(३) अनागतवारो

(क) अनुलोमपुग्गलो

१४५. (क) यस्स दुक्खसच्चं उप्पज्जिस्सति तस्स समुदयसच्चं निरुज्झिस्सतीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति तेसं दुक्खसच्चं उप्पज्जिस्सति, नो च तेसं समुदयसच्चं निरुज्झिस्सति. इतरेसं तेसं दुक्खसच्चञ्च उप्पज्जिस्सति समुदयसच्चञ्च निरुज्झिस्सति.

(ख) यस्स वा पन…पे…? आमन्ता.

(क) यस्स दुक्खसच्चं उप्पज्जिस्सति तस्स मग्गसच्चं निरुज्झिस्सतीति?

अग्गमग्गस्स भङ्गक्खणे अरहन्तानं ये च पुथुज्जना मग्गं न पटिलभिस्सन्ति तेसं दुक्खसच्चं उप्पज्जिस्सति, नो च तेसं मग्गसच्चं निरुज्झिस्सति. अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति ये चञ्ञे मग्गं पटिलभिस्सन्ति तेसं दुक्खसच्चञ्च उप्पज्जिस्सति मग्गसच्चञ्च निरुज्झिस्सति.

(ख) यस्स वा पन…पे…? आमन्ता.

१४६. (क) यस्स समुदयसच्चं उप्पज्जिस्सति तस्स मग्गसच्चं निरुज्झिस्सतीति?

ये पुथुज्जना मग्गं न पटिलभिस्सन्ति तेसं समुदयसच्चं उप्पज्जिस्सति, नो च तेसं मग्गसच्चं निरुज्झिस्सति. ये मग्गं पटिलभिस्सन्ति तेसं समुदयसच्चञ्च उप्पज्जिस्सति मग्गसच्चञ्च निरुज्झिस्सति.

(ख) यस्स वा पन मग्गसच्चं निरुज्झिस्सति तस्स समुदयसच्चं उप्पज्जिस्सतीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तेसं मग्गसच्चं निरुज्झिस्सति, नो च तेसं समुदयसच्चं उप्पज्जिस्सति. ये मग्गं पटिलभिस्सन्ति तेसं मग्गसच्चञ्च निरुज्झिस्सति समुदयसच्चञ्च उप्पज्जिस्सति.

(ख) अनुलोमओकासो

१४७. यत्थ दुक्खसच्चं उप्पज्जिस्सति…पे….

(ग) अनुलोमपुग्गलोकासा

१४८. यस्स यत्थ दुक्खसच्चं उप्पज्जिस्सति तस्स तत्थ समुदयसच्चं निरुज्झिस्सतीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति असञ्ञसत्तानं तेसं तत्थ …पे… इतरेसं चतुवोकारानं पञ्चवोकारानं तेसं तत्थ…पे…. (यस्सकम्पि यस्सयत्थकम्पि सदिसं).

(घ) पच्चनीकपुग्गलो

१४९. (क) यस्स दुक्खसच्चं नुप्पज्जिस्सति तस्स समुदयसच्चं न निरुज्झिस्सतीति? आमन्ता.

(ख) यस्स वा पन समुदयसच्चं न निरुज्झिस्सति तस्स दुक्खसच्चं नुप्पज्जिस्सतीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति तेसं समुदयसच्चं न निरुज्झिस्सति, नो च तेसं दुक्खसच्चं नुप्पज्जिस्सति. पच्छिमचित्तसमङ्गीनं तेसं समुदयसच्चञ्च न निरुज्झिस्सति दुक्खसच्चञ्च नुप्पज्जिस्सति.

(क) यस्स दुक्खसच्चं नुप्पज्जिस्सति तस्स मग्गसच्चं न निरुज्झिस्सतीति? आमन्ता.

(ख) यस्स वा पन मग्गसच्चं न निरुज्झिस्सति तस्स दुक्खसच्चं नुप्पज्जिस्सतीति?

अग्गमग्गस्स भङ्गक्खणे अरहन्तानं ये च पुथुज्जना मग्गं न पटिलभिस्सन्ति तेसं मग्गसच्चं न निरुज्झिस्सति, नो च तेसं दुक्खसच्चं नुप्पज्जिस्सति. पच्छिमचित्तसमङ्गीनं तेसं मग्गसच्चञ्च न निरुज्झिस्सति दुक्खसच्चञ्च नुप्पज्जिस्सति.

१५०. (क) यस्स समुदयसच्चं नुप्पज्जिस्सति तस्स मग्गसच्चं न निरुज्झिस्सतीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तेसं समुदयसच्चं नुप्पज्जिस्सति, नो च तेसं मग्गसच्चं न निरुज्झिस्सति. अग्गमग्गस्स भङ्गक्खणे अरहन्तानं तेसं समुदयसच्चञ्च नुप्पज्जिस्सति मग्गसच्चञ्च न निरुज्झिस्सति.

(ख) यस्स वा पन मग्गसच्चं न निरुज्झिस्सति तस्स समुदयसच्चं नुप्पज्जिस्सतीति?

ये पुथुज्जना मग्गं न पटिलभिस्सन्ति तेसं मग्गसच्चं न निरुज्झिस्सति, नो च तेसं समुदयसच्चं नुप्पज्जिस्सति. अग्गमग्गस्स भङ्गक्खणे अरहन्तानं तेसं मग्गसच्चञ्च न निरुज्झिस्सति समुदयसच्चञ्च नुप्पज्जिस्सति.

(ङ) पच्चनीकओकासो

१५१. यत्थ दुक्खसच्चं नुप्पज्जिस्सति…पे….

(च) पच्चनीकपुग्गलोकासा

१५२. यस्स यत्थ दुक्खसच्चं नुप्पज्जिस्सति…पे….

(यस्सकम्पि यस्सयत्थकम्पि सदिसं, समुदयसच्चं मग्गसच्चं नानाकरणं, अग्गमग्गस्स भङ्गक्खणे, अरहन्तानं असञ्ञसत्तानं तेसं तत्थ मग्गसच्चञ्च न निरुज्झिस्सति समुदयसच्चञ्च नुप्पज्जिस्सति).