(६) अतीतानागतवारो

(क) अनुलोमपुग्गलो

१५८. (क) यस्स कायसङ्खारो उप्पज्जित्थ तस्स वचीसङ्खारो निरुज्झिस्सतीति?

सवितक्कसविचारपच्छिमचित्तस्स भङ्गक्खणे अवितक्कअविचारपच्छिमचित्तसमङ्गीनं यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति तेसं कायसङ्खारो उप्पज्जित्थ, नो च तेसं वचीसङ्खारो निरुज्झिस्सति. इतरेसं तेसं कायसङ्खारो च उप्पज्जित्थ वचीसङ्खारो च निरुज्झिस्सति.

(ख) यस्स वा पन वचीसङ्खारो निरुज्झिस्सति तस्स कायसङ्खारो उप्पज्जित्थाति? आमन्ता.

(क) यस्स कायसङ्खारो उप्पज्जित्थ तस्स चित्तसङ्खारो निरुज्झिस्सतीति?

पच्छिमचित्तस्स भङ्गक्खणे तेसं कायसङ्खारो उप्पज्जित्थ, नो च तेसं चित्तसङ्खारो निरुज्झिस्सति. इतरेसं तेसं कायसङ्खारो च उप्पज्जित्थ चित्तसङ्खारो च निरुज्झिस्सति.

(ख) यस्स वा पन चित्तसङ्खारो निरुज्झिस्सति तस्स कायसङ्खारो उप्पज्जित्थाति? आमन्ता.

(यथा निरोधवारे अतीतानागता पुच्छा अनुलोमम्पि पच्चनीकम्पि एवं उप्पादनिरोधवारेपि अतीतानागता पुच्छा अनुलोमम्पि पच्चनीकम्पि विभजितब्बं असम्मोहन्तेन निरोधवारेन सदिसं, नत्थि नानाकरणं.)

उप्पादनिरोधवारो.