(१) पच्चुप्पन्नवारो

(क) अनुलोमपुग्गलो

८८. (क) यस्स दुक्खसच्चं निरुज्झति तस्स समुदयसच्चं निरुज्झतीति?

सब्बेसं चवन्तानं पवत्ते तण्हाविप्पयुत्तचित्तस्स भङ्गक्खणे तेसं दुक्खसच्चं निरुज्झति, नो च तेसं समुदयसच्चं निरुज्झति. तण्हाय भङ्गक्खणे तेसं दुक्खसच्चञ्च निरुज्झति समुदयसच्चञ्च निरुज्झति.

(ख) यस्स वा पन समुदयसच्चं निरुज्झति तस्स दुक्खसच्चं निरुज्झतीति? आमन्ता.

(क) यस्स दुक्खसच्चं निरुज्झति तस्स मग्गसच्चं निरुज्झतीति?

सब्बेसं चवन्तानं पवत्ते मग्गविप्पयुत्तचित्तस्स भङ्गक्खणे तेसं दुक्खसच्चं निरुज्झति, नो च तेसं मग्गसच्चं निरुज्झति. पञ्चवोकारे मग्गस्स भङ्गक्खणे तेसं दुक्खसच्चञ्च निरुज्झति मग्गसच्चञ्च निरुज्झति.

(ख) यस्स वा पन मग्गसच्चं निरुज्झति तस्स दुक्खसच्चं निरुज्झतीति?

अरूपे मग्गस्स भङ्गक्खणे तेसं मग्गसच्चं निरुज्झति, नो च तेसं दुक्खसच्चं निरुज्झति. पञ्चवोकारे मग्गस्स भङ्गक्खणे तेसं मग्गसच्चञ्च निरुज्झति दुक्खसच्चञ्च निरुज्झति.

८९. (क) यस्स समुदयसच्चं निरुज्झति तस्स मग्गसच्चं निरुज्झतीति? नो.

(ख) यस्स वा पन मग्गसच्चं निरुज्झति तस्स समुदयसच्चं निरुज्झतीति? नो.

(ख) अनुलोमओकासो

९०. यत्थ दुक्खसच्चं निरुज्झति तत्थ समुदयसच्चं निरुज्झतीति?

असञ्ञसत्ते तत्थ दुक्खसच्चं निरुज्झति…पे….

(यत्थकं उप्पादेपि निरोधेपि उप्पादनिरोधेपि सदिसं, नत्थि नानाकरणं).

(ग) अनुलोमपुग्गलोकासा

९१. यस्स यत्थ दुक्खसच्चं निरुज्झति…पे….

(यस्सयत्थकम्पि सदिसं वित्थारेतब्बं).

(घ) पच्चनीकपुग्गलो

९२. (क) यस्स दुक्खसच्चं न निरुज्झति तस्स समुदयसच्चं न निरुज्झतीति? आमन्ता.

(ख) यस्स वा पन समुदयसच्चं न निरुज्झति तस्स दुक्खसच्चं न निरुज्झतीति?

सब्बेसं चवन्तानं पवत्ते तण्हाविप्पयुत्तचित्तस्स भङ्गक्खणे तेसं समुदयसच्चं न निरुज्झति, नो च तेसं दुक्खसच्चं न निरुज्झति. सब्बेसं उपपज्जन्तानं पवत्ते चित्तस्स उप्पादक्खणे अरूपे मग्गस्स च फलस्स च भङ्गक्खणे तेसं समुदयसच्चञ्च न निरुज्झति दुक्खसच्चञ्च न निरुज्झति.

(क) यस्स दुक्खसच्चं न निरुज्झति तस्स मग्गसच्चं न निरुज्झतीति?

अरूपे मग्गस्स भङ्गक्खणे तेसं दुक्खसच्चं न निरुज्झति, नो च तेसं मग्गसच्चं न निरुज्झति. सब्बेसं उपपज्जन्तानं पवत्ते चित्तस्स उप्पादक्खणे अरूपे फलस्स भङ्गक्खणे तेसं दुक्खसच्चञ्च न निरुज्झति मग्गसच्चञ्च न निरुज्झति.

(ख) यस्स वा पन मग्गसच्चं न निरुज्झति तस्स दुक्खसच्चं न निरुज्झतीति?

सब्बेसं चवन्तानं पवत्ते मग्गविप्पयुत्तचित्तस्स भङ्गक्खणे तेसं मग्गसच्चं न निरुज्झति, नो च तेसं दुक्खसच्चं न निरुज्झति. सब्बेसं उपपज्जन्तानं पवत्ते चित्तस्स उप्पादक्खणे अरूपे फलस्स भङ्गक्खणे तेसं मग्गसच्चञ्च न निरुज्झति दुक्खसच्चञ्च न निरुज्झति.

९३. (क) यस्स समुदयसच्चं न निरुज्झति तस्स मग्गसच्चं न निरुज्झतीति?

मग्गस्स भङ्गक्खणे तेसं समुदयसच्चं न निरुज्झति, नो च तेसं मग्गसच्चं न निरुज्झति. सब्बेसं चित्तस्स उप्पादक्खणे तण्हाविप्पयुत्तमग्गविप्पयुत्तचित्तस्स भङ्गक्खणे निरोधसमापन्नानं असञ्ञसत्तानं तेसं समुदयसच्चञ्च न निरुज्झति मग्गसच्चञ्च न निरुज्झति.

(ख) यस्स वा पन मग्गसच्चं न निरुज्झति तस्स समुदयसच्चं न निरुज्झतीति?

तण्हाय भङ्गक्खणे तेसं मग्गसच्चं न निरुज्झति, नो च तेसं समुदयसच्चं न निरुज्झति. सब्बेसं चित्तस्स उप्पादक्खणे मग्गविप्पयुत्ततण्हाविप्पयुत्तचित्तस्स भङ्गक्खणे निरोधसमापन्नानं असञ्ञसत्तानं तेसं मग्गसच्चञ्च न निरुज्झति समुदयसच्चञ्च न निरुज्झति.

(ङ) पच्चनीकओकासो

९४. यत्थ दुक्खसच्चं न निरुज्झति…पे….

(च) पच्चनीकपुग्गलोकासा

९५. यस्स यत्थ दुक्खसच्चं न निरुज्झति…पे….

(यस्सकम्पि [यस्सकम्पि यत्थकम्पि (सी. स्या.)] यस्सयत्थकम्पि सदिसं, यस्सयत्थकेपि निरोधसमापन्नानन्ति चेतं न कातब्बं).