(१) पच्चुप्पन्नवारो

(क) अनुलोमपुग्गलो

७९. (क) यस्स कायसङ्खारो निरुज्झति तस्स वचीसङ्खारो निरुज्झतीति?

विना वितक्कविचारेहि अस्सासपस्सासानं भङ्गक्खणे तेसं कायसङ्खारो निरुज्झति, नो च तेसं वचीसङ्खारो निरुज्झति. पठमज्झानं समापन्नानं कामावचरानं अस्सासपस्सासानं भङ्गक्खणे तेसं कायसङ्खारो च निरुज्झति वचीसङ्खारो च निरुज्झति.

(ख) यस्स वा पन वचीसङ्खारो निरुज्झति तस्स कायसङ्खारो निरुज्झतीति?

विना अस्सासपस्सासेहि वितक्कविचारानं भङ्गक्खणे तेसं वचीसङ्खारो निरुज्झति, नो च तेसं कायसङ्खारो निरुज्झति. पठमज्झानं समापन्नानं कामावचरानं अस्सासपस्सासानं भङ्गक्खणे तेसं वचीसङ्खारो च निरुज्झति कायसङ्खारो च निरुज्झति.

(क) यस्स कायसङ्खारो निरुज्झति तस्स चित्तसङ्खारो निरुज्झतीति? आमन्ता.

(ख) यस्स वा पन चित्तसङ्खारो निरुज्झति तस्स कायसङ्खारो निरुज्झतीति?

विना अस्सासपस्सासेहि चित्तस्स भङ्गक्खणे तेसं चित्तसङ्खारो निरुज्झति, नो च तेसं कायसङ्खारो निरुज्झति. अस्सासपस्सासानं भङ्गक्खणे तेसं चित्तसङ्खारो च निरुज्झति कायसङ्खारो च निरुज्झति.

८०. (क) यस्स वचीसङ्खारो निरुज्झति तस्स चित्तसङ्खारो निरुज्झतीति? आमन्ता.

(ख) यस्स वा पन चित्तसङ्खारो निरुज्झति तस्स वचीसङ्खारो निरुज्झतीति?

विना वितक्कविचारेहि चित्तस्स भङ्गक्खणे तेसं चित्तसङ्खारो निरुज्झति, नो च तेसं वचीसङ्खारो निरुज्झति. वितक्कविचारानं भङ्गक्खणे तेसं चित्तसङ्खारो च निरुज्झति वचीसङ्खारो च निरुज्झति.

(ख) अनुलोमओकासो

८१. यत्थ कायसङ्खारो निरुज्झति तत्थ वचीसङ्खारो निरुज्झतीति?…पे….

(ग) अनुलोमपुग्गलोकासा

८२. यस्स यत्थ कायसङ्खारो निरुज्झति तस्स तत्थ वचीसङ्खारो निरुज्झतीति?…पे…. (यस्सकम्पि यस्सयत्थकम्पि सदिसं.)

(घ) पच्चनीकपुग्गलो

८३. (क) यस्स कायसङ्खारो न निरुज्झति तस्स वचीसङ्खारो न निरुज्झतीति?

विना अस्सासपस्सासेहि वितक्कविचारानं भङ्गक्खणे तेसं कायसङ्खारो न निरुज्झति, नो च तेसं वचीसङ्खारो न निरुज्झति. सब्बेसं चित्तस्स उप्पादक्खणे विना अस्सासपस्सासेहि अवितक्कअविचारचित्तस्स भङ्गक्खणे निरोधसमापन्नानं असञ्ञसत्तानं तेसं कायसङ्खारो च न निरुज्झति वचीसङ्खारो च न निरुज्झति.

(ख) यस्स वा पन वचीसङ्खारो न निरुज्झति तस्स कायसङ्खारो न निरुज्झतीति?

विना वितक्कविचारेहि अस्सासपस्सासानं भङ्गक्खणे तेसं वचीसङ्खारो न निरुज्झति, नो च तेसं कायसङ्खारो न निरुज्झति. सब्बेसं चित्तस्स उप्पादक्खणे विना अस्सासपस्सासेहि अवितक्कअविचारचित्तस्स भङ्गक्खणे निरोधसमापन्नानं असञ्ञसत्तानं तेसं वचीसङ्खारो च न निरुज्झति कायसङ्खारो च न निरुज्झति.

(क) यस्स कायसङ्खारो न निरुज्झति तस्स चित्तसङ्खारो न निरुज्झतीति?

विना अस्सासपस्सासेहि चित्तस्स भङ्गक्खणे तेसं कायसङ्खारो न निरुज्झति, नो च तेसं चित्तसङ्खारो न निरुज्झति. सब्बेसं चित्तस्स उप्पादक्खणे निरोधसमापन्नानं असञ्ञसत्तानं तेसं कायसङ्खारो च न निरुज्झति चित्तसङ्खारो च न निरुज्झति.

(ख) यस्स वा पन…पे…? आमन्ता.

८४. (क) यस्स वचीसङ्खारो न निरुज्झति तस्स चित्तसङ्खारो न निरुज्झतीति?

विना वितक्कविचारेहि चित्तस्स भङ्गक्खणे तेसं वचीसङ्खारो न निरुज्झति, नो च तेसं चित्तसङ्खारो न निरुज्झति. सब्बेसं चित्तस्स उप्पादक्खणे निरोधसमापन्नानं असञ्ञसत्तानं तेसं वचीसङ्खारो च न निरुज्झति चित्तसङ्खारो च न निरुज्झति.

(ख) यस्स वा पन…पे…? आमन्ता.

(ङ) पच्चनीकओकासा

८५. यत्थ कायसङ्खारो न निरुज्झति…पे….

(च) पच्चनीकपुग्गलोकासा

८६. यस्स यत्थ कायसङ्खारो न निरुज्झति तस्स तत्थ वचीसङ्खारो न निरुज्झतीति?

विना अस्सासपस्सासेहि वितक्कविचारानं भङ्गक्खणे तेसं तत्थ कायसङ्खारो न निरुज्झति, नो च तेसं तत्थ वचीसङ्खारो न निरुज्झति. सब्बेसं चित्तस्स उप्पादक्खणे विना अस्सासपस्सासेहि अवितक्कअविचारचित्तस्स भङ्गक्खणे असञ्ञसत्तानं तेसं तत्थ कायसङ्खारो च न निरुज्झति वचीसङ्खारो च न निरुज्झति.

यस्स वा पन यत्थ वचीसङ्खारो न निरुज्झति…पे….

(यस्सकम्पि यस्सयत्थकम्पि सदिसं वित्थारेतब्बं, यस्सयत्थके निरोधसमापन्नानन्ति न कातब्बं.)