(५) पच्चुप्पन्नानागतवारो

(क) अनुलोमपुग्गलो

१५४. (क) यस्स दुक्खसच्चं उप्पज्जति तस्स समुदयसच्चं निरुज्झिस्सतीति?

अग्गमग्गस्स उप्पादक्खणे अरहन्तानं चित्तस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे तेसं दुक्खसच्चं उप्पज्जति, नो च तेसं समुदयसच्चं निरुज्झिस्सति. इतरेसं उपपज्जन्तानं पवत्ते चित्तस्स उप्पादक्खणे तेसं दुक्खसच्चञ्च उप्पज्जति समुदयसच्चञ्च निरुज्झिस्सति.

(ख) यस्स वा पन समुदयसच्चं निरुज्झिस्सति तस्स दुक्खसच्चं उप्पज्जतीति?

सब्बेसं चवन्तानं पवत्ते चित्तस्स भङ्गक्खणे अरूपे मग्गस्स च फलस्स च उप्पादक्खणे तेसं समुदयसच्चं निरुज्झिस्सति, नो च तेसं दुक्खसच्चं उप्पज्जति. सब्बेसं उपपज्जन्तानं पवत्ते चित्तस्स उप्पादक्खणे तेसं समुदयसच्चञ्च निरुज्झिस्सति दुक्खसच्चञ्च उप्पज्जति.

(क) यस्स दुक्खसच्चं उप्पज्जति तस्स मग्गसच्चं निरुज्झिस्सतीति?

अरहन्तानं चित्तस्स उप्पादक्खणे ये च पुथुज्जना मग्गं न पटिलभिस्सन्ति तेसं उपपज्जन्तानं पवत्ते चित्तस्स उप्पादक्खणे तेसं दुक्खसच्चं उप्पज्जति, नो च तेसं मग्गसच्चं निरुज्झिस्सति. अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे ये चञ्ञे मग्गं पटिलभिस्सन्ति तेसं उपपज्जन्तानं पवत्ते चित्तस्स उप्पादक्खणे तेसं दुक्खसच्चञ्च उप्पज्जति मग्गसच्चञ्च निरुज्झिस्सति.

(ख) यस्स वा पन मग्गसच्चं निरुज्झिस्सति तस्स दुक्खसच्चं उप्पज्जतीति?

यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे ये चञ्ञे मग्गं पटिलभिस्सन्ति तेसं चवन्तानं पवत्ते चित्तस्स भङ्गक्खणे अरूपे मग्गस्स च फलस्स च उप्पादक्खणे तेसं मग्गसच्चं निरुज्झिस्सति, नो च तेसं दुक्खसच्चं उप्पज्जति. अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे ये चञ्ञे मग्गं पटिलभिस्सन्ति तेसं उपपज्जन्तानं पवत्ते चित्तस्स उप्पादक्खणे तेसं मग्गसच्चञ्च निरुज्झिस्सति दुक्खसच्चञ्च उप्पज्जति.

१५५. (क) यस्स समुदयसच्चं उप्पज्जति तस्स मग्गसच्चं निरुज्झिस्सतीति?

ये पुथुज्जना मग्गं न पटिलभिस्सन्ति तेसं तण्हाय उप्पादक्खणे तेसं समुदयसच्चं उप्पज्जति, नो च तेसं मग्गसच्चं निरुज्झिस्सति. ये मग्गं पटिलभिस्सन्ति तेसं तण्हाय उप्पादक्खणे तेसं समुदयसच्चञ्च उप्पज्जति मग्गसच्चञ्च निरुज्झिस्सति.

(ख) यस्स वा पन मग्गसच्चं निरुज्झिस्सति तस्स समुदयसच्चं उप्पज्जतीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति ये चञ्ञे मग्गं पटिलभिस्सन्ति तेसं तण्हाय भङ्गक्खणे तण्हाविप्पयुत्तचित्ते वत्तमाने निरोधसमापन्नानं असञ्ञसत्तानं तेसं मग्गसच्चं निरुज्झिस्सति, नो च तेसं समुदयसच्चं उप्पज्जति. ये मग्गं पटिलभिस्सन्ति तेसं तण्हाय उप्पादक्खणे तेसं मग्गसच्चञ्च निरुज्झिस्सति समुदयसच्चञ्च उप्पज्जति.

(ख) अनुलोमओकासो

१५६. यत्थ दुक्खसच्चं उप्पज्जति…पे….

(ग) अनुलोमपुग्गलोकासा

१५७. (क) यस्स यत्थ दुक्खसच्चं उप्पज्जति तस्स तत्थ समुदयसच्चं निरुज्झिस्सतीति?

अग्गमग्गस्स उप्पादक्खणे अरहन्तानं चित्तस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे असञ्ञसत्तं उपपज्जन्तानं तेसं तत्थ दुक्खसच्चं…पे… इतरेसं चतुवोकारं पञ्चवोकारं उपपज्जन्तानं पवत्ते चित्तस्स उप्पादक्खणे तेसं तत्थ दुक्खसच्चं…पे….

(ख) यस्स वा पन यत्थ समुदयसच्चं निरुज्झिस्सति तस्स तत्थ दुक्खसच्चं उप्पज्जतीति?

चतुवोकारा पञ्चवोकारा चवन्तानं पवत्ते चित्तस्स भङ्गक्खणे अरूपे मग्गस्स च फलस्स च उप्पादक्खणे तेसं तत्थ समुदयसच्चं निरुज्झिस्सति, नो च तेसं तत्थ दुक्खसच्चं उप्पज्जति. चतुवोकारं पञ्चवोकारं उपपज्जन्तानं पवत्ते चित्तस्स उप्पादक्खणे तेसं तत्थ समुदयसच्चञ्च निरुज्झिस्सति दुक्खसच्चञ्च उप्पज्जति.

(क) यस्स यत्थ दुक्खसच्चं उप्पज्जति तस्स तत्थ मग्गसच्चं निरुज्झिस्सतीति?

अरहन्तानं चित्तस्स उप्पादक्खणे आपायिकानं ये च पुथुज्जना मग्गं न पटिलभिस्सन्ति तेसं उपपज्जन्तानं पवत्ते चित्तस्स उप्पादक्खणे असञ्ञसत्तं उपपज्जन्तानं तेसं तत्थ दुक्खसच्चं उप्पज्जति, नो च तेसं तत्थ मग्गसच्चं निरुज्झिस्सति. अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे ये चञ्ञे मग्गं पटिलभिस्सन्ति तेसं उपपज्जन्तानं पवत्ते चित्तस्स उप्पादक्खणे तेसं तत्थ दुक्खसच्चञ्च उप्पज्जति मग्गसच्चञ्च निरुज्झिस्सति.

(ख) यस्स वा पन यत्थ मग्गसच्चं निरुज्झिस्सति तस्स तत्थ दुक्खसच्चं उप्पज्जतीति?

यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे ये चञ्ञे मग्गं पटिलभिस्सन्ति तेसं चवन्तानं पवत्ते चित्तस्स भङ्गक्खणे अरूपे मग्गस्स च फलस्स च उप्पादक्खणे तेसं तत्थ मग्गसच्चं निरुज्झिस्सति, नो च तेसं तत्थ दुक्खसच्चं उप्पज्जति. अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे ये चञ्ञे मग्गं पटिलभिस्सन्ति तेसं उपपज्जन्तानं पवत्ते चित्तस्स उप्पादक्खणे तेसं तत्थ मग्गसच्चञ्च निरुज्झिस्सति दुक्खसच्चञ्च उप्पज्जति.

१५८. (क) यस्स यत्थ समुदयसच्चं उप्पज्जति तस्स तत्थ मग्गसच्चं निरुज्झिस्सतीति?

आपायिकानं ये च पुथुज्जना मग्गं न पटिलभिस्सन्ति तेसं तण्हाय उप्पादक्खणे तेसं तत्थ समुदयसच्चं उप्पज्जति, नो च तेसं तत्थ मग्गसच्चं निरुज्झिस्सति. ये मग्गं पटिलभिस्सन्ति तेसं तण्हाय उप्पादक्खणे तेसं तत्थ समुदयसच्चञ्च उप्पज्जति मग्गसच्चञ्च निरुज्झिस्सति.

(ख) यस्स वा पन यत्थ मग्गसच्चं निरुज्झिस्सति तस्स तत्थ समुदयसच्चं उप्पज्जतीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति ये चञ्ञे मग्गं पटिलभिस्सन्ति तेसं तण्हाय भङ्गक्खणे तण्हाविप्पयुत्तचित्ते वत्तमाने तेसं तत्थ मग्गसच्चं निरुज्झिस्सति, नो च तेसं तत्थ समुदयसच्चं उप्पज्जति. ये मग्गं पटिलभिस्सन्ति तेसं तण्हाय उप्पादक्खणे तेसं तत्थ मग्गसच्चञ्च निरुज्झिस्सति समुदयसच्चञ्च उप्पज्जति.

(घ) पच्चनीकपुग्गलो

१५९. (क) यस्स दुक्खसच्चं नुप्पज्जति तस्स समुदयसच्चं न निरुज्झिस्सतीति?

सब्बेसं चवन्तानं पवत्ते चित्तस्स भङ्गक्खणे अरूपे मग्गस्स च फलस्स च उप्पादक्खणे तेसं दुक्खसच्चं नुप्पज्जति, नो च तेसं समुदयसच्चं न निरुज्झिस्सति. अग्गमग्गस्स भङ्गक्खणे अरहन्तानं चित्तस्स भङ्गक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे अरूपे अग्गमग्गस्स च फलस्स च उप्पादक्खणे तेसं दुक्खसच्चञ्च नुप्पज्जति समुदयसच्चञ्च न निरुज्झिस्सति.

(ख) यस्स वा पन समुदयसच्चं न निरुज्झिस्सति तस्स दुक्खसच्चं नुप्पज्जतीति?

अग्गमग्गस्स उप्पादक्खणे अरहन्तानं चित्तस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे तेसं समुदयसच्चं न निरुज्झिस्सति, नो च तेसं दुक्खसच्चं नुप्पज्जति. अग्गमग्गस्स भङ्गक्खणे अरहन्तानं चित्तस्स भङ्गक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे अरूपे अग्गमग्गस्स च फलस्स च उप्पादक्खणे तेसं समुदयसच्चञ्च न निरुज्झिस्सति दुक्खसच्चञ्च नुप्पज्जति.

(क) यस्स दुक्खसच्चं नुप्पज्जति तस्स मग्गसच्चं न निरुज्झिस्सतीति?

यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे ये चञ्ञे मग्गं पटिलभिस्सन्ति तेसं चवन्तानं पवत्ते चित्तस्स भङ्गक्खणे अरूपे मग्गस्स च फलस्स च उप्पादक्खणे तेसं दुक्खसच्चं नुप्पज्जति, नो च तेसं मग्गसच्चं न निरुज्झिस्सति. अग्गमग्गस्स भङ्गक्खणे अरहन्तानं चित्तस्स भङ्गक्खणे ये च पुथुज्जना मग्गं न पटिलभिस्सन्ति तेसं चवन्तानं पवत्ते चित्तस्स भङ्गक्खणे अरूपे अग्गफलस्स उप्पादक्खणे तेसं दुक्खसच्चञ्च नुप्पज्जति मग्गसच्चञ्च न निरुज्झिस्सति.

(ख) यस्स वा पन मग्गसच्चं न निरुज्झिस्सति तस्स दुक्खसच्चं नुप्पज्जतीति?

अरहन्तानं चित्तस्स उप्पादक्खणे ये च पुथुज्जना मग्गं न पटिलभिस्सन्ति तेसं उपपज्जन्तानं पवत्ते चित्तस्स उप्पादक्खणे तेसं मग्गसच्चं न निरुज्झिस्सति, नो च तेसं दुक्खसच्चं नुप्पज्जति. अग्गमग्गस्स भङ्गक्खणे अरहन्तानं चित्तस्स भङ्गक्खणे ये च पुथुज्जना मग्गं न पटिलभिस्सन्ति तेसं चवन्तानं पवत्ते चित्तस्स भङ्गक्खणे अरूपे अग्गफलस्स उप्पादक्खणे तेसं मग्गसच्चञ्च न निरुज्झिस्सति दुक्खसच्चञ्च नुप्पज्जति.

१६०. (क) यस्स समुदयसच्चं नुप्पज्जति तस्स मग्गसच्चं न निरुज्झिस्सतीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति ये चञ्ञे मग्गं पटिलभिस्सन्ति तेसं तण्हाय भङ्गक्खणे तण्हाविप्पयुत्तचित्ते वत्तमाने निरोधसमापन्नानं असञ्ञसत्तानं तेसं समुदयसच्चं नुप्पज्जति, नो च तेसं मग्गसच्चं न निरुज्झिस्सति. अग्गमग्गस्स भङ्गक्खणे अरहन्तानं ये च पुथुज्जना मग्गं न पटिलभिस्सन्ति तेसं तण्हाय भङ्गक्खणे तण्हाविप्पयुत्तचित्ते वत्तमाने तेसं समुदयसच्चञ्च नुप्पज्जति मग्गसच्चञ्च न निरुज्झिस्सति.

(ख) यस्स वा पन मग्गसच्चं न निरुज्झिस्सति तस्स समुदयसच्चं नुप्पज्जतीति?

ये पुथुज्जना मग्गं न पटिलभिस्सन्ति तेसं तण्हाय उप्पादक्खणे तेसं मग्गसच्चं न निरुज्झिस्सति, नो च तेसं समुदयसच्चं नुप्पज्जति. अग्गमग्गस्स भङ्गक्खणे अरहन्तानं ये च पुथुज्जना मग्गं न पटिलभिस्सन्ति तेसं तण्हाय भङ्गक्खणे तण्हाविप्पयुत्तचित्ते वत्तमाने तेसं मग्गसच्चञ्च न निरुज्झिस्सति समुदयसच्चञ्च नुप्पज्जति.

(ङ) पच्चनीकओकासो

१६१. यत्थ दुक्खसच्चं नुप्पज्जति…पे….

(च) पच्चनीकपुग्गलोकासा

१६२. (क) यस्स यत्थ दुक्खसच्चं नुप्पज्जति तस्स तत्थ समुदयसच्चं न निरुज्झिस्सतीति?

चतुवोकारा पञ्चवोकारा चवन्तानं पवत्ते चित्तस्स भङ्गक्खणे अरूपे मग्गस्स च फलस्स च उप्पादक्खणे तेसं तत्थ दुक्खसच्चं नुप्पज्जति, नो च तेसं तत्थ समुदयसच्चं न निरुज्झिस्सति. अग्गमग्गस्स भङ्गक्खणे अरहन्तानं चित्तस्स भङ्गक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे अरूपे अग्गमग्गस्स च फलस्स च उप्पादक्खणे असञ्ञसत्ता चवन्तानं तेसं तत्थ दुक्खसच्चञ्च नुप्पज्जति समुदयसच्चञ्च न निरुज्झिस्सति.

(ख) यस्स वा पन यत्थ समुदयसच्चं न निरुज्झिस्सति तस्स तत्थ दुक्खसच्चं नुप्पज्जतीति?

अग्गमग्गस्स उप्पादक्खणे अरहन्तानं चित्तस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे असञ्ञसत्तं उपपज्जन्तानं तेसं तत्थ समुदयसच्चं न निरुज्झिस्सति, नो च तेसं तत्थ दुक्खसच्चं नुप्पज्जति. अग्गमग्गस्स भङ्गक्खणे अरहन्तानं चित्तस्स भङ्गक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे अरूपे अग्गमग्गस्स च फलस्स च उप्पादक्खणे असञ्ञसत्ता चवन्तानं तेसं तत्थ समुदयसच्चञ्च न निरुज्झिस्सति दुक्खसच्चञ्च नुप्पज्जति.

(क) यस्स यत्थ दुक्खसच्चं नुप्पज्जति तस्स तत्थ मग्गसच्चं न निरुज्झिस्सतीति?

यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे ये चञ्ञे मग्गं पटिलभिस्सन्ति तेसं चवन्तानं पवत्ते चित्तस्स भङ्गक्खणे अरूपे मग्गस्स च फलस्स च उप्पादक्खणे तेसं तत्थ दुक्खसच्चं नुप्पज्जति, नो च तेसं तत्थ मग्गसच्चं न निरुज्झिस्सति. अग्गमग्गस्स भङ्गक्खणे अरहन्तानं चित्तस्स भङ्गक्खणे आपायिकानं ये च पुथुज्जना मग्गं न पटिलभिस्सन्ति तेसं चवन्तानं पवत्ते चित्तस्स भङ्गक्खणे अरूपे अग्गफलस्स उप्पादक्खणे असञ्ञसत्ता [अपाया असञ्ञसत्ता (स्या.)] चवन्तानं तेसं तत्थ दुक्खसच्चञ्च नुप्पज्जति मग्गसच्चञ्च न निरुज्झिस्सति.

(ख) यस्स वा पन यत्थ मग्गसच्चं न निरुज्झिस्सति तस्स तत्थ दुक्खसच्चं नुप्पज्जतीति?

अरहन्तानं चित्तस्स उप्पादक्खणे आपायिकानं ये च पुथुज्जना मग्गं न पटिलभिस्सन्ति तेसं उपपज्जन्तानं पवत्ते चित्तस्स उप्पादक्खणे असञ्ञसत्तं [अपायं असञ्ञसत्तं (स्या.)] उपपज्जन्तानं तेसं तत्थ मग्गसच्चं न निरुज्झिस्सति, नो च तेसं तत्थ दुक्खसच्चं नुप्पज्जति. अग्गमग्गस्स भङ्गक्खणे अरहन्तानं चित्तस्स भङ्गक्खणे आपायिकानं ये च पुथुज्जना मग्गं न पटिलभिस्सन्ति तेसं चवन्तानं पवत्ते चित्तस्स भङ्गक्खणे अरूपे अग्गफलस्स उप्पादक्खणे असञ्ञसत्ता चवन्तानं तेसं तत्थ मग्गसच्चञ्च न निरुज्झिस्सति दुक्खसच्चञ्च नुप्पज्जति.

१६३. (क) यस्स यत्थ समुदयसच्चं नुप्पज्जति तस्स तत्थ मग्गसच्चं न निरुज्झिस्सतीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति ये चञ्ञे मग्गं पटिलभिस्सन्ति तेसं तण्हाय भङ्गक्खणे तण्हाविप्पयुत्तचित्ते वत्तमाने तेसं तत्थ समुदयसच्चं नुप्पज्जति, नो च तेसं तत्थ मग्गसच्चं न निरुज्झिस्सति. अग्गमग्गस्स भङ्गक्खणे अरहन्तानं आपायिकानं ये च पुथुज्जना मग्गं न पटिलभिस्सन्ति तेसं तण्हाय भङ्गक्खणे तण्हाविप्पयुत्तचित्ते वत्तमाने असञ्ञसत्तानं तेसं तत्थ समुदयसच्चञ्च नुप्पज्जति मग्गसच्चञ्च न निरुज्झिस्सति.

(ख) यस्स वा पन यत्थ मग्गसच्चं न निरुज्झिस्सति तस्स तत्थ समुदयसच्चं नुप्पज्जतीति?

आपायिकानं ये च पुथुज्जना मग्गं न पटिलभिस्सन्ति तेसं तण्हाय उप्पादक्खणे तेसं तत्थ मग्गसच्चं न निरुज्झिस्सति, नो च तेसं तत्थ समुदयसच्चं नुप्पज्जति. अग्गमग्गस्स भङ्गक्खणे अरहन्तानं आपायिकानं ये च पुथुज्जना मग्गं न पटिलभिस्सन्ति तेसं तण्हाय भङ्गक्खणे तण्हाविप्पयुत्तचित्ते वत्तमाने असञ्ञसत्तानं तेसं तत्थ मग्गसच्चञ्च न निरुज्झिस्सति समुदयसच्चञ्च नुप्पज्जति.