(६) अतीतानागतवारो

(क) अनुलोमपुग्गलो

८९. (क) यस्स कुसला धम्मा उप्पज्जित्थ तस्स अकुसला धम्मा उप्पज्जिस्सन्तीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति तेसं कुसला धम्मा उप्पज्जित्थ, नो च तेसं अकुसला धम्मा उप्पज्जिस्सन्ति. इतरेसं तेसं कुसला च धम्मा उप्पज्जित्थ अकुसला च धम्मा उप्पज्जिस्सन्ति.

(ख) यस्स वा पन अकुसला धम्मा उप्पज्जिस्सन्ति तस्स कुसला धम्मा उप्पज्जित्थाति? आमन्ता.

(क) यस्स कुसला धम्मा उप्पज्जित्थ तस्स अब्याकता धम्मा उप्पज्जिस्सन्तीति?

पच्छिमचित्तसमङ्गीनं तेसं कुसला धम्मा उप्पज्जित्थ, नो च तेसं अब्याकता धम्मा उप्पज्जिस्सन्ति. इतरेसं तेसं कुसला च धम्मा उप्पज्जित्थ अब्याकता च धम्मा उप्पज्जिस्सन्ति.

(ख) यस्स वा पन अब्याकता धम्मा उप्पज्जिस्सन्ति तस्स कुसला धम्मा उप्पज्जित्थाति? आमन्ता.

९०. (क) यस्स अकुसला धम्मा उप्पज्जित्थ तस्स अब्याकता धम्मा उप्पज्जिस्सन्तीति?

पच्छिमचित्तसमङ्गीनं तेसं अकुसला धम्मा उप्पज्जित्थ, नो च तेसं अब्याकता धम्मा उप्पज्जिस्सन्ति. इतरेसं तेसं अकुसला च धम्मा उप्पज्जित्थ अब्याकता च धम्मा उप्पज्जिस्सन्ति.

(ख) यस्स वा पन अब्याकता धम्मा उप्पज्जिस्सन्ति तस्स अकुसला धम्मा उप्पज्जित्थाति? आमन्ता.

(ख) अनुलोमओकासो

९१. यत्थ कुसला धम्मा उप्पज्जित्थ तत्थ अकुसला धम्मा उप्पज्जिस्सन्तीति?…पे….

(ग) अनुलोमपुग्गलोकासा

९२. (क) यस्स यत्थ कुसला धम्मा उप्पज्जित्थ तस्स तत्थ अकुसला धम्मा उप्पज्जिस्सन्तीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति तेसं तत्थ कुसला धम्मा उप्पज्जित्थ, नो च तेसं तत्थ अकुसला धम्मा उप्पज्जिस्सन्ति. इतरेसं चतुवोकारानं पञ्चवोकारानं तेसं तत्थ कुसला च धम्मा उप्पज्जित्थ अकुसला च धम्मा उप्पज्जिस्सन्ति.

(ख) यस्स वा पन यत्थ अकुसला धम्मा उप्पज्जिस्सन्ति तस्स तत्थ कुसला धम्मा उप्पज्जित्थाति?

सुद्धावासानं दुतिये चित्ते वत्तमाने तेसं तत्थ अकुसला धम्मा उप्पज्जिस्सन्ति, नो च तेसं तत्थ कुसला धम्मा उप्पज्जित्थ. इतरेसं चतुवोकारानं पञ्चवोकारानं तेसं तत्थ अकुसला च धम्मा उप्पज्जिस्सन्ति कुसला च धम्मा उप्पज्जित्थ.

(क) यस्स यत्थ कुसला धम्मा उप्पज्जित्थ तस्स तत्थ अब्याकता धम्मा उप्पज्जिस्सन्तीति?

पच्छिमचित्तसमङ्गीनं तेसं तत्थ कुसला धम्मा उप्पज्जित्थ, नो च तेसं तत्थ अब्याकता धम्मा उप्पज्जिस्सन्ति. इतरेसं चतुवोकारानं पञ्चवोकारानं तेसं तत्थ कुसला च धम्मा उप्पज्जित्थ अब्याकता च धम्मा उप्पज्जिस्सन्ति.

(ख) यस्स वा पन यत्थ अब्याकता धम्मा उप्पज्जिस्सन्ति तस्स तत्थ कुसला धम्मा उप्पज्जित्थाति?

सुद्धावासानं दुतिये चित्ते वत्तमाने असञ्ञसत्तानं तेसं तत्थ अब्याकता धम्मा उप्पज्जिस्सन्ति, नो च तेसं तत्थ कुसला धम्मा उप्पज्जित्थ. इतरेसं चतुवोकारानं पञ्चवोकारानं तेसं तत्थ अब्याकता च धम्मा उप्पज्जिस्सन्ति कुसला च धम्मा उप्पज्जित्थ.

९३. (क) यस्स यत्थ अकुसला धम्मा उप्पज्जित्थ तस्स तत्थ अब्याकता धम्मा उप्पज्जिस्सन्तीति?

पच्छिमचित्तसमङ्गीनं तेसं तत्थ अकुसला धम्मा उप्पज्जित्थ, नो च तेसं तत्थ अब्याकता धम्मा उप्पज्जिस्सन्ति. इतरेसं चतुवोकारानं पञ्चवोकारानं तेसं तत्थ अकुसला च धम्मा उप्पज्जित्थ अब्याकता च धम्मा उप्पज्जिस्सन्ति.

(ख) यस्स वा पन यत्थ अब्याकता धम्मा उप्पज्जिस्सन्ति तस्स तत्थ अकुसला धम्मा उप्पज्जित्थाति?

सुद्धावासानं दुतिये चित्ते वत्तमाने असञ्ञसत्तानं तेसं तत्थ अब्याकता धम्मा उप्पज्जिस्सन्ति, नो च तेसं तत्थ अकुसला धम्मा उप्पज्जित्थ. इतरेसं चतुवोकारानं पञ्चवोकारानं तेसं तत्थ अब्याकता च धम्मा उप्पज्जिस्सन्ति अकुसला च धम्मा उप्पज्जित्थ.

(घ) पच्चनीकपुग्गलो

९४. (क) यस्स कुसला धम्मा न उप्पज्जित्थ तस्स अकुसला धम्मा न उप्पज्जिस्सन्तीति? नत्थि.

(ख) यस्स वा पन अकुसला धम्मा न उप्पज्जिस्सन्ति तस्स कुसला धम्मा न उप्पज्जित्थाति? उप्पज्जित्थ.

(क) यस्स कुसला धम्मा न उप्पज्जित्थ तस्स अब्याकता धम्मा न उप्पज्जिस्सन्तीति? नत्थि.

(ख) यस्स वा पन अब्याकता धम्मा न उप्पज्जिस्सन्ति तस्स कुसला धम्मा न उप्पज्जित्थाति? उप्पज्जित्थ.

९५. (क) यस्स अकुसला धम्मा न उप्पज्जित्थ तस्स अब्याकता धम्मा न उप्पज्जिस्सन्तीति? नत्थि.

(ख) यस्स वा पन अब्याकता धम्मा न उप्पज्जिस्सन्ति तस्स अकुसला धम्मा न उप्पज्जित्थाति? उप्पज्जित्थ.

(ङ) पच्चनीकओकासो

९६. यत्थ कुसला धम्मा न उप्पज्जित्थ तत्थ अकुसला धम्मा न उप्पज्जिस्सन्तीति?…पे….

(च) पच्चनीकपुग्गलोकासा

९७. (क) यस्स यत्थ कुसला धम्मा न उप्पज्जित्थ तस्स तत्थ अकुसला धम्मा न उप्पज्जिस्सन्तीति?

सुद्धावासानं दुतिये चित्ते वत्तमाने तेसं तत्थ कुसला धम्मा न उप्पज्जित्थ, नो च तेसं तत्थ अकुसला धम्मा न उप्पज्जिस्सन्ति. असञ्ञसत्तानं तेसं तत्थ कुसला च धम्मा न उप्पज्जित्थ अकुसला च धम्मा न उप्पज्जिस्सन्ति.

(ख) यस्स वा पन यत्थ अकुसला धम्मा न उप्पज्जिस्सन्ति तस्स तत्थ कुसला धम्मा न उप्पज्जित्थाति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति तेसं तत्थ अकुसला धम्मा न उप्पज्जिस्सन्ति, नो च तेसं तत्थ कुसला धम्मा न उप्पज्जित्थ. असञ्ञसत्तानं तेसं तत्थ अकुसला च धम्मा न उप्पज्जिस्सन्ति कुसला च धम्मा न उप्पज्जित्थ.

(क) यस्स यत्थ कुसला धम्मा न उप्पज्जित्थ तस्स तत्थ अब्याकता धम्मा न उप्पज्जिस्सन्तीति? उप्पज्जिस्सन्ति.

(ख) यस्स वा पन यत्थ अब्याकता धम्मा न उप्पज्जिस्सन्ति तस्स तत्थ कुसला धम्मा न उप्पज्जित्थाति? उप्पज्जित्थ.

९८. (क) यस्स यत्थ अकुसला धम्मा न उप्पज्जित्थ तस्स तत्थ अब्याकता धम्मा न उप्पज्जिस्सन्तीति? उप्पज्जिस्सन्ति.

(ख) यस्स वा पन यत्थ अब्याकता धम्मा न उप्पज्जिस्सन्ति तस्स तत्थ अकुसला धम्मा न उप्पज्जित्थाति? उप्पज्जित्थ.

उप्पादवारो.