(१) पच्चुप्पन्नवारो

(क) अनुलोमपुग्गलो

१६३. (क) यस्स कुसला धम्मा उप्पज्जन्ति तस्स अकुसला धम्मा निरुज्झन्तीति? नो.

(ख) यस्स वा पन अकुसला धम्मा निरुज्झन्ति तस्स कुसला धम्मा उप्पज्जन्तीति? नो.

(क) यस्स कुसला धम्मा उप्पज्जन्ति तस्स अब्याकता धम्मा निरुज्झन्तीति? नो.

(ख) यस्स वा पन अब्याकता धम्मा निरुज्झन्ति तस्स कुसला धम्मा उप्पज्जन्तीति? नो.

१६४. (क) यस्स अकुसला धम्मा उप्पज्जन्ति तस्स अब्याकता धम्मा निरुज्झन्तीति? नो.

(ख) यस्स वा पन अब्याकता धम्मा निरुज्झन्ति तस्स अकुसला धम्मा उप्पज्जन्तीति? नो.

(ख) अनुलोमओकासो

१६५. (क) यत्थ कुसला धम्मा उप्पज्जन्ति तत्थ अकुसला धम्मा निरुज्झन्तीति? आमन्ता.

(ख) यत्थ वा पन अकुसला धम्मा निरुज्झन्ति तत्थ कुसला धम्मा उप्पज्जन्तीति? आमन्ता.

(क) यत्थ कुसला धम्मा उप्पज्जन्ति तत्थ अब्याकता धम्मा निरुज्झन्तीति? आमन्ता.

(ख) यत्थ वा पन अब्याकता धम्मा निरुज्झन्ति तत्थ कुसला धम्मा उप्पज्जन्तीति?

असञ्ञसत्ते तत्थ अब्याकता धम्मा निरुज्झन्ति, नो च तत्थ कुसला धम्मा उप्पज्जन्ति. चतुवोकारे पञ्चवोकारे तत्थ अब्याकता च धम्मा निरुज्झन्ति कुसला च धम्मा उप्पज्जन्ति.

१६६. (क) यत्थ अकुसला धम्मा उप्पज्जन्ति तत्थ अब्याकता धम्मा निरुज्झन्तीति? आमन्ता.

(ख) यत्थ वा पन अब्याकता धम्मा निरुज्झन्ति तत्थ अकुसला धम्मा उप्पज्जन्तीति?

असञ्ञसत्ते तत्थ अब्याकता धम्मा निरुज्झन्ति, नो च तत्थ अकुसला धम्मा उप्पज्जन्ति. चतुवोकारे पञ्चवोकारे तत्थ अब्याकता च धम्मा निरुज्झन्ति अकुसला च धम्मा उप्पज्जन्ति.

(ग) अनुलोमपुग्गलोकासा

१६७. (क) यस्स यत्थ कुसला धम्मा उप्पज्जन्ति तस्स तत्थ अकुसला धम्मा निरुज्झन्तीति? नो.

(ख) यस्स वा पन यत्थ अकुसला धम्मा निरुज्झन्ति तस्स तत्थ कुसला धम्मा उप्पज्जन्तीति? नो.

(क) यस्स यत्थ कुसला धम्मा उप्पज्जन्ति तस्स तत्थ अब्याकता धम्मा निरुज्झन्तीति? नो.

(ख) यस्स वा पन यत्थ अब्याकता धम्मा निरुज्झन्ति तस्स तत्थ कुसला धम्मा उप्पज्जन्तीति? नो.

१६८. (क) यस्स यत्थ अकुसला धम्मा उप्पज्जन्ति तस्स तत्थ अब्याकता धम्मा निरुज्झन्तीति? नो.

(ख) यस्स वा पन यत्थ अब्याकता धम्मा निरुज्झन्ति तस्स तत्थ अकुसला धम्मा उप्पज्जन्तीति? नो.

(घ) पच्चनीकपुग्गलो

१६९. (क) यस्स कुसला धम्मा न उप्पज्जन्ति तस्स अकुसला धम्मा न निरुज्झन्तीति?

अकुसलानं भङ्गक्खणे तेसं कुसला धम्मा न उप्पज्जन्ति, नो च तेसं अकुसला धम्मा न निरुज्झन्ति. कुसलविप्पयुत्तचित्तस्स उप्पादक्खणे अकुसलविप्पयुत्तचित्तस्स भङ्गक्खणे निरोधसमापन्नानं असञ्ञसत्तानं तेसं कुसला च धम्मा न उप्पज्जन्ति अकुसला च धम्मा न निरुज्झन्ति.

(ख) यस्स वा पन अकुसला धम्मा न निरुज्झन्ति तस्स कुसला धम्मा न उप्पज्जन्तीति?

कुसलानं उप्पादक्खणे तेसं अकुसला धम्मा न निरुज्झन्ति, नो च तेसं कुसला धम्मा न उप्पज्जन्ति. अकुसलविप्पयुत्तचित्तस्स भङ्गक्खणे कुसलविप्पयुत्तचित्तस्स उप्पादक्खणे निरोधसमापन्नानं असञ्ञसत्तानं तेसं अकुसला च धम्मा न निरुज्झन्ति कुसला च धम्मा न उप्पज्जन्ति.

(क) यस्स कुसला धम्मा न उप्पज्जन्ति तस्स अब्याकता धम्मा न निरुज्झन्तीति?

सब्बेसं चवन्तानं पवत्ते चित्तस्स भङ्गक्खणे तेसं कुसला धम्मा न उप्पज्जन्ति, नो च तेसं अब्याकता धम्मा न निरुज्झन्ति. सब्बेसं उपपज्जन्तानं पवत्ते कुसलविप्पयुत्तचित्तस्स उप्पादक्खणे अरूपे कुसलाकुसलानं भङ्गक्खणे तेसं कुसला च धम्मा न उप्पज्जन्ति अब्याकता च धम्मा न निरुज्झन्ति.

(ख) यस्स वा पन अब्याकता धम्मा न निरुज्झन्ति तस्स कुसला धम्मा न उप्पज्जन्तीति?

कुसलानं उप्पादक्खणे तेसं अब्याकता धम्मा न निरुज्झन्ति, नो च तेसं कुसला धम्मा न उप्पज्जन्ति. सब्बेसं उपपज्जन्तानं पवत्ते कुसलविप्पयुत्तचित्तस्स उप्पादक्खणे अरूपे कुसलाकुसलानं भङ्गक्खणे तेसं अब्याकता च धम्मा न निरुज्झन्ति कुसला च धम्मा न उप्पज्जन्ति.

१७०. (क) यस्स अकुसला धम्मा न उप्पज्जन्ति तस्स अब्याकता धम्मा न निरुज्झन्तीति?

सब्बेसं चवन्तानं पवत्ते चित्तस्स भङ्गक्खणे तेसं अकुसला धम्मा न उप्पज्जन्ति, नो च तेसं अब्याकता धम्मा न निरुज्झन्ति. सब्बेसं उपपज्जन्तानं पवत्ते अकुसलविप्पयुत्तचित्तस्स उप्पादक्खणे अरूपे कुसलाकुसलानं भङ्गक्खणे तेसं अकुसला च धम्मा न उप्पज्जन्ति अब्याकता च धम्मा न निरुज्झन्ति.

(ख) यस्स वा पन अब्याकता धम्मा न निरुज्झन्ति तस्स अकुसला धम्मा न उप्पज्जन्तीति?

अकुसलानं उप्पादक्खणे तेसं अब्याकता धम्मा न निरुज्झन्ति, नो च तेसं अकुसला धम्मा न उप्पज्जन्ति. सब्बेसं उपपज्जन्तानं पवत्ते अकुसलविप्पयुत्तचित्तस्स उप्पादक्खणे अरूपे कुसलाकुसलानं भङ्गक्खणे तेसं अब्याकता च धम्मा न निरुज्झन्ति अकुसला च धम्मा न उप्पज्जन्ति.

(ङ) पच्चनीकओकासो

१७१. (क) यत्थ कुसला धम्मा न उप्पज्जन्ति तत्थ अकुसला धम्मा न निरुज्झन्तीति? आमन्ता.

(ख) यत्थ वा पन अकुसला धम्मा न निरुज्झन्ति तत्थ कुसला धम्मा न उप्पज्जन्तीति? आमन्ता.

(क) यत्थ कुसला धम्मा न उप्पज्जन्ति तत्थ अब्याकता धम्मा न निरुज्झन्तीति? निरुज्झन्ति.

(ख) यत्थ वा पन अब्याकता धम्मा न निरुज्झन्ति तत्थ कुसला धम्मा न उप्पज्जन्तीति? नत्थि.

१७२. (क) यत्थ अकुसला धम्मा न उप्पज्जन्ति तत्थ अब्याकता धम्मा न निरुज्झन्तीति? निरुज्झन्ति.

(ख) यत्थ वा पन अब्याकता धम्मा न निरुज्झन्ति तत्थ अकुसला धम्मा न उप्पज्जन्तीति? नत्थि.

(च) पच्चनीकपुग्गलोकासा

१७३. (क) यस्स यत्थ कुसला धम्मा न उप्पज्जन्ति तस्स तत्थ अकुसला धम्मा न निरुज्झन्तीति?

अकुसलानं भङ्गक्खणे तेसं तत्थ कुसला धम्मा न उप्पज्जन्ति, नो च तेसं तत्थ अकुसला धम्मा न निरुज्झन्ति. कुसलविप्पयुत्तचित्तस्स उप्पादक्खणे अकुसलविप्पयुत्तचित्तस्स भङ्गक्खणे असञ्ञसत्तानं तेसं तत्थ कुसला च धम्मा न उप्पज्जन्ति अकुसला च धम्मा न निरुज्झन्ति.

(ख) यस्स वा पन यत्थ अकुसला धम्मा न निरुज्झन्ति तस्स तत्थ कुसला धम्मा न उप्पज्जन्तीति?

कुसलानं उप्पादक्खणे तेसं तत्थ अकुसला धम्मा न निरुज्झन्ति, नो च तेसं तत्थ कुसला धम्मा न उप्पज्जन्ति. अकुसलविप्पयुत्तचित्तस्स भङ्गक्खणे कुसलविप्पयुत्तचित्तस्स उप्पादक्खणे असञ्ञसत्तानं तेसं तत्थ अकुसला च धम्मा न निरुज्झन्ति कुसला च धम्मा न उप्पज्जन्ति.

(क) यस्स यत्थ कुसला धम्मा न उप्पज्जन्ति तस्स तत्थ अब्याकता धम्मा न निरुज्झन्तीति?

सब्बेसं चवन्तानं पवत्ते चित्तस्स भङ्गक्खणे तेसं तत्थ कुसला धम्मा न उप्पज्जन्ति, नो च तेसं तत्थ अब्याकता धम्मा न निरुज्झन्ति. सब्बेसं उपपज्जन्तानं पवत्ते कुसलविप्पयुत्तचित्तस्स उप्पादक्खणे अरूपे कुसलाकुसलानं भङ्गक्खणे तेसं तत्थ कुसला च धम्मा न उप्पज्जन्ति अब्याकता च धम्मा न निरुज्झन्ति.

(ख) यस्स वा पन यत्थ अब्याकता धम्मा न निरुज्झन्ति तस्स तत्थ कुसला धम्मा न उप्पज्जन्तीति?

कुसलानं उप्पादक्खणे तेसं तत्थ अब्याकता धम्मा न निरुज्झन्ति, नो च तेसं तत्थ कुसला धम्मा न उप्पज्जन्ति. सब्बेसं उपपज्जन्तानं पवत्ते कुसलविप्पयुत्तचित्तस्स उप्पादक्खणे अरूपे कुसलाकुसलानं भङ्गक्खणे तेसं तत्थ अब्याकता च धम्मा न निरुज्झन्ति कुसला च धम्मा न उप्पज्जन्ति.

१७४. (क) यस्स यत्थ अकुसला धम्मा न उप्पज्जन्ति तस्स तत्थ अब्याकता धम्मा न निरुज्झन्तीति?

सब्बेसं चवन्तानं पवत्ते चित्तस्स भङ्गक्खणे तेसं तत्थ अकुसला धम्मा न उप्पज्जन्ति, नो च तेसं तत्थ अब्याकता धम्मा न निरुज्झन्ति. सब्बेसं उपपज्जन्तानं पवत्ते अकुसलविप्पयुत्तचित्तस्स उप्पादक्खणे अरूपे कुसलाकुसलानं भङ्गक्खणे तेसं तत्थ अकुसला च धम्मा न उप्पज्जन्ति अब्याकता च धम्मा न निरुज्झन्ति.

(ख) यस्स वा पन यत्थ अब्याकता धम्मा न निरुज्झन्ति तस्स तत्थ अकुसला धम्मा न उप्पज्जन्तीति?

अकुसलानं उप्पादक्खणे तेसं तत्थ अब्याकता धम्मा न निरुज्झन्ति, नो च तेसं तत्थ अकुसला धम्मा न उप्पज्जन्ति. सब्बेसं उपपज्जन्तानं पवत्ते अकुसलविप्पयुत्तचित्तस्स उप्पादक्खणे अरूपे कुसलाकुसलानं भङ्गक्खणे तेसं तत्थ अब्याकता च धम्मा न निरुज्झन्ति अकुसला च धम्मा न उप्पज्जन्ति.