(१) पच्चुप्पन्नवारो

(क) अनुलोमपुग्गलो

९९. (क) यस्स कुसला धम्मा निरुज्झन्ति तस्स अकुसला धम्मा निरुज्झन्तीति? नो.

(ख) यस्स वा पन अकुसला धम्मा निरुज्झन्ति तस्स कुसला धम्मा निरुज्झन्तीति? नो.

(क) यस्स कुसला धम्मा निरुज्झन्ति तस्स अब्याकता धम्मा निरुज्झन्तीति?

अरूपे कुसलानं भङ्गक्खणे तेसं कुसला धम्मा निरुज्झन्ति, नो च तेसं अब्याकता धम्मा निरुज्झन्ति. पञ्चवोकारे कुसलानं भङ्गक्खणे तेसं कुसला च धम्मा निरुज्झन्ति अब्याकता च धम्मा निरुज्झन्ति.

(ख) यस्स वा पन अब्याकता धम्मा निरुज्झन्ति तस्स कुसला धम्मा निरुज्झन्तीति?

सब्बेसं चवन्तानं पवत्ते कुसलविप्पयुत्तचित्तस्स भङ्गक्खणे तेसं अब्याकता धम्मा निरुज्झन्ति, नो च तेसं कुसला धम्मा निरुज्झन्ति. पञ्चवोकारे कुसलानं भङ्गक्खणे तेसं अब्याकता च धम्मा निरुज्झन्ति कुसला च धम्मा निरुज्झन्ति.

१००. (क) यस्स अकुसला धम्मा निरुज्झन्ति तस्स अब्याकता धम्मा निरुज्झन्तीति?

अरूपे अकुसलानं भङ्गक्खणे तेसं अकुसला धम्मा निरुज्झन्ति, नो च तेसं अब्याकता धम्मा निरुज्झन्ति. पञ्चवोकारे अकुसलानं भङ्गक्खणे तेसं अकुसला च धम्मा निरुज्झन्ति अब्याकता च धम्मा निरुज्झन्ति.

(ख) यस्स वा पन अब्याकता धम्मा निरुज्झन्ति तस्स अकुसला धम्मा निरुज्झन्तीति?

सब्बेसं चवन्तानं पवत्ते अकुसलविप्पयुत्तचित्तस्स भङ्गक्खणे तेसं अब्याकता धम्मा निरुज्झन्ति, नो च तेसं अकुसला धम्मा निरुज्झन्ति. पञ्चवोकारे अकुसलानं भङ्गक्खणे तेसं अब्याकता च धम्मा निरुज्झन्ति अकुसला च धम्मा निरुज्झन्ति.

(ख) अनुलोमओकासो

१०१. (क) यत्थ कुसला धम्मा निरुज्झन्ति तत्थ अकुसला धम्मा निरुज्झन्तीति? आमन्ता.

(ख) यत्थ वा पन अकुसला धम्मा निरुज्झन्ति तत्थ कुसला धम्मा निरुज्झन्तीति? आमन्ता.

(क) यत्थ कुसला धम्मा निरुज्झन्ति तत्थ अब्याकता धम्मा निरुज्झन्तीति? आमन्ता.

(ख) यत्थ वा पन अब्याकता धम्मा निरुज्झन्ति तत्थ कुसला धम्मा निरुज्झन्तीति?

असञ्ञसत्ते तत्थ अब्याकता धम्मा निरुज्झन्ति, नो च तत्थ कुसला धम्मा निरुज्झन्ति. चतुवोकारे पञ्चवोकारे तत्थ अब्याकता च धम्मा निरुज्झन्ति कुसला च धम्मा निरुज्झन्ति.

१०२. (क) यत्थ अकुसला धम्मा निरुज्झन्ति तत्थ अब्याकता धम्मा निरुज्झन्तीति? आमन्ता.

(ख) यत्थ वा पन अब्याकता धम्मा निरुज्झन्ति तत्थ अकुसला धम्मा निरुज्झन्तीति?

असञ्ञसत्ते तत्थ अब्याकता धम्मा निरुज्झन्ति, नो च तत्थ अकुसला धम्मा निरुज्झन्ति. चतुवोकारे पञ्चवोकारे तत्थ अब्याकता च धम्मा निरुज्झन्ति अकुसला च धम्मा निरुज्झन्ति.

(ग) अनुलोमपुग्गलोकासा

१०३. (क) यस्स यत्थ कुसला धम्मा निरुज्झन्ति तस्स तत्थ अकुसला धम्मा निरुज्झन्तीति? नो.

(ख) यस्स वा पन यत्थ अकुसला धम्मा निरुज्झन्ति तस्स तत्थ कुसला धम्मा निरुज्झन्तीति? नो.

(क) यस्स यत्थ कुसला धम्मा निरुज्झन्ति तस्स तत्थ अब्याकता धम्मा निरुज्झन्तीति?

अरूपे कुसलानं भङ्गक्खणे तेसं तत्थ कुसला धम्मा निरुज्झन्ति, नो च तेसं तत्थ अब्याकता धम्मा निरुज्झन्ति. पञ्चवोकारे कुसलानं भङ्गक्खणे तेसं तत्थ कुसला च धम्मा निरुज्झन्ति अब्याकता च धम्मा निरुज्झन्ति.

(ख) यस्स वा पन यत्थ अब्याकता धम्मा निरुज्झन्ति तस्स तत्थ कुसला धम्मा निरुज्झन्तीति?

सब्बेसं चवन्तानं पवत्ते कुसलविप्पयुत्तचित्तस्स भङ्गक्खणे तेसं तत्थ अब्याकता धम्मा निरुज्झन्ति, नो च तेसं तत्थ कुसला धम्मा निरुज्झन्ति. पञ्चवोकारे कुसलानं भङ्गक्खणे तेसं तत्थ अब्याकता च धम्मा निरुज्झन्ति कुसला च धम्मा निरुज्झन्ति.

१०४. (क) यस्स यत्थ अकुसला धम्मा निरुज्झन्ति तस्स तत्थ अब्याकता धम्मा निरुज्झन्तीति?

अरूपे अकुसलानं भङ्गक्खणे तेसं तत्थ अकुसला धम्मा निरुज्झन्ति, नो च तेसं तत्थ अब्याकता धम्मा निरुज्झन्ति. पञ्चवोकारे अकुसलानं भङ्गक्खणे तेसं तत्थ अकुसला च धम्मा निरुज्झन्ति अब्याकता च धम्मा निरुज्झन्ति.

(ख) यस्स वा पन यत्थ अब्याकता धम्मा निरुज्झन्ति तस्स तत्थ अकुसला धम्मा निरुज्झन्तीति?

सब्बेसं चवन्तानं पवत्ते अकुसलविप्पयुत्तचित्तस्स भङ्गक्खणे तेसं तत्थ अब्याकता धम्मा निरुज्झन्ति, नो च तेसं तत्थ अकुसला धम्मा निरुज्झन्ति. पञ्चवोकारे अकुसलानं भङ्गक्खणे तेसं तत्थ अब्याकता च धम्मा निरुज्झन्ति अकुसला च धम्मा निरुज्झन्ति.

(घ) पच्चनीकपुग्गलो

१०५. (क) यस्स कुसला धम्मा न निरुज्झन्ति तस्स अकुसला धम्मा न निरुज्झन्तीति?

अकुसलानं भङ्गक्खणे तेसं कुसला धम्मा न निरुज्झन्ति, नो च तेसं अकुसला धम्मा न निरुज्झन्ति. सब्बेसं चित्तस्स उप्पादक्खणे कुसलविप्पयुत्तअकुसलविप्पयुत्तचित्तस्स भङ्गक्खणे निरोधसमापन्नानं असञ्ञसत्तानं तेसं कुसला च धम्मा न निरुज्झन्ति अकुसला च धम्मा न निरुज्झन्ति.

(ख) यस्स वा पन अकुसला धम्मा न निरुज्झन्ति तस्स कुसला धम्मा न निरुज्झन्तीति?

कुसलानं भङ्गक्खणे तेसं अकुसला धम्मा न निरुज्झन्ति, नो च तेसं कुसला धम्मा न निरुज्झन्ति. सब्बेसं चित्तस्स उप्पादक्खणे अकुसलविप्पयुत्तकुसलविप्पयुत्तचित्तस्स भङ्गक्खणे निरोधसमापन्नानं असञ्ञसत्तानं तेसं अकुसला च धम्मा न निरुज्झन्ति कुसला च धम्मा न निरुज्झन्ति.

(क) यस्स कुसला धम्मा न निरुज्झन्ति तस्स अब्याकता धम्मा न निरुज्झन्तीति?

सब्बेसं चवन्तानं पवत्ते कुसलविप्पयुत्तचित्तस्स भङ्गक्खणे तेसं कुसला धम्मा न निरुज्झन्ति, नो च तेसं अब्याकता धम्मा न निरुज्झन्ति. सब्बेसं उपपज्जन्तानं पवत्ते चित्तस्स उप्पादक्खणे अरूपे अकुसलानं भङ्गक्खणे तेसं कुसला च धम्मा न निरुज्झन्ति अब्याकता च धम्मा न निरुज्झन्ति.

(ख) यस्स वा पन अब्याकता धम्मा न निरुज्झन्ति तस्स कुसला धम्मा न निरुज्झन्तीति?

अरूपे कुसलानं भङ्गक्खणे तेसं अब्याकता धम्मा न निरुज्झन्ति, नो च तेसं कुसला धम्मा न निरुज्झन्ति. सब्बेसं उपपज्जन्तानं पवत्ते चित्तस्स उप्पादक्खणे अरूपे अकुसलानं भङ्गक्खणे तेसं अब्याकता च धम्मा न निरुज्झन्ति कुसला च धम्मा न निरुज्झन्ति.

१०६. (क) यस्स अकुसला धम्मा न निरुज्झन्ति तस्स अब्याकता धम्मा न निरुज्झन्तीति?

सब्बेसं चवन्तानं पवत्ते अकुसलविप्पयुत्तचित्तस्स भङ्गक्खणे तेसं अकुसला धम्मा न निरुज्झन्ति, नो च तेसं अब्याकता धम्मा न निरुज्झन्ति. सब्बेसं उपपज्जन्तानं पवत्ते चित्तस्स उप्पादक्खणे अरूपे कुसलानं भङ्गक्खणे तेसं अकुसला च धम्मा न निरुज्झन्ति अब्याकता च धम्मा न निरुज्झन्ति.

(ख) यस्स वा पन अब्याकता धम्मा न निरुज्झन्ति तस्स अकुसला धम्मा न निरुज्झन्तीति?

अरूपे अकुसलानं भङ्गक्खणे तेसं अब्याकता धम्मा न निरुज्झन्ति, नो च तेसं अकुसला धम्मा न निरुज्झन्ति. सब्बेसं उपपज्जन्तानं पवत्ते चित्तस्स उप्पादक्खणे अरूपे कुसलानं भङ्गक्खणे तेसं अब्याकता च धम्मा न निरुज्झन्ति अकुसला च धम्मा न निरुज्झन्ति.

(ङ) पच्चनीकओकासो

१०७. (क) यत्थ कुसला धम्मा न निरुज्झन्ति तत्थ अकुसला धम्मा न निरुज्झन्तीति? आमन्ता.

(ख) यत्थ वा पन अकुसला धम्मा न निरुज्झन्ति तत्थ कुसला धम्मा न निरुज्झन्तीति? आमन्ता.

(क) यत्थ कुसला धम्मा न निरुज्झन्ति तत्थ अब्याकता धम्मा न निरुज्झन्तीति? निरुज्झन्ति.

(ख) यत्थ वा पन अब्याकता धम्मा न निरुज्झन्ति तत्थ कुसला धम्मा न निरुज्झन्तीति? नत्थि.

१०८. (क) यत्थ अकुसला धम्मा न निरुज्झन्ति तत्थ अब्याकता धम्मा न निरुज्झन्तीति? निरुज्झन्ति.

(ख) यत्थ वा पन अब्याकता धम्मा न निरुज्झन्ति तत्थ अकुसला धम्मा न निरुज्झन्तीति? नत्थि.

(च) पच्चनीकपुग्गलोकासा

१०९. (क) यस्स यत्थ कुसला धम्मा न निरुज्झन्ति तस्स तत्थ अकुसला धम्मा न निरुज्झन्तीति?

अकुसलानं भङ्गक्खणे तेसं तत्थ कुसला धम्मा न निरुज्झन्ति, नो च तेसं तत्थ अकुसला धम्मा न निरुज्झन्ति. सब्बेसं चित्तस्स उप्पादक्खणे कुसलविप्पयुत्तअकुसलविप्पयुत्तचित्तस्स भङ्गक्खणे असञ्ञसत्तानं तेसं तत्थ कुसला च धम्मा न निरुज्झन्ति अकुसला च धम्मा न निरुज्झन्ति.

(ख) यस्स वा पन यत्थ अकुसला धम्मा न निरुज्झन्ति तस्स तत्थ कुसला धम्मा न निरुज्झन्तीति?

कुसलानं भङ्गक्खणे तेसं तत्थ अकुसला धम्मा न निरुज्झन्ति, नो च तेसं तत्थ कुसला धम्मा न निरुज्झन्ति. सब्बेसं चित्तस्स उप्पादक्खणे अकुसलविप्पयुत्तकुसलविप्पयुत्तचित्तस्स भङ्गक्खणे असञ्ञसत्तानं तेसं तत्थ अकुसला च धम्मा न निरुज्झन्ति कुसला च धम्मा न निरुज्झन्ति.

(क) यस्स यत्थ कुसला धम्मा न निरुज्झन्ति तस्स तत्थ अब्याकता धम्मा न निरुज्झन्तीति?

सब्बेसं चवन्तानं पवत्ते कुसलविप्पयुत्तचित्तस्स भङ्गक्खणे तेसं तत्थ कुसला धम्मा न निरुज्झन्ति, नो च तेसं तत्थ अब्याकता धम्मा न निरुज्झन्ति. सब्बेसं उपपज्जन्तानं पवत्ते चित्तस्स उप्पादक्खणे अरूपे अकुसलानं भङ्गक्खणे तेसं तत्थ कुसला च धम्मा न निरुज्झन्ति अब्याकता च धम्मा न निरुज्झन्ति.

(ख) यस्स वा पन यत्थ अब्याकता धम्मा न निरुज्झन्ति तस्स तत्थ कुसला धम्मा न निरुज्झन्तीति?

अरूपे कुसलानं भङ्गक्खणे तेसं तत्थ अब्याकता धम्मा न निरुज्झन्ति, नो च तेसं तत्थ कुसला धम्मा न निरुज्झन्ति. सब्बेसं उपपज्जन्तानं पवत्ते चित्तस्स उप्पादक्खणे अरूपे अकुसलानं भङ्गक्खणे तेसं तत्थ अब्याकता च धम्मा न निरुज्झन्ति कुसला च धम्मा न निरुज्झन्ति.

११०. (क) यस्स यत्थ अकुसला धम्मा न निरुज्झन्ति तस्स तत्थ अब्याकता धम्मा न निरुज्झन्तीति?

सब्बेसं चवन्तानं पवत्ते अकुसलविप्पयुत्तचित्तस्स भङ्गक्खणे तेसं तत्थ अकुसला धम्मा न निरुज्झन्ति, नो च तेसं तत्थ अब्याकता धम्मा न निरुज्झन्ति. सब्बेसं उपपज्जन्तानं पवत्ते चित्तस्स उप्पादक्खणे अरूपे कुसलानं भङ्गक्खणे तेसं तत्थ अकुसला च धम्मा न निरुज्झन्ति अब्याकता च धम्मा न निरुज्झन्ति.

(ख) यस्स वा पन यत्थ अब्याकता धम्मा न निरुज्झन्ति तस्स तत्थ अकुसला धम्मा न निरुज्झन्तीति?

अरूपे अकुसलानं भङ्गक्खणे तेसं तत्थ अब्याकता धम्मा न निरुज्झन्ति, नो च तेसं तत्थ अकुसला धम्मा न निरुज्झन्ति. सब्बेसं उपपज्जन्तानं पवत्ते चित्तस्स उप्पादक्खणे अरूपे कुसलानं भङ्गक्खणे तेसं तत्थ अब्याकता च धम्मा न निरुज्झन्ति अकुसला च धम्मा न निरुज्झन्ति.