(१) पच्चुप्पन्नवारो

(क) अनुलोमपुग्गलो

१२८. (क) यस्स कायसङ्खारो उप्पज्जति तस्स वचीसङ्खारो निरुज्झतीति? नो.

(ख) यस्स वा पन वचीसङ्खारो निरुज्झति तस्स कायसङ्खारो उप्पज्जतीति? नो.

(क) यस्स कायसङ्खारो उप्पज्जति तस्स चित्तसङ्खारो निरुज्झतीति? नो.

(ख) यस्स वा पन चित्तसङ्खारो निरुज्झति तस्स कायसङ्खारो उप्पज्जतीति? नो.

१२९. (क) यस्स वचीसङ्खारो उप्पज्जति तस्स चित्तसङ्खारो निरुज्झतीति? नो.

(ख) यस्स वा पन…पे…? नो.

(ख) अनुलोमओकासो

१३०. यत्थ कायसङ्खारो उप्पज्जति तत्थ वचीसङ्खारो निरुज्झतीति?

दुतियज्झाने ततियज्झाने तत्थ…पे… (इतरेसं यत्थकानं सदिसं).

(ग) अनुलोमपुग्गलोकासा

१३१. यस्स यत्थ कायसङ्खारो उप्पज्जति…पे… (यस्सकम्पि यस्सयत्थकम्पि सदिसं).

(घ) पच्चनीकपुग्गलो

१३२. (क) यस्स कायसङ्खारो नुप्पज्जति तस्स वचीसङ्खारो न निरुज्झतीति?

वितक्कविचारानं भङ्गक्खणे तेसं कायसङ्खारो नुप्पज्जति, नो च तेसं वचीसङ्खारो न निरुज्झति. विना अस्सासपस्सासेहि चित्तस्स उप्पादक्खणे विना वितक्कविचारेहि चित्तस्स भङ्गक्खणे निरोधसमापन्नानं असञ्ञसत्तानं तेसं कायसङ्खारो च नुप्पज्जति वचीसङ्खारो च न निरुज्झति.

(ख) यस्स वा पन वचीसङ्खारो न निरुज्झति तस्स कायसङ्खारो नुप्पज्जतीति?

अस्सासपस्सासानं उप्पादक्खणे तेसं वचीसङ्खारो न निरुज्झति, नो च तेसं कायसङ्खारो नुप्पज्जति. विना अस्सासपस्सासेहि चित्तस्स उप्पादक्खणे विना वितक्कविचारेहि चित्तस्स भङ्गक्खणे निरोधसमापन्नानं असञ्ञसत्तानं तेसं वचीसङ्खारो च न निरुज्झति कायसङ्खारो च नुप्पज्जति.

(क) यस्स कायसङ्खारो नुप्पज्जति तस्स चित्तसङ्खारो निरुज्झतीति?

सब्बेसं चित्तस्स भङ्गक्खणे तेसं कायसङ्खारो नुप्पज्जति, नो च तेसं चित्तसङ्खारो न निरुज्झति. विना अस्सासपस्सासेहि चित्तस्स उप्पादक्खणे निरोधसमापन्नानं असञ्ञसत्तानं तेसं कायसङ्खारो च नुप्पज्जति चित्तसङ्खारो च न निरुज्झति.

(ख) यस्स वा पन चित्तसङ्खारो न निरुज्झति तस्स कायसङ्खारो नुप्पज्जतीति?

अस्सासपस्सासानं उप्पादक्खणे तेसं चित्तसङ्खारो न निरुज्झति, नो च तेसं कायसङ्खारो नुप्पज्जति. विना अस्सासपस्सासेहि चित्तस्स उप्पादक्खणे निरोधसमापन्नानं असञ्ञसत्तानं तेसं चित्तसङ्खारो च न निरुज्झति कायसङ्खारो च नुप्पज्जति.

१३३. (क) यस्स वचीसङ्खारो नुप्पज्जति तस्स चित्तसङ्खारो न निरुज्झतीति?

सब्बेसं चित्तस्स भङ्गक्खणे तेसं वचीसङ्खारो नुप्पज्जति, नो च तेसं चित्तसङ्खारो न निरुज्झति. विना वितक्कविचारेहि चित्तस्स उप्पादक्खणे निरोधसमापन्नानं असञ्ञसत्तानं तेसं वचीसङ्खारो च नुप्पज्जति चित्तसङ्खारो च न निरुज्झति.

(ख) यस्स वा पन चित्तसङ्खारो न निरुज्झति तस्स वचीसङ्खारो नुप्पज्जतीति?

वितक्कविचारानं उप्पादक्खणे तेसं चित्तसङ्खारो न निरुज्झति, नो च तेसं वचीसङ्खारो नुप्पज्जति. विना वितक्कविचारेहि चित्तस्स उप्पादक्खणे निरोधसमापन्नानं असञ्ञसत्तानं तेसं चित्तसङ्खारो च न निरुज्झति वचीसङ्खारो च नुप्पज्जति.

(ङ) पच्चनीकओकासो

१३४. यत्थ कायसङ्खारो नुप्पज्जति…पे….

(च) पच्चनीकपुग्गलोकासा

१३५. यस्स यत्थ कायसङ्खारो नुप्पज्जति…पे….

(यस्सकम्पि यस्सयत्थकम्पि सदिसं, यस्सयत्थके निरोधसमापन्नानन्ति न लब्भति).