(१) पच्चुप्पन्नवारो

(क) अनुलोमपुग्गलो

१३६. (क) यस्स दुक्खसच्चं उप्पज्जति तस्स समुदयसच्चं निरुज्झतीति? नो.

(ख) यस्स वा पन समुदयसच्चं निरुज्झति तस्स दुक्खसच्चं उप्पज्जतीति? नो.

(क) यस्स दुक्खसच्चं उप्पज्जति तस्स मग्गसच्चं निरुज्झतीति? नो.

(ख) यस्स वा पन मग्गसच्चं निरुज्झति तस्स दुक्खसच्चं उप्पज्जतीति? नो.

१३७. (क) यस्स समुदयसच्चं उप्पज्जति तस्स मग्गसच्चं निरुज्झतीति? नो.

(ख) यस्स वा पन मग्गसच्चं निरुज्झति तस्स समुदयसच्चं उप्पज्जतीति? नो.

(ख) अनुलोमओकासो

१३८. यत्थ दुक्खसच्चं उप्पज्जति तत्थ समुदयसच्चं निरुज्झतीति?

असञ्ञसत्ते तत्थ दुक्खसच्चं उप्पज्जति, नो च तत्थ समुदयसच्चं निरुज्झति…पे….

(यत्थकं उप्पादवारेपि निरोधवारेपि उप्पादनिरोधवारेपि सदिसं नत्थि नानाकरणं).

(ग) अनुलोमपुग्गलोकासा

१३९. यस्स यत्थ दुक्खसच्चं उप्पज्जति तस्स तत्थ समुदयसच्चं निरुज्झतीति? नो.

(यस्सकम्पि यस्सयत्थकम्पि सदिसं).

(घ) पच्चनीकपुग्गलो

१४०. (क) यस्स दुक्खसच्चं नुप्पज्जति तस्स समुदयसच्चं न निरुज्झतीति?

तण्हाय भङ्गक्खणे तेसं दुक्खसच्चं नुप्पज्जति, नो च तेसं समुदयसच्चं न निरुज्झति. सब्बेसं चवन्तानं पवत्ते तण्हाविप्पयुत्तचित्तस्स भङ्गक्खणे अरूपे मग्गस्स च फलस्स च उप्पादक्खणे तेसं दुक्खसच्चञ्च नुप्पज्जति समुदयसच्चञ्च न निरुज्झति.

(ख) यस्स वा पन समुदयसच्चं न निरुज्झति तस्स दुक्खसच्चं नुप्पज्जतीति?

सब्बेसं उपपज्जन्तानं पवत्ते चित्तस्स उप्पादक्खणे तेसं समुदयसच्चं न निरुज्झति, नो च तेसं दुक्खसच्चं नुप्पज्जति. सब्बेसं चवन्तानं पवत्ते तण्हाविप्पयुत्तचित्तस्स भङ्गक्खणे अरूपे मग्गस्स च फलस्स च उप्पादक्खणे तेसं समुदयसच्चञ्च न निरुज्झति दुक्खसच्चञ्च नुप्पज्जति.

(क) यस्स दुक्खसच्चं नुप्पज्जति तस्स मग्गसच्चं न निरुज्झतीति?

मग्गस्स भङ्गक्खणे तेसं दुक्खसच्चं नुप्पज्जति, नो च तेसं मग्गसच्चं न निरुज्झति. सब्बेसं चवन्तानं पवत्ते मग्गविप्पयुत्तचित्तस्स भङ्गक्खणे अरूपे मग्गस्स च फलस्स च उप्पादक्खणे तेसं दुक्खसच्चञ्च नुप्पज्जति मग्गसच्चञ्च न निरुज्झति.

(ख) यस्स वा पन मग्गसच्चं न निरुज्झति तस्स दुक्खसच्चं नुप्पज्जतीति?

सब्बेसं उपपज्जन्तानं पवत्ते चित्तस्स उप्पादक्खणे तेसं मग्गसच्चं न निरुज्झति, नो च तेसं दुक्खसच्चं नुप्पज्जति. सब्बेसं चवन्तानं पवत्ते मग्गविप्पयुत्तचित्तस्स भङ्गक्खणे अरूपे मग्गस्स च फलस्स च उप्पादक्खणे तेसं मग्गसच्चञ्च न निरुज्झति दुक्खसच्चञ्च नुप्पज्जति.

१४१. (क) यस्स समुदयसच्चं नुप्पज्जति तस्स मग्गसच्चं न निरुज्झतीति?

मग्गस्स भङ्गक्खणे तेसं समुदयसच्चं नुप्पज्जति, नो च तेसं मग्गसच्चं न निरुज्झति. तण्हाविप्पयुत्तचित्तस्स उप्पादक्खणे मग्गविप्पयुत्तचित्तस्स भङ्गक्खणे निरोधसमापन्नानं असञ्ञसत्तानं तेसं समुदयसच्चञ्च नुप्पज्जति मग्गसच्चञ्च न निरुज्झति.

(ख) यस्स वा पन मग्गसच्चं न निरुज्झति तस्स समुदयसच्चं नुप्पज्जतीति?

तण्हाय उप्पादक्खणे तेसं मग्गसच्चं न निरुज्झति, नो च तेसं समुदयसच्चं नुप्पज्जति. मग्गविप्पयुत्तचित्तस्स भङ्गक्खणे तण्हाविप्पयुत्तचित्तस्स उप्पादक्खणे निरोधसमापन्नानं असञ्ञसत्तानं तेसं मग्गसच्चञ्च न निरुज्झति समुदयसच्चञ्च नुप्पज्जति.

(ङ) पच्चनीकओकासो

१४२. यत्थ दुक्खसच्चं नुप्पज्जति…पे….

(च) पच्चनीकपुग्गलोकासा

१४३. यस्स यत्थ दुक्खसच्चं नुप्पज्जति…पे….

(यस्सकम्पि यस्सयत्थकम्पि सदिसं, यस्सयत्थकेपि निरोधसमापन्नानन्ति न कातब्बं).