्मा निरुज्झिस्सन्ति. इतरेसं कुसलानं उप्पादक्खणे तेसं कुसला च धम्मा उप्पज्जन्ति अकुसला च धम्मा निरुज्झिस्सन्ति.

(ख) यस्स वा पन अकुसला धम्मा निरुज्झिस्सन्ति तस्स कुसला धम्मा उप्पज्जन्तीति?

सब्बेसं चित्तस्स भङ्गक्खणे कुसलविप्पयुत्तचित्तस्स उप्पादक्खणे निरोधसमापन्नानं असञ्ञसत्तानं तेसं अकुसला धम्मा निरुज्झिस्सन्ति, नो च तेसं कुसला धम्मा उप्पज्जन्ति. कुसलानं उप्पादक्खणे तेसं अकुसला च धम्मा निरुज्झिस्सन्ति कुसला च धम्मा उप्पज्जन्ति.

(क) यस्स कुसला धम्मा उप्पज्जन्ति तस्स अब्याकता धम्मा निरुज्झिस्सन्तीति? आमन्ता.

(ख) यस्स वा पन अब्याकता धम्मा निरुज्झिस्सन्ति तस्स कुसला धम्मा उप्पज्जन्तीति?

सब्बेसं चित्तस्स भङ्गक्खणे कुसलविप्पयुत्तचित्तस्स उप्पादक्खणे निरोधसमापन्नानं असञ्ञसत्तानं तेसं अब्याकता धम्मा निरुज्झिस्सन्ति, नो च तेसं कुसला धम्मा उप्पज्जन्ति. कुसलानं उप्पादक्खणे तेसं अब्याकता च धम्मा निरुज्झिस्सन्ति कुसला च धम्मा उप्पज्जन्ति.

२१०. (क) यस्स अकुसला धम्मा उप्पज्जन्ति तस्स अब्याकता धम्मा निरुज्झिस्सन्तीति? आमन्ता.

(ख) यस्स वा पन अब्याकता धम्मा निरुज्झिस्सन्ति तस्स अकुसला धम्मा उप्पज्जन्तीति?

सब्बेसं चित्तस्स भङ्गक्खणे अकुसलविप्पयुत्तचित्तस्स उप्पादक्खणे निरोधसमापन्नानं असञ्ञसत्तानं तेसं अब्याकता धम्मा निरुज्झिस्सन्ति, नो च तेसं अकुसला धम्मा उप्पज्जन्ति. अकुसलानं उप्पादक्खणे तेसं अब्याकता च धम्मा निरुज्झिस्सन्ति अकुसला च धम्मा उप्पज्जन्ति.

(ख) अनुलोमओकासो

२११. यत्थ कुसला धम्मा उप्पज्जन्ति तत्थ अकुसला धम्मा निरुज्झिस्सन्तीति?…पे….

(ग) अनुलोमपुग्गलोकासा

२१२. (क) यस्स यत्थ कुसला धम्मा उप्पज्जन्ति तस्स तत्थ अकुसला धम्मा निरुज्झिस्सन्तीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे तेसं तत्थ कुसला धम्मा उप्पज्जन्ति, नो च तेसं तत्थ अकुसला धम्मा निरुज्झिस्सन्ति. इतरेसं कुसलानं उप्पादक्खणे तेसं तत्थ कुसला च धम्मा उप्पज्जन्ति अकुसला च धम्मा निरुज्झिस्सन्ति.

(ख) यस्स वा पन यत्थ अकुसला धम्मा निरुज्झिस्सन्ति तस्स तत्थ कुसला धम्मा उप्पज्जन्तीति?

सब्बेसं चित्तस्स भङ्गक्खणे कुसलविप्पयुत्तचित्तस्स उप्पादक्खणे तेसं तत्थ अकुसला धम्मा निरुज्झिस्सन्ति, नो च तेसं तत्थ कुसला धम्मा उप्पज्जन्ति. कुसलानं उप्पादक्खणे तेसं तत्थ अकुसला च धम्मा निरुज्झिस्सन्ति कुसला च धम्मा उप्पज्जन्ति.

(क) यस्स यत्थ कुसला धम्मा उप्पज्जन्ति तस्स तत्थ अब्याकता धम्मा निरुज्झिस्सन्तीति? आमन्ता.

(ख) यस्स वा पन यत्थ अब्याकता धम्मा निरुज्झिस्सन्ति तस्स तत्थ कुसला धम्मा उप्पज्जन्तीति?

सब्बेसं चित्तस्स भङ्गक्खणे कुसलविप्पयुत्तचित्तस्स उप्पादक्खणे असञ्ञसत्तानं तेसं तत्थ अब्याकता धम्मा निरुज्झिस्सन्ति, नो च तेसं तत्थ कुसला धम्मा उप्पज्जन्ति. कुसलानं उप्पादक्खणे तेसं तत्थ अब्याकता च धम्मा निरुज्झिस्सन्ति कुसला च धम्मा उप्पज्जन्ति.

२१३. (क) यस्स यत्थ अकुसला धम्मा उप्पज्जन्ति तस्स तत्थ अब्याकता धम्मा निरुज्झिस्सन्तीति? आमन्ता.

(ख) यस्स वा पन यत्थ अब्याकता धम्मा निरुज्झिस्सन्ति तस्स तत्थ अकुसला धम्मा उप्पज्जन्तीति?

सब्बेसं चित्तस्स भङ्गक्खणे अकुसलविप्पयुत्तचित्तस्स उप्पादक्खणे असञ्ञसत्तानं तेसं तत्थ अब्याकता धम्मा निरुज्झिस्सन्ति, नो च तेसं तत्थ अकुसला धम्मा उप्पज्जन्ति. अकुसलानं उप्पादक्खणे तेसं तत्थ अब्याकता च धम्मा निरुज्झिस्सन्ति अकुसला च धम्मा उप्पज्जन्ति.

(घ) पच्चनीकपुग्गलो

२१४. (क) यस्स कुसला धम्मा न उप्पज्जन्ति तस्स अकुसला धम्मा न निरुज्झिस्सन्तीति?

सब्बेसं चित्तस्स भङ्गक्खणे कुसलविप्पयुत्तचित्तस्स उप्पादक्खणे निरोधसमापन्नानं असञ्ञसत्तानं तेसं कुसला धम्मा न उप्पज्जन्ति, नो च तेसं अकुसला धम्मा न निरुज्झिस्सन्ति. अग्गमग्गस्स भङ्गक्खणे अरहन्तानं यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे तेसं कुसला च धम्मा न उप्पज्जन्ति अकुसला च धम्मा न निरुज्झिस्सन्ति.

(ख) यस्स वा पन अकुसला धम्मा न निरुज्झिस्सन्ति तस्स कुसला धम्मा न उप्पज्जन्तीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे तेसं अकुसला धम्मा न निरुज्झिस्सन्ति, नो च तेसं कुसला धम्मा न उप्पज्जन्ति. अग्गमग्गस्स भङ्गक्खणे अरहन्तानं यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे तेसं अकुसला च धम्मा न निरुज्झिस्सन्ति कुसला च धम्मा न उप्पज्जन्ति.

(क) यस्स कुसला धम्मा न उप्पज्जन्ति तस्स अब्याकता धम्मा न निरुज्झिस्सन्तीति?

सब्बेसं चित्तस्स भङ्गक्खणे कुसलविप्पयुत्तचित्तस्स उप्पादक्खणे निरोधसमापन्नानं असञ्ञसत्तानं तेसं कुसला धम्मा न उप्पज्जन्ति, नो च तेसं अब्याकता धम्मा न निरुज्झिस्सन्ति. पच्छिमचित्तस्स भङ्गक्खणे तेसं कुसला च धम्मा न उप्पज्जन्ति अब्याकता च धम्मा न निरुज्झिस्सन्ति.

(ख) यस्स वा पन अब्याकता धम्मा न निरुज्झिस्सन्ति तस्स कुसला धम्मा न उप्पज्जन्तीति? आमन्ता.

२१५. (क) यस्स अकुसला धम्मा न उप्पज्जन्ति तस्स अब्याकता धम्मा न निरुज्झिस्सन्तीति?

सब्बेसं चित्तस्स भङ्गक्खणे अकुसलविप्पयुत्तचित्तस्स उप्पादक्खणे निरोधसमापन्नानं असञ्ञसत्तानं तेसं अकुसला धम्मा न उप्पज्जन्ति, नो च तेसं अब्याकता धम्मा न निरुज्झिस्सन्ति. पच्छिमचित्तस्स भङ्गक्खणे तेसं अकुसला च धम्मा न उप्पज्जन्ति अब्याकता च धम्मा न निरुज्झिस्सन्ति.

(ख) यस्स वा पन अब्याकता धम्मा न निरुज्झिस्सन्ति तस्स अकुसला धम्मा न उप्पज्जन्तीति? आमन्ता.

(ङ) पच्चनीकओकासो

२१६. यत्थ कुसला धम्मा न उप्पज्जन्ति तत्थ अकुसला धम्मा न निरुज्झिस्सन्तीति?…पे….

(च) पच्चनीकपुग्गलोकासा

२१७. (क) यस्स यत्थ कुसला धम्मा न उप्पज्जन्ति तस्स तत्थ अकुसला धम्मा न निरुज्झिस्सन्तीति?

सब्बेसं चित्तस्स भङ्गक्खणे कुसलविप्पयुत्तचित्तस्स उप्पादक्खणे तेसं तत्थ कुसला धम्मा न उप्पज्जन्ति, नो च तेसं तत्थ अकुसला धम्मा न निरुज्झिस्सन्ति. अग्गमग्गस्स भङ्गक्खणे अरहन्तानं यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे असञ्ञसत्तानं तेसं तत्थ कुसला च धम्मा न उप्पज्जन्ति अकुसला च धम्मा न निरुज्झिस्सन्ति.

(ख) यस्स वा पन यत्थ अकुसला धम्मा न निरुज्झिस्सन्ति तस्स तत्थ कुसला धम्मा न उप्पज्जन्तीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे तेसं तत्थ अकुसला धम्मा न निरुज्झिस्सन्ति, नो च तेसं तत्थ कुसला धम्मा न उप्पज्जन्ति. अग्गमग्गस्स भङ्गक्खणे अरहन्तानं यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे असञ्ञसत्तानं तेसं तत्थ अकुसला च धम्मा न निरुज्झिस्सन्ति कुसला च धम्मा न उप्पज्जन्ति.

(क) यस्स यत्थ कुसला धम्मा न उप्पज्जन्ति तस्स तत्थ अब्याकता धम्मा न निरुज्झिस्सन्तीति?

सब्बेसं चित्तस्स भङ्गक्खणे कुसलविप्पयुत्तचित्तस्स उप्पादक्खणे असञ्ञसत्तानं तेसं तत्थ कुसला धम्मा न उप्पज्जन्ति, नो च तेसं तत्थ अब्याकता धम्मा न निरुज्झिस्सन्ति. पच्छिमचित्तस्स भङ्गक्खणे तेसं तत्थ कुसला च धम्मा न उप्पज्जन्ति अब्याकता च धम्मा न निरुज्झिस्सन्ति.

(ख) यस्स वा पन यत्थ अब्याकता धम्मा न निरुज्झिस्सन्ति तस्स तत्थ कुसला धम्मा न उप्पज्जन्तीति? आमन्ता.

२१८. (क) यस्स यत्थ अकुसला धम्मा न उप्पज्जन्ति तस्स तत्थ अब्याकता धम्मा न निरुज्झिस्सन्तीति?

सब्बेसं चित्तस्स भङ्गक्खणे अकुसलविप्पयुत्तचित्तस्स उप्पादक्खणे असञ्ञसत्तानं तेसं तत्थ अकुसला धम्मा न उप्पज्जन्ति, नो च तेसं तत्थ अब्याकता धम्मा न निरुज्झिस्सन्ति. पच्छिमचित्तस्स भङ्गक्खणे तेसं तत्थ अकुसला च धम्मा न उप्पज्जन्ति अब्याकता च धम्मा न निरुज्झिस्सन्ति.

(ख) यस्स वा पन यत्थ अब्याकता धम्मा न निरुज्झिस्सन्ति तस्स तत्थ अकुसला धम्मा न उप्पज्जन्तीति? आमन्ता.