(४) पच्चुप्पन्नातीतवारो

(क) अनुलोमपुग्गलो

१३३. (क) यस्स कुसला धम्मा निरुज्झन्ति तस्स अकुसला धम्मा निरुज्झित्थाति? आमन्ता.

(ख) यस्स वा पन अकुसला धम्मा निरुज्झित्थ तस्स कुसला धम्मा निरुज्झन्तीति?

सब्बेसं चित्तस्स उप्पादक्खणे कुसलविप्पयुत्तचित्तस्स भङ्गक्खणे निरोधसमापन्नानं असञ्ञसत्तानं तेसं अकुसला धम्मा निरुज्झित्थ, नो च तेसं कुसला धम्मा निरुज्झन्ति. कुसलानं भङ्गक्खणे तेसं अकुसला च धम्मा निरुज्झित्थ कुसला च धम्मा निरुज्झन्ति.

(क) यस्स कुसला धम्मा निरुज्झन्ति तस्स अब्याकता धम्मा निरुज्झित्थाति? आमन्ता.

(ख) यस्स वा पन अब्याकता धम्मा निरुज्झित्थ तस्स कुसला धम्मा निरुज्झन्तीति?

सब्बेसं चित्तस्स उप्पादक्खणे कुसलविप्पयुत्तचित्तस्स भङ्गक्खणे निरोधसमापन्नानं असञ्ञसत्तानं तेसं अब्याकता धम्मा निरुज्झित्थ, नो च तेसं कुसला धम्मा निरुज्झन्ति. कुसलानं भङ्गक्खणे तेसं अब्याकता च धम्मा निरुज्झित्थ कुसला च धम्मा निरुज्झन्ति.

१३४. (क) यस्स अकुसला धम्मा निरुज्झन्ति तस्स अब्याकता धम्मा निरुज्झित्थाति? आमन्ता.

(ख) यस्स वा पन अब्याकता धम्मा निरुज्झित्थ तस्स अकुसला धम्मा निरुज्झन्तीति?

सब्बेसं चित्तस्स उप्पादक्खणे अकुसलविप्पयुत्तचित्तस्स भङ्गक्खणे निरोधसमापन्नानं असञ्ञसत्तानं तेसं अब्याकता धम्मा निरुज्झित्थ, नो च तेसं अकुसला धम्मा निरुज्झन्ति. अकुसलानं भङ्गक्खणे तेसं अब्याकता च धम्मा निरुज्झित्थ अकुसला च धम्मा निरुज्झन्ति.

(ख) अनुलोमओकासो

१३५. यत्थ कुसला धम्मा निरुज्झन्ति तत्थ अकुसला धम्मा निरुज्झित्थाति?…पे….

(ग) अनुलोमपुग्गलोकासा

१३६. (क) यस्स यत्थ कुसला धम्मा निरुज्झन्ति तस्स तत्थ अकुसला धम्मा निरुज्झित्थाति? आमन्ता.

(ख) यस्स वा पन यत्थ अकुसला धम्मा निरुज्झित्थ तस्स तत्थ कुसला धम्मा निरुज्झन्तीति?

सब्बेसं चित्तस्स उप्पादक्खणे कुसलविप्पयुत्तचित्तस्स भङ्गक्खणे तेसं तत्थ अकुसला धम्मा निरुज्झित्थ, नो च तेसं तत्थ कुसला धम्मा निरुज्झन्ति. कुसलानं भङ्गक्खणे तेसं तत्थ अकुसला च धम्मा निरुज्झित्थ कुसला च धम्मा निरुज्झन्ति.

(क) यस्स यत्थ कुसला धम्मा निरुज्झन्ति तस्स तत्थ अब्याकता धम्मा निरुज्झित्थाति? आमन्ता.

(ख) यस्स वा पन यत्थ अब्याकता धम्मा निरुज्झित्थ तस्स तत्थ कुसला धम्मा निरुज्झन्तीति?

सब्बेसं चित्तस्स उप्पादक्खणे कुसलविप्पयुत्तचित्तस्स भङ्गक्खणे असञ्ञसत्तानं तेसं तत्थ अब्याकता धम्मा निरुज्झित्थ, नो च तेसं तत्थ कुसला धम्मा निरुज्झन्ति. कुसलानं भङ्गक्खणे तेसं तत्थ अब्याकता च धम्मा निरुज्झित्थ कुसला च धम्मा निरुज्झन्ति.

१३७. (क) यस्स यत्थ अकुसला धम्मा निरुज्झन्ति तस्स तत्थ अब्याकता धम्मा निरुज्झित्थाति? आमन्ता.

(ख) यस्स वा पन यत्थ अब्याकता धम्मा निरुज्झित्थ तस्स तत्थ अकुसला धम्मा निरुज्झन्तीति?

सब्बेसं चित्तस्स उप्पादक्खणे अकुसलविप्पयुत्तचित्तस्स भङ्गक्खणे असञ्ञसत्तानं तेसं तत्थ अब्याकता धम्मा निरुज्झित्थ, नो च तेसं तत्थ अकुसला धम्मा निरुज्झन्ति. अकुसलानं भङ्गक्खणे तेसं तत्थ अब्याकता च धम्मा निरुज्झित्थ अकुसला च धम्मा निरुज्झन्ति.

(घ) पच्चनीकपुग्गलो

१३८. (क) यस्स कुसला धम्मा न निरुज्झन्ति तस्स अकुसला धम्मा न निरुज्झित्थाति? निरुज्झित्थ.

(ख) यस्स वा पन अकुसला धम्मा न निरुज्झित्थ तस्स कुसला धम्मा न निरुज्झन्तीति? नत्थि.

(क) यस्स कुसला धम्मा न निरुज्झन्ति तस्स अब्याकता धम्मा न निरुज्झित्थाति? निरुज्झित्थ.

(ख) यस्स वा पन अब्याकता धम्मा न निरुज्झित्थ तस्स कुसला धम्मा न निरुज्झन्तीति? नत्थि.

१३९. (क) यस्स अकुसला धम्मा न निरुज्झन्ति तस्स अब्याकता धम्मा न निरुज्झित्थाति? निरुज्झित्थ.

(ख) यस्स वा पन अब्याकता धम्मा न निरुज्झित्थ तस्स अकुसला धम्मा न निरुज्झन्तीति? नत्थि.

(ङ) पच्चनीकओकासो

१४०. यत्थ कुसला धम्मा न निरुज्झन्ति तत्थ अकुसला धम्मा न निरुज्झित्थाति?…पे….

(च) पच्चनीकपुग्गलोकासा

१४१. (क) यस्स यत्थ कुसला धम्मा न निरुज्झन्ति तस्स तत्थ अकुसला धम्मा न निरुज्झित्थाति?

सब्बेसं चित्तस्स उप्पादक्खणे कुसलविप्पयुत्तचित्तस्स भङ्गक्खणे तेसं तत्थ कुसला धम्मा न निरुज्झन्ति, नो च तेसं तत्थ अकुसला धम्मा न निरुज्झित्थ. सुद्धावासानं दुतिये चित्ते वत्तमाने असञ्ञसत्तानं तेसं तत्थ कुसला च धम्मा न निरुज्झन्ति अकुसला च धम्मा न निरुज्झित्थ.

(ख) यस्स वा पन यत्थ अकुसला धम्मा न निरुज्झित्थ तस्स तत्थ कुसला धम्मा न निरुज्झन्तीति? आमन्ता.

(क) यस्स यत्थ कुसला धम्मा न निरुज्झन्ति तस्स तत्थ अब्याकता धम्मा न निरुज्झित्थाति?

सब्बेसं चित्तस्स उप्पादक्खणे कुसलविप्पयुत्तचित्तस्स भङ्गक्खणे असञ्ञसत्तानं तेसं तत्थ कुसला धम्मा न निरुज्झन्ति, नो च तेसं तत्थ अब्याकता धम्मा न निरुज्झित्थ. सुद्धावासं उपपज्जन्तानं तेसं तत्थ कुसला च धम्मा न निरुज्झन्ति अब्याकता च धम्मा न निरुज्झित्थ.

(ख) यस्स वा पन यत्थ अब्याकता धम्मा न निरुज्झित्थ तस्स तत्थ कुसला धम्मा न निरुज्झन्तीति? आमन्ता.

१४२. (क) यस्स यत्थ अकुसला धम्मा न निरुज्झन्ति तस्स तत्थ अब्याकता धम्मा न निरुज्झित्थाति?

सब्बेसं चित्तस्स उप्पादक्खणे अकुसलविप्पयुत्तचित्तस्स भङ्गक्खणे असञ्ञसत्तानं तेसं तत्थ अकुसला धम्मा न निरुज्झन्ति, नो च तेसं तत्थ अब्याकता धम्मा न निरुज्झित्थ. सुद्धावासं उपपज्जन्तानं तेसं तत्थ अकुसला च धम्मा न निरुज्झन्ति अब्याकता च धम्मा न निरुज्झित्थ.

(ख) यस्स वा पन यत्थ अब्याकता धम्मा न निरुज्झित्थ तस्स तत्थ अकुसला धम्मा न निरुज्झन्तीति? आमन्ता.