(६) अतीतानागतवारो

(क) अनुलोमपुग्गलो

१८४. (क) यस्स चक्खायतनं निरुज्झित्थ तस्स सोतायतनं निरुज्झिस्सतीति?

पञ्चवोकारे परिनिब्बन्तानं अरूपे पच्छिमभविकानं ये च अरूपं उपपज्जित्वा परिनिब्बायिस्सन्ति तेसं चवन्तानं तेसं चक्खायतनं निरुज्झित्थ, नो च तेसं सोतायतनं निरुज्झिस्सति. इतरेसं तेसं चक्खायतनञ्च निरुज्झित्थ सोतायतनञ्च निरुज्झिस्सति.

(ख) यस्स वा पन सोतायतनं निरुज्झिस्सति तस्स चक्खायतनं निरुज्झित्थाति? आमन्ता.

(क) यस्स चक्खायतनं निरुज्झित्थ तस्स घानायतनं निरुज्झिस्सतीति?

कामावचरे परिनिब्बन्तानं रूपावचरे अरूपावचरे पच्छिमभविकानं ये च रूपावचरं अरूपावचरं उपपज्जित्वा परिनिब्बायिस्सन्ति तेसं चवन्तानं तेसं चक्खायतनं निरुज्झित्थ, नो च तेसं घानायतनं निरुज्झिस्सति. इतरेसं तेसं चक्खायतनञ्च निरुज्झित्थ घानायतनञ्च निरुज्झिस्सति.

(ख) यस्स वा पन…पे…? आमन्ता.

(क) यस्स चक्खायतनं निरुज्झित्थ तस्स रूपायतनं निरुज्झिस्सतीति?

पञ्चवोकारे परिनिब्बन्तानं अरूपे पच्छिमभविकानं ये च अरूपं उपपज्जित्वा परिनिब्बायिस्सन्ति तेसं चवन्तानं तेसं चक्खायतनं निरुज्झित्थ, नो च तेसं रूपायतनं निरुज्झिस्सति. इतरेसं तेसं चक्खायतनञ्च निरुज्झित्थ रूपायतनञ्च निरुज्झिस्सति.

(ख) यस्स वा पन…पे…? आमन्ता.

यस्स चक्खायतनं निरुज्झित्थ तस्स मनायतनं…पे… धम्मायतनं निरुज्झिस्सतीति?

परिनिब्बन्तानं तेसं चक्खायतनं निरुज्झित्थ, नो च तेसं धम्मायतनं निरुज्झिस्सति. इतरेसं तेसं चक्खायतनञ्च निरुज्झित्थ धम्मायतनञ्च निरुज्झिस्सति. यस्स वा पन…पे…? आमन्ता. (चक्खायतनमूलकं)

१८५. (क) यस्स घानायतनं निरुज्झित्थ तस्स रूपायतनं निरुज्झिस्सतीति?

पञ्चवोकारे परिनिब्बन्तानं अरूपे पच्छिमभविकानं ये च अरूपं उपपज्जित्वा परिनिब्बायिस्सन्ति तेसं चवन्तानं तेसं घानायतनं निरुज्झित्थ, नो च तेसं रूपायतनं निरुज्झिस्सति. इतरेसं तेसं घानायतनञ्च निरुज्झित्थ रूपायतनञ्च निरुज्झिस्सति.

(ख) यस्स वा पन…पे…? आमन्ता.

यस्स घानायतनं निरुज्झित्थ तस्स मनायतनं…पे… धम्मायतनं निरुज्झिस्सतीति?

परिनिब्बन्तानं तेसं घानायतनं निरुज्झित्थ, नो च तेसं धम्मायतनं निरुज्झिस्सति. इतरेसं तेसं घानायतनञ्च निरुज्झित्थ धम्मायतनञ्च निरुज्झिस्सति.

यस्स वा पन…पे…? आमन्ता.

१८६. यस्स रूपायतनं निरुज्झित्थ तस्स मनायतन…पे… धम्मायतनं निरुज्झिस्सतीति?

परिनिब्बन्तानं तेसं रूपायतनं निरुज्झित्थ, नो च तेसं धम्मायतनं निरुज्झिस्सति. इतरेसं तेसं रूपायतनञ्च निरुज्झित्थ धम्मायतनञ्च निरुज्झिस्सति.

(ख) यस्स वा पन…पे…? आमन्ता.

१८७. (क) यस्स मनायतनं निरुज्झित्थ तस्स धम्मायतनं निरुज्झिस्सतीति?

परिनिब्बन्तानं तेसं मनायतनं निरुज्झित्थ, नो च तेसं धम्मायतनं निरुज्झिस्सति. इतरेसं तेसं मनायतनञ्च निरुज्झित्थ धम्मायतनञ्च निरुज्झिस्सति.

(ख) यस्स वा पन…पे…? आमन्ता.

(ख) अनुलोमओकासो

१८८. यत्थ चक्खायतनं निरुज्झित्थ…पे….

(ग) अनुलोमपुग्गलोकासा

१८९. (क) यस्स यत्थ चक्खायतनं निरुज्झित्थ तस्स तत्थ सोतायतनं निरुज्झिस्सतीति?

पञ्चवोकारे परिनिब्बन्तानं तेसं तत्थ चक्खायतनं निरुज्झित्थ, नो च तेसं तत्थ सोतायतनं निरुज्झिस्सति. इतरेसं पञ्चवोकारानं तेसं तत्थ चक्खायतनञ्च निरुज्झित्थ सोतायतनञ्च निरुज्झिस्सति.

(ख) यस्स वा पन यत्थ सोतायतनं निरुज्झिस्सति तस्स तत्थ चक्खायतनं निरुज्झित्थाति?

सुद्धावासं उपपज्जन्तानं तेसं तत्थ सोतायतनं निरुज्झिस्सति, नो च तेसं तत्थ चक्खायतनं निरुज्झित्थ. इतरेसं पञ्चवोकारानं तेसं तत्थ सोतायतनञ्च निरुज्झिस्सति चक्खायतनञ्च निरुज्झित्थ.

(क) यस्स यत्थ चक्खायतनं निरुज्झित्थ तस्स तत्थ घानायतनं निरुज्झिस्सतीति?

कामावचरे परिनिब्बन्तानं रूपावचरानं तेसं तत्थ चक्खायतनं निरुज्झित्थ, नो च तेसं तत्थ घानायतनं निरुज्झिस्सति. इतरेसं कामावचरानं तेसं तत्थ चक्खायतनञ्च निरुज्झित्थ घानायतनञ्च निरुज्झिस्सति.

(ख) यस्स वा पन यत्थ घानायतनं निरुज्झिस्सति तस्स तत्थ चक्खायतनं निरुज्झित्थाति? आमन्ता.

(क) यस्स यत्थ चक्खायतनं निरुज्झित्थ तस्स तत्थ रूपायतनं निरुज्झिस्सतीति?

पञ्चवोकारे परिनिब्बन्तानं तेसं तत्थ चक्खायतनं निरुज्झित्थ, नो च तेसं तत्थ रूपायतनं निरुज्झिस्सति. इतरेसं पञ्चवोकारानं तेसं तत्थ चक्खायतनञ्च निरुज्झित्थ रूपायतनञ्च निरुज्झिस्सति.

(ख) यस्स वा पन यत्थ रूपायतनं निरुज्झिस्सति तस्स तत्थ चक्खायतनं निरुज्झित्थाति?

सुद्धावासं उपपज्जन्तानं असञ्ञसत्तानं तेसं तत्थ रूपायतनं निरुज्झिस्सति, नो च तेसं तत्थ चक्खायतनं निरुज्झित्थ. इतरेसं पञ्चवोकारानं तेसं तत्थ रूपायतनञ्च निरुज्झिस्सति चक्खायतनञ्च निरुज्झित्थ.

(क) यस्स यत्थ चक्खायतनं निरुज्झित्थ तस्स तत्थ मनायतनं निरुज्झिस्सतीति?

पञ्चवोकारे परिनिब्बन्तानं तेसं तत्थ चक्खायतनं निरुज्झित्थ, नो च तेसं तत्थ मनायतनं निरुज्झिस्सति. इतरेसं पञ्चवोकारानं तेसं तत्थ चक्खायतनञ्च निरुज्झित्थ मनायतनञ्च निरुज्झिस्सति.

(ख) यस्स वा पन यत्थ मनायतनं निरुज्झिस्सति तस्स तत्थ चक्खायतनं निरुज्झित्थाति?

सुद्धावासं उपपज्जन्तानं अरूपानं तेसं तत्थ मनायतनं निरुज्झिस्सति, नो च तेसं तत्थ चक्खायतनं निरुज्झित्थ. इतरेसं पञ्चवोकारानं तेसं तत्थ मनायतनञ्च निरुज्झिस्सति चक्खायतनञ्च निरुज्झित्थ.

(क) यस्स यत्थ चक्खायतनं निरुज्झित्थ तस्स तत्थ धम्मायतनं निरुज्झिस्सतीति?

पञ्चवोकारे परिनिब्बन्तानं तेसं तत्थ चक्खायतनं निरुज्झित्थ, नो च तेसं तत्थ धम्मायतनं निरुज्झिस्सति. इतरेसं पञ्चवोकारानं तेसं तत्थ चक्खायतनञ्च निरुज्झित्थ धम्मायतनञ्च निरुज्झिस्सति.

(ख) यस्स वा पन यत्थ धम्मायतनं निरुज्झिस्सति तस्स तत्थ चक्खायतनं निरुज्झित्थाति?

सुद्धावासं उपपज्जन्तानं असञ्ञसत्तानं अरूपानं तेसं तत्थ धम्मायतनं निरुज्झिस्सति, नो च तेसं तत्थ चक्खायतनं निरुज्झित्थ. इतरेसं पञ्चवोकारानं तेसं तत्थ धम्मायतनञ्च निरुज्झिस्सति चक्खायतनञ्च निरुज्झित्थ. (चक्खायतनमूलकं)

१९०. (क) यस्स यत्थ घानायतनं निरुज्झित्थ तस्स तत्थ रूपायतनं निरुज्झिस्सतीति?

कामावचरे परिनिब्बन्तानं तेसं तत्थ घानायतनं निरुज्झित्थ, नो च तेसं तत्थ रूपायतनं निरुज्झिस्सति. इतरेसं कामावचरानं तेसं तत्थ घानायतनञ्च निरुज्झित्थ रूपायतनञ्च निरुज्झिस्सति.

(ख) यस्स वा पन यत्थ रूपायतनं निरुज्झिस्सति तस्स तत्थ घानायतनं निरुज्झित्थाति?

रूपावचरानं तेसं तत्थ रूपायतनं निरुज्झिस्सति, नो च तेसं तत्थ घानायतनं निरुज्झित्थ. कामावचरानं तेसं तत्थ रूपायतनञ्च निरुज्झिस्सति घानायतनञ्च निरुज्झित्थ.

यस्स यत्थ घानायतनं निरुज्झित्थ तस्स तत्थ मनायतनं…पे… धम्मायतनं निरुज्झिस्सतीति?

कामावचरे परिनिब्बन्तानं तेसं तत्थ घानायतनं निरुज्झित्थ, नो च तेसं तत्थ धम्मायतनं निरुज्झिस्सति. इतरेसं कामावचरानं तेसं तत्थ घानायतनञ्च निरुज्झित्थ धम्मायतनञ्च निरुज्झिस्सति.

यस्स वा पन यत्थ धम्मायतनं निरुज्झिस्सति तस्स तत्थ घानायतनं निरुज्झित्थाति?

रूपावचरानं अरूपावचरानं तेसं तत्थ धम्मायतनं निरुज्झिस्सति, नो च तेसं तत्थ घानायतनं निरुज्झित्थ. कामावचरानं तेसं तत्थ धम्मायतनञ्च निरुज्झिस्सति घानायतनञ्च निरुज्झित्थ. (घानायतनमूलकं)

१९१. (क) यस्स यत्थ रूपायतनं निरुज्झित्थ तस्स तत्थ मनायतनं निरुज्झिस्सतीति?

पञ्चवोकारे परिनिब्बन्तानं असञ्ञसत्तानं तेसं तत्थ रूपायतनं निरुज्झित्थ, नो च तेसं तत्थ मनायतनं निरुज्झिस्सति. इतरेसं पञ्चवोकारानं तेसं तत्थ रूपायतनञ्च निरुज्झित्थ मनायतनञ्च निरुज्झिस्सति.

(ख) यस्स वा पन यत्थ मनायतनं निरुज्झिस्सति तस्स तत्थ रूपायतनं निरुज्झित्थाति?

सुद्धावासं उपपज्जन्तानं अरूपानं तेसं तत्थ मनायतनं निरुज्झिस्सति, नो च तेसं तत्थ रूपायतनं निरुज्झित्थ. इतरेसं पञ्चवोकारानं तेसं तत्थ मनायतनञ्च निरुज्झिस्सति रूपायतनञ्च निरुज्झित्थ.

(क) यस्स यत्थ रूपायतनं निरुज्झित्थ तस्स तत्थ धम्मायतनं निरुज्झिस्सतीति?

पञ्चवोकारे परिनिब्बन्तानं तेसं तत्थ रूपायतनं निरुज्झित्थ, नो च तेसं तत्थ धम्मायतनं निरुज्झिस्सति. इतरेसं पञ्चवोकारानं असञ्ञसत्तानं तेसं तत्थ रूपायतनञ्च निरुज्झित्थ धम्मायतनञ्च निरुज्झिस्सति.

(ख) यस्स वा पन यत्थ धम्मायतनं निरुज्झिस्सति तस्स तत्थ रूपायतनं निरुज्झित्थाति?

सुद्धावासं उपपज्जन्तानं अरूपानं तेसं तत्थ धम्मायतनं निरुज्झिस्सति, नो च तेसं तत्थ रूपायतनं निरुज्झित्थ. इतरेसं पञ्चवोकारानं असञ्ञसत्तानं तेसं तत्थ धम्मायतनञ्च निरुज्झिस्सति रूपायतनञ्च निरुज्झित्थ. (रूपायतनमूलकं)

१९२. (क) यस्स यत्थ मनायतनं निरुज्झित्थ तस्स तत्थ धम्मायतनं निरुज्झिस्सतीति?

परिनिब्बन्तानं तेसं तत्थ मनायतनं निरुज्झित्थ, नो च तेसं तत्थ धम्मायतनं निरुज्झिस्सति. इतरेसं चतुवोकारानं पञ्चवोकारानं तेसं तत्थ मनायतनञ्च निरुज्झित्थ धम्मायतनञ्च निरुज्झिस्सति.

(ख) यस्स वा पन यत्थ धम्मायतनं निरुज्झिस्सति तस्स तत्थ मनायतनं निरुज्झित्थाति?

सुद्धावासं उपपज्जन्तानं असञ्ञसत्तानं तेसं तत्थ धम्मायतनं निरुज्झिस्सति, नो च तेसं तत्थ मनायतनं निरुज्झित्थ. इतरेसं चतुवोकारानं पञ्चवोकारानं तेसं तत्थ धम्मायतनञ्च निरुज्झिस्सति मनायतनञ्च निरुज्झित्थ.

(घ) पच्चनीकपुग्गलो

१९३. (क) यस्स चक्खायतनं न निरुज्झित्थ तस्स सोतायतनं न निरुज्झिस्सतीति? नत्थि.

(ख) यस्स वा पन सोतायतनं न निरुज्झिस्सति तस्स चक्खायतनं न निरुज्झित्थाति? निरुज्झित्थ.

यस्स चक्खायतनं…पे… घानायतनं… रूपायतनं… मनायतनं न निरुज्झित्थ तस्स धम्मायतनं न निरुज्झिस्सतीति? नत्थि.

यस्स वा पन धम्मायतनं न निरुज्झिस्सति तस्स मनायतनं न निरुज्झित्थाति? निरुज्झित्थ.

(ङ) पच्चनीकओकासो

१९४. यस्स चक्खायतनं न निरुज्झित्थ…पे….

(च) पच्चनीकपुग्गलोकासा

१९५. (क) यस्स यत्थ चक्खायतनं न निरुज्झित्थ तस्स तत्थ सोतायतनं न निरुज्झिस्सतीति?

सुद्धावासं उपपज्जन्तानं तेसं तत्थ चक्खायतनं न निरुज्झित्थ, नो च तेसं तत्थ सोतायतनं न निरुज्झिस्सति. सुद्धावासे परिनिब्बन्तानं असञ्ञसत्तानं अरूपानं तेसं तत्थ चक्खायतनञ्च न निरुज्झित्थ सोतायतनञ्च न निरुज्झिस्सति.

(ख) यस्स वा पन यत्थ सोतायतनं न निरुज्झिस्सति तस्स तत्थ चक्खायतनं न निरुज्झित्थाति?

पञ्चवोकारे परिनिब्बन्तानं तेसं तत्थ सोतायतनं न निरुज्झिस्सति, नो च तेसं तत्थ चक्खायतनं न निरुज्झित्थ. सुद्धावासे परिनिब्बन्तानं असञ्ञसत्तानं अरूपानं तेसं तत्थ सोतायतनञ्च न निरुज्झिस्सति चक्खायतनञ्च न निरुज्झित्थ.

(क) यस्स यत्थ चक्खायतनं न निरुज्झित्थ तस्स तत्थ घानायतनं न निरुज्झिस्सतीति? आमन्ता.

(ख) यस्स वा पन यत्थ घानायतनं न निरुज्झिस्सति तस्स तत्थ चक्खायतनं न निरुज्झित्थाति?

कामावचरे परिनिब्बन्तानं रूपावचरानं तेसं तत्थ घानायतनं न निरुज्झिस्सति, नो च तेसं तत्थ चक्खायतनं न निरुज्झित्थ. सुद्धावासानं असञ्ञसत्तानं अरूपानं तेसं तत्थ घानायतनञ्च न निरुज्झिस्सति चक्खायतनञ्च न निरुज्झित्थ.

(क) यस्स यत्थ चक्खायतनं न निरुज्झित्थ तस्स तत्थ रूपायतनं न निरुज्झिस्सतीति?

सुद्धावासं उपपज्जन्तानं असञ्ञसत्तानं तेसं तत्थ चक्खायतनं न निरुज्झित्थ, नो च तेसं तत्थ रूपायतनं न निरुज्झिस्सति. सुद्धावासे परिनिब्बन्तानं अरूपानं तेसं तत्थ चक्खायतनञ्च न निरुज्झित्थ रूपायतनञ्च न निरुज्झिस्सति.

(ख) यस्स वा पन यत्थ रूपायतनं न निरुज्झिस्सति तस्स तत्थ चक्खायतनं न निरुज्झित्थाति?

पञ्चवोकारे परिनिब्बन्तानं तेसं तत्थ रूपायतनं न निरुज्झिस्सति, नो च तेसं तत्थ चक्खायतनं न निरुज्झित्थ. सुद्धावासे परिनिब्बन्तानं अरूपानं तेसं तत्थ रूपायतनञ्च न निरुज्झिस्सति चक्खायतनञ्च न निरुज्झित्थ.

(क) यस्स यत्थ चक्खायतनं न निरुज्झित्थ तस्स तत्थ मनायतनं न निरुज्झिस्सतीति?

सुद्धावासं उपपज्जन्तानं अरूपानं तेसं तत्थ चक्खायतनं न निरुज्झित्थ, नो च तेसं तत्थ मनायतनं न निरुज्झिस्सति. सुद्धावासे परिनिब्बन्तानं अरूपे परिनिब्बन्तानं असञ्ञसत्तानं तेसं तत्थ चक्खायतनञ्च न निरुज्झित्थ मनायतनञ्च न निरुज्झिस्सति.

(ख) यस्स वा पन यत्थ मनायतनं न निरुज्झिस्सति तस्स तत्थ चक्खायतनं न निरुज्झित्थाति?

पञ्चवोकारे परिनिब्बन्तानं तेसं तत्थ मनायतनं न निरुज्झिस्सति, नो च तेसं तत्थ चक्खायतनं न निरुज्झित्थ. सुद्धावासे परिनिब्बन्तानं अरूपे परिनिब्बन्तानं असञ्ञसत्तानं तेसं तत्थ मनायतनञ्च न निरुज्झिस्सति, चक्खायतनञ्च न निरुज्झित्थ.

(क) यस्स यत्थ चक्खायतनं न निरुज्झित्थ तस्स तत्थ धम्मायतनं न निरुज्झिस्सतीति?

सुद्धावासं उपपज्जन्तानं असञ्ञसत्तानं अरूपानं तेसं तत्थ चक्खायतनं न निरुज्झित्थ, नो च तेसं तत्थ धम्मायतनं न निरुज्झिस्सति. सुद्धावासे परिनिब्बन्तानं अरूपे परिनिब्बन्तानं तेसं तत्थ चक्खायतनञ्च न निरुज्झित्थ धम्मायतनञ्च न निरुज्झिस्सति.

(ख) यस्स वा पन यत्थ धम्मायतनं न निरुज्झिस्सति तस्स तत्थ चक्खायतनं न निरुज्झित्थाति?

पञ्चवोकारे परिनिब्बन्तानं तेसं तत्थ धम्मायतनं न निरुज्झिस्सति, नो च तेसं तत्थ चक्खायतनं न निरुज्झित्थ. सुद्धावासे परिनिब्बन्तानं अरूपे परिनिब्बन्तानं तेसं तत्थ धम्मायतनञ्च न निरुज्झिस्सति चक्खायतनञ्च न निरुज्झित्थ. (चक्खायतनमूलकं)

१९६. (क) यस्स यत्थ घानायतनं न निरुज्झित्थ तस्स तत्थ रूपायतनं न निरुज्झिस्सतीति?

रूपावचरानं तेसं तत्थ घानायतनं न निरुज्झित्थ, नो च तेसं तत्थ रूपायतनं न निरुज्झिस्सति. रूपावचरे परिनिब्बन्तानं अरूपानं तेसं तत्थ घानायतनञ्च न निरुज्झित्थ रूपायतनञ्च न निरुज्झिस्सति.

(ख) यस्स वा पन यत्थ रूपायतनं न निरुज्झिस्सति तस्स तत्थ घानायतनं न निरुज्झित्थाति?

कामावचरे परिनिब्बन्तानं तेसं तत्थ रूपायतनं न निरुज्झिस्सति, नो च तेसं तत्थ घानायतनं न निरुज्झित्थ. रूपावचरे परिनिब्बन्तानं अरूपानं तेसं तत्थ रूपायतनञ्च न निरुज्झिस्सति घानायतनञ्च न निरुज्झित्थ.

(क) यस्स यत्थ घानायतनं न निरुज्झित्थ तस्स तत्थ मनायतनं न निरुज्झिस्सतीति?

रूपावचरानं अरूपावचरानं तेसं तत्थ घानायतनं न निरुज्झित्थ, नो च तेसं तत्थ मनायतनं न निरुज्झिस्सति. रूपावचरे अरूपावचरे परिनिब्बन्तानं असञ्ञसत्तानं तेसं तत्थ घानायतनञ्च न निरुज्झित्थ मनायतनञ्च न निरुज्झिस्सति.

(ख) यस्स वा पन यत्थ मनायतनं न निरुज्झिस्सति तस्स तत्थ घानायतनं न निरुज्झित्थाति?

कामावचरे परिनिब्बन्तानं तेसं तत्थ मनायतनं न निरुज्झिस्सति, नो च तेसं तत्थ घानायतनं न निरुज्झित्थ. रूपावचरे अरूपावचरे परिनिब्बन्तानं असञ्ञसत्तानं तेसं तत्थ मनायतनञ्च न निरुज्झिस्सति घानायतनञ्च न निरुज्झित्थ.

(क) यस्स यत्थ घानायतनं न निरुज्झित्थ तस्स तत्थ धम्मायतनं न निरुज्झिस्सतीति?

रूपावचरानं अरूपावचरानं तेसं तत्थ घानायतनं न निरुज्झित्थ, नो च तेसं तत्थ धम्मायतनं न निरुज्झिस्सति. रूपावचरे अरूपावचरे परिनिब्बन्तानं तेसं तत्थ घानायतनञ्च न निरुज्झित्थ धम्मायतनञ्च न निरुज्झिस्सति.

(ख) यस्स वा पन यत्थ धम्मायतनं न निरुज्झिस्सति तस्स तत्थ घानायतनं न निरुज्झित्थाति?

कामावचरे परिनिब्बन्तानं तेसं तत्थ धम्मायतनं न निरुज्झिस्सति, नो च तेसं तत्थ घानायतनं न निरुज्झित्थ. रूपावचरे अरूपावचरे परिनिब्बन्तानं तेसं तत्थ धम्मायतनञ्च न निरुज्झिस्सति घानायतनञ्च न निरुज्झित्थ. (घानायतनमूलकं)

१९७. (क) यस्स यत्थ रूपायतनं न निरुज्झित्थ तस्स तत्थ मनायतनं न निरुज्झिस्सतीति?

सुद्धावासं उपपज्जन्तानं अरूपानं तेसं तत्थ रूपायतनं न निरुज्झित्थ, नो च तेसं तत्थ मनायतनं न निरुज्झिस्सति. सुद्धावासे परिनिब्बन्तानं अरूपे परिनिब्बन्तानं तेसं तत्थ रूपायतनञ्च न निरुज्झित्थ मनायतनञ्च न निरुज्झिस्सति.

(ख) यस्स वा पन यत्थ मनायतनं न निरुज्झिस्सति तस्स तत्थ रूपायतनं न निरुज्झित्थाति?

पञ्चवोकारे परिनिब्बन्तानं असञ्ञसत्तानं तेसं तत्थ मनायतनं न निरुज्झिस्सति, नो च तेसं तत्थ रूपायतनं न निरुज्झित्थ. सुद्धावासे परिनिब्बन्तानं अरूपे परिनिब्बन्तानं तेसं तत्थ मनायतनञ्च न निरुज्झिस्सति रूपायतनञ्च न निरुज्झित्थ.

(क) यस्स यत्थ रूपायतनं न निरुज्झित्थ तस्स तत्थ धम्मायतनं न निरुज्झिस्सतीति?

सुद्धावासं उपपज्जन्तानं अरूपानं तेसं तत्थ रूपायतनं न निरुज्झित्थ, नो च तेसं तत्थ धम्मायतनं न निरुज्झिस्सति. सुद्धावासे परिनिब्बन्तानं अरूपे परिनिब्बन्तानं तेसं तत्थ रूपायतनञ्च न निरुज्झित्थ धम्मायतनञ्च न निरुज्झिस्सति.

(ख) यस्स वा पन यत्थ धम्मायतनं न निरुज्झिस्सति तस्स तत्थ रूपायतनं न निरुज्झित्थाति?

पञ्चवोकारे परिनिब्बन्तानं तेसं तत्थ धम्मायतनं न निरुज्झिस्सति, नो च तेसं तत्थ रूपायतनं न निरुज्झित्थ. सुद्धावासे परिनिब्बन्तानं अरूपे परिनिब्बन्तानं तेसं तत्थ धम्मायतनञ्च न निरुज्झिस्सति रूपायतनञ्च न निरुज्झित्थ. (रूपायतनमूलकं)

१९८. (क) यस्स यत्थ मनायतनं न निरुज्झित्थ तस्स तत्थ धम्मायतनं न निरुज्झिस्सतीति?

सुद्धावासं उपपज्जन्तानं असञ्ञसत्तानं तेसं तत्थ मनायतनं न निरुज्झित्थ, नो च तेसं तत्थ धम्मायतनं न निरुज्झिस्सति. सुद्धावासे परिनिब्बन्तानं तेसं तत्थ मनायतनञ्च न निरुज्झित्थ धम्मायतनञ्च न निरुज्झिस्सति.

(ख) यस्स वा पन यत्थ धम्मायतनं न निरुज्झिस्सति तस्स तत्थ मनायतनं न निरुज्झित्थाति?

परिनिब्बन्तानं तेसं तत्थ धम्मायतनं न निरुज्झिस्सति, नो च तेसं तत्थ मनायतनं न निरुज्झित्थ. सुद्धावासे परिनिब्बन्तानं तेसं तत्थ धम्मायतनञ्च न निरुज्झिस्सति मनायतनञ्च न निरुज्झित्थ.

निरोधवारो.