(६) अतीतानागतवारो

(क) अनुलोमपुग्गलो

१०४. (क) यस्स चक्खायतनं उप्पज्जित्थ तस्स सोतायतनं उप्पज्जिस्सतीति?

पच्छिमभविकानं ये च अरूपं उपपज्जित्वा परिनिब्बायिस्सन्ति तेसं चक्खायतनं उप्पज्जित्थ, नो च तेसं सोतायतनं उप्पज्जिस्सति. इतरेसं तेसं चक्खायतनञ्च उप्पज्जित्थ सोतायतनञ्च उप्पज्जिस्सति.

(ख) यस्स वा पन सोतायतनं उप्पज्जिस्सति तस्स चक्खायतनं उप्पज्जित्थाति? आमन्ता.

(क) यस्स चक्खायतनं उप्पज्जित्थ तस्स घानायतनं उप्पज्जिस्सतीति?

पच्छिमभविकानं ये च रूपावचरं अरूपावचरं उपपज्जित्वा परिनिब्बायिस्सन्ति तेसं चक्खायतनं उप्पज्जित्थ, नो च तेसं घानायतनं उप्पज्जिस्सति. इतरेसं तेसं चक्खायतनञ्च उप्पज्जित्थ घानायतनञ्च उप्पज्जिस्सति.

(ख) यस्स वा पन…पे… उप्पज्जित्थाति? आमन्ता.

(क) यस्स चक्खायतनं उप्पज्जित्थ तस्स रूपायतनं उप्पज्जिस्सतीति?

पच्छिमभविकानं ये च अरूपं उपपज्जित्वा परिनिब्बायिस्सन्ति तेसं चक्खायतनं उप्पज्जित्थ, नो च तेसं रूपायतनं उप्पज्जिस्सति. इतरेसं तेसं चक्खायतनञ्च उप्पज्जित्थ रूपायतनञ्च उप्पज्जिस्सति.

(ख) यस्स वा पन…पे… उप्पज्जित्थाति? आमन्ता.

यस्स चक्खायतनं उप्पज्जित्थ तस्स मनायतनं…पे… धम्मायतनं उप्पज्जिस्सतीति?

पच्छिमभविकानं तेसं चक्खायतनं उप्पज्जित्थ, नो च तेसं धम्मायतनं उप्पज्जिस्सति. इतरेसं तेसं चक्खायतनञ्च उप्पज्जित्थ धम्मायतनञ्च उप्पज्जिस्सति. यस्स वा पन…पे… उप्पज्जित्थाति? आमन्ता. (चक्खायतनमूलकं)

१०५. (क) यस्स घानायतनं उप्पज्जित्थ तस्स रूपायतनं उप्पज्जिस्सतीति?

पच्छिमभविकानं ये च अरूपं उपपज्जित्वा परिनिब्बायिस्सन्ति तेसं घानायतनं उप्पज्जित्थ, नो च तेसं रूपायतनं उप्पज्जिस्सति. इतरेसं तेसं घानायतनञ्च उप्पज्जित्थ रूपायतनञ्च उप्पज्जिस्सति.

(ख) यस्स वा पन…पे… उप्पज्जित्थाति? आमन्ता.

यस्स घानायतनं उप्पज्जित्थ तस्स मनायतनं…पे… धम्मायतनं उप्पज्जिस्सतीति?

पच्छिमभविकानं तेसं घानायतनं उप्पज्जित्थ, नो च तेसं धम्मायतनं उप्पज्जिस्सति. इतरेसं तेसं घानायतनञ्च उप्पज्जित्थ धम्मायतनञ्च उप्पज्जिस्सति.

यस्स वा पन धम्मायतनं…पे… उप्पज्जित्थाति? आमन्ता.

१०६. यस्स रूपायतनं उप्पज्जित्थ तस्स मनायतनं…पे… धम्मायतनं उप्पज्जिस्सतीति?

पच्छिमभविकानं तेसं रूपायतनं उप्पज्जित्थ, नो च तेसं धम्मायतनं उप्पज्जिस्सति. इतरेसं तेसं रूपायतनञ्च उप्पज्जित्थ धम्मायतनञ्च उप्पज्जिस्सति.

यस्स वा पन…पे… उप्पज्जित्थाति? आमन्ता.

१०७. (क) यस्स मनायतनं उप्पज्जित्थ तस्स धम्मायतनं उप्पज्जिस्सतीति?

पच्छिमभविकानं तेसं मनायतनं उप्पज्जित्थ, नो च तेसं धम्मायतनं उप्पज्जिस्सति. इतरेसं तेसं मनायतनञ्च उप्पज्जित्थ धम्मायतनञ्च उप्पज्जिस्सति.

(ख) यस्स वा पन धम्मायतनं उप्पज्जिस्सति तस्स मनायतनं उप्पज्जित्थाति? आमन्ता.

(ख) अनुलोमओकासो

१०८. यत्थ चक्खायतनं उप्पज्जित्थ…पे….

(ग) अनुलोमपुग्गलोकासा

१०९. (क) यस्स यत्थ चक्खायतनं उप्पज्जित्थ तस्स तत्थ सोतायतनं उप्पज्जिस्सतीति?

पञ्चवोकारे पच्छिमभविकानं तेसं तत्थ चक्खायतनं उप्पज्जित्थ, नो च तेसं तत्थ सोतायतनं उप्पज्जिस्सति. इतरेसं पञ्चवोकारानं तेसं तत्थ चक्खायतनञ्च उप्पज्जित्थ सोतायतनञ्च उप्पज्जिस्सति.

(ख) यस्स वा पन यत्थ सोतायतनं उप्पज्जिस्सति तस्स तत्थ चक्खायतनं उप्पज्जित्थाति? आमन्ता.

(क) यस्स यत्थ चक्खायतनं उप्पज्जित्थ तस्स तत्थ घानायतनं उप्पज्जिस्सतीति?

कामावचरे पच्छिमभविकानं रूपावचरानं तेसं तत्थ चक्खायतनं उप्पज्जित्थ, नो च तेसं तत्थ घानायतनं उप्पज्जिस्सति. इतरेसं कामावचरानं तेसं तत्थ चक्खायतनञ्च उप्पज्जित्थ घानायतनञ्च उप्पज्जिस्सति.

(ख) यस्स वा पन यत्थ…पे… उप्पज्जित्थाति? आमन्ता.

(क) यस्स यत्थ चक्खायतनं उप्पज्जित्थ तस्स तत्थ रूपायतनं उप्पज्जिस्सतीति?

पञ्चवोकारे पच्छिमभविकानं तेसं तत्थ चक्खायतनं उप्पज्जित्थ, नो च तेसं तत्थ रूपायतनं उप्पज्जिस्सति. इतरेसं पञ्चवोकारानं तेसं तत्थ चक्खायतनञ्च उप्पज्जित्थ रूपायतनञ्च उप्पज्जिस्सति.

(ख) यस्स वा पन यत्थ रूपायतनं उप्पज्जिस्सति तस्स तत्थ चक्खायतनं उप्पज्जित्थाति?

असञ्ञसत्तानं तेसं तत्थ रूपायतनं उप्पज्जिस्सति, नो च तेसं तत्थ चक्खायतनं उप्पज्जित्थ. पञ्चवोकारानं तेसं तत्थ रूपायतनञ्च उप्पज्जिस्सति चक्खायतनञ्च उप्पज्जित्थ.

(क) यस्स यत्थ चक्खायतनं उप्पज्जित्थ तस्स तत्थ मनायतनं उप्पज्जिस्सतीति?

पञ्चवोकारे पच्छिमभविकानं तेसं तत्थ चक्खायतनं उप्पज्जित्थ, नो च तेसं तत्थ मनायतनं उप्पज्जिस्सति. इतरेसं पञ्चवोकारानं तेसं तत्थ चक्खायतनञ्च उप्पज्जित्थ मनायतनञ्च उप्पज्जिस्सति.

(ख) यस्स वा पन यत्थ मनायतनं उप्पज्जिस्सति तस्स तत्थ चक्खायतनं उप्पज्जित्थाति?

अरूपानं तेसं तत्थ मनायतनं उप्पज्जिस्सति, नो च तेसं तत्थ चक्खायतनं उप्पज्जित्थ. पञ्चवोकारानं तेसं तत्थ मनायतनञ्च उप्पज्जिस्सति चक्खायतनञ्च उप्पज्जित्थ.

(क) यस्स यत्थ चक्खायतनं उप्पज्जित्थ तस्स तत्थ धम्मायतनं उप्पज्जिस्सतीति?

पञ्चवोकारे पच्छिमभविकानं तेसं तत्थ चक्खायतनं उप्पज्जित्थ, नो च तेसं तत्थ धम्मायतनं उप्पज्जिस्सति. इतरेसं पञ्चवोकारानं तेसं तत्थ चक्खायतनञ्च उप्पज्जित्थ धम्मायतनञ्च उप्पज्जिस्सति.

(ख) यस्स वा पन यत्थ धम्मायतनं उप्पज्जिस्सति तस्स तत्थ चक्खायतनं उप्पज्जित्थाति?

असञ्ञसत्तानं अरूपानं तेसं तत्थ धम्मायतनं उप्पज्जिस्सति, नो च तेसं तत्थ चक्खायतनं उप्पज्जित्थ. पञ्चवोकारानं तेसं तत्थ धम्मायतनञ्च उप्पज्जिस्सति चक्खायतनञ्च उप्पज्जित्थ. (चक्खायतनमूलकं)

११०. (क) यस्स यत्थ घानायतनं उप्पज्जित्थ तस्स तत्थ रूपायतनं उप्पज्जिस्सतीति?

कामावचरे पच्छिमभविकानं तेसं तत्थ घानायतनं उप्पज्जित्थ, नो च तेसं तत्थ रूपायतनं उप्पज्जिस्सति. इतरेसं कामावचरानं तेसं तत्थ घानायतनञ्च उप्पज्जित्थ रूपायतनञ्च उप्पज्जिस्सति.

(ख) यस्स वा पन यत्थ रूपायतनं उप्पज्जिस्सति तस्स तत्थ घानायतनं उप्पज्जित्थाति?

रूपावचरानं तेसं तत्थ रूपायतनं उप्पज्जिस्सति, नो च तेसं तत्थ घानायतनं उप्पज्जित्थ. कामावचरानं तेसं तत्थ रूपायतनञ्च उप्पज्जिस्सति घानायतनञ्च उप्पज्जित्थ.

यस्स यत्थ घानायतनं उप्पज्जित्थ तस्स तत्थ मनायतनं…पे… धम्मायतनं उप्पज्जिस्सतीति?

कामावचरे पच्छिमभविकानं तेसं तत्थ घानायतनं उप्पज्जित्थ, नो च तेसं तत्थ धम्मायतनं उप्पज्जिस्सति. इतरेसं कामावचरानं तेसं तत्थ घानायतनञ्च उप्पज्जित्थ धम्मायतनञ्च उप्पज्जिस्सति.

यस्स वा पन यत्थ धम्मायतनं उप्पज्जिस्सति तस्स तत्थ घानायतनं उप्पज्जित्थाति?

रूपावचरानं अरूपावचरानं तेसं तत्थ धम्मायतनं उप्पज्जिस्सति, नो च तेसं तत्थ घानायतनं उप्पज्जित्थ. कामावचरानं तेसं तत्थ धम्मायतनञ्च उप्पज्जिस्सति घानायतनञ्च उप्पज्जित्थ. (घानायतनमूलकं)

१११. (क) यस्स यत्थ रूपायतनं उप्पज्जित्थ तस्स तत्थ मनायतनं उप्पज्जिस्सतीति?

पञ्चवोकारे पच्छिमभविकानं असञ्ञसत्तानं तेसं तत्थ रूपायतनं उप्पज्जित्थ, नो च तेसं तत्थ मनायतनं उप्पज्जिस्सति. इतरेसं पञ्चवोकारानं तेसं तत्थ रूपायतनञ्च उप्पज्जित्थ मनायतनञ्च उप्पज्जिस्सति.

(ख) यस्स वा पन यत्थ मनायतनं उप्पज्जिस्सति तस्स तत्थ रूपायतनं उप्पज्जित्थाति?

अरूपानं तेसं तत्थ मनायतनं उप्पज्जिस्सति, नो च तेसं तत्थ रूपायतनं उप्पज्जित्थ. पञ्चवोकारानं तेसं तत्थ मनायतनञ्च उप्पज्जिस्सति रूपायतनञ्च उप्पज्जित्थ.

(क) यस्स यत्थ रूपायतनं उप्पज्जित्थ तस्स तत्थ धम्मायतनं उप्पज्जिस्सतीति?

पञ्चवोकारे पच्छिमभविकानं तेसं तत्थ रूपायतनं उप्पज्जित्थ, नो च तेसं तत्थ धम्मायतनं उप्पज्जिस्सति. इतरेसं पञ्चवोकारानं असञ्ञसत्तानं तेसं तत्थ रूपायतनञ्च उप्पज्जित्थ धम्मायतनञ्च उप्पज्जिस्सति.

(ख) यस्स वा पन यत्थ धम्मायतनं उप्पज्जिस्सति तस्स तत्थ रूपायतनं उप्पज्जित्थाति?

अरूपानं तेसं तत्थ धम्मायतनं उप्पज्जिस्सति, नो च तेसं तत्थ रूपायतनं उप्पज्जित्थ. पञ्चवोकारानं असञ्ञसत्तानं तेसं तत्थ धम्मायतनञ्च उप्पज्जिस्सति रूपायतनञ्च उप्पज्जित्थ. (रूपायतनमूलकं)

११२. (क) यस्स यत्थ मनायतनं उप्पज्जित्थ तस्स तत्थ धम्मायतनं उप्पज्जिस्सतीति?

पच्छिमभविकानं तेसं तत्थ मनायतनं उप्पज्जित्थ, नो च तेसं तत्थ धम्मायतनं उप्पज्जिस्सति. इतरेसं चतुवोकारानं पञ्चवोकारानं तेसं तत्थ मनायतनञ्च उप्पज्जित्थ धम्मायतनञ्च उप्पज्जिस्सति.

(ख) यस्स वा पन यत्थ धम्मायतनं उप्पज्जिस्सति तस्स तत्थ मनायतनं उप्पज्जित्थाति?

असञ्ञसत्तानं तेसं तत्थ धम्मायतनं उप्पज्जिस्सति, नो च तेसं तत्थ मनायतनं उप्पज्जित्थ. चतुवोकारानं पञ्चवोकारानं तेसं तत्थ धम्मायतनञ्च उप्पज्जिस्सति मनायतनञ्च उप्पज्जित्थ. (मनायतनमूलकं)

(घ) पच्चनीकपुग्गलो

११३. (क) यस्स चक्खायतनं नुप्पज्जित्थ तस्स सोतायतनं नुप्पज्जिस्सतीति? नत्थि.

(ख) यस्स वा पन सोतायतनं नुप्पज्जिस्सति तस्स चक्खायतनं नुप्पज्जित्थाति? उप्पज्जित्थ.

यस्स चक्खायतनं नुप्पज्जित्थ तस्स घानायतनं…पे… रूपायतनं… मनायतनं… धम्मायतनं नुप्पज्जिस्सतीति? नत्थि.

यस्स वा पन धम्मायतनं नुप्पज्जिस्सति तस्स चक्खायतनं नुप्पज्जित्थाति? उप्पज्जित्थ.

११४. यस्स घानायतनं…पे… रूपायतनं… मनायतनं नुप्पज्जित्थ तस्स धम्मायतनं नुप्पज्जिस्सतीति? नत्थि. यस्स वा पन धम्मायतनं नुप्पज्जिस्सति तस्स मनायतनं नुप्पज्जित्थाति? उप्पज्जित्थ.

(ङ) पच्चनीकओकासो

११५. यत्थ चक्खायतनं नुप्पज्जित्थ…पे….

(च) पच्चनीकपुग्गलोकासा

११६. (क) यस्स यत्थ चक्खायतनं नुप्पज्जित्थ तस्स तत्थ सोतायतनं नुप्पज्जिस्सतीति? आमन्ता.

(ख) यस्स वा पन यत्थ सोतायतनं नुप्पज्जिस्सति तस्स तत्थ चक्खायतनं नुप्पज्जित्थाति?

पञ्चवोकारे पच्छिमभविकानं तेसं तत्थ सोतायतनं नुप्पज्जिस्सति, नो च तेसं तत्थ चक्खायतनं नुप्पज्जित्थ. सुद्धावासानं असञ्ञसत्तानं अरूपानं तेसं तत्थ सोतायतनञ्च नुप्पज्जिस्सति चक्खायतनञ्च नुप्पज्जित्थ.

(क) यस्स यत्थ चक्खायतनं नुप्पज्जित्थ तस्स तत्थ घानायतनं नुप्पज्जिस्सतीति? आमन्ता.

(ख) यस्स वा पन यत्थ घानायतनं नुप्पज्जिस्सति तस्स तत्थ चक्खायतनं नुप्पज्जित्थाति?

कामावचरे पच्छिमभविकानं रूपावचरानं तेसं तत्थ घानायतनं नुप्पज्जिस्सति, नो च तेसं तत्थ चक्खायतनं नुप्पज्जित्थ. सुद्धावासानं असञ्ञसत्तानं अरूपानं तेसं तत्थ घानायतनञ्च नुप्पज्जिस्सति चक्खायतनञ्च नुप्पज्जित्थ.

(क) यस्स यत्थ चक्खायतनं नुप्पज्जित्थ तस्स तत्थ रूपायतनं नुप्पज्जिस्सतीति?

असञ्ञसत्तानं तेसं तत्थ चक्खायतनं नुप्पज्जित्थ, नो च तेसं तत्थ रूपायतनं नुप्पज्जिस्सति. सुद्धावासानं अरूपानं तेसं तत्थ चक्खायतनञ्च नुप्पज्जित्थ रूपायतनञ्च नुप्पज्जिस्सति.

(ख) यस्स वा पन यत्थ रूपायतनं नुप्पज्जिस्सति तस्स तत्थ चक्खायतनं नुप्पज्जित्थाति?

पञ्चवोकारे पच्छिमभविकानं तेसं तत्थ रूपायतनं नुप्पज्जिस्सति, नो च तेसं तत्थ चक्खायतनं नुप्पज्जित्थ. सुद्धावासानं अरूपानं तेसं तत्थ रूपायतनञ्च नुप्पज्जिस्सति चक्खायतनञ्च नुप्पज्जित्थ.

(क) यस्स यत्थ चक्खायतनं नुप्पज्जित्थ तस्स तत्थ मनायतनं नुप्पज्जिस्सतीति?

अरूपानं तेसं तत्थ चक्खायतनं नुप्पज्जित्थ, नो च तेसं तत्थ मनायतनं नुप्पज्जिस्सति. सुद्धावासानं अरूपे पच्छिमभविकानं असञ्ञसत्तानं तेसं तत्थ चक्खायतनञ्च नुप्पज्जित्थ मनायतनञ्च नुप्पज्जिस्सति.

(ख) यस्स वा पन यत्थ मनायतनं नुप्पज्जिस्सति तस्स तत्थ चक्खायतनं नुप्पज्जित्थाति?

पञ्चवोकारे पच्छिमभविकानं तेसं तत्थ मनायतनं नुप्पज्जिस्सति, नो च तेसं तत्थ चक्खायतनं नुप्पज्जित्थ. सुद्धावासानं अरूपे पच्छिमभविकानं असञ्ञसत्तानं तेसं तत्थ मनायतनञ्च नुप्पज्जिस्सति चक्खायतनञ्च नुप्पज्जित्थ.

(क) यस्स यत्थ चक्खायतनं नुप्पज्जित्थ तस्स तत्थ धम्मायतनं नुप्पज्जिस्सतीति?

असञ्ञसत्तानं अरूपानं तेसं तत्थ चक्खायतनं नुप्पज्जित्थ, नो च तेसं तत्थ धम्मायतनं नुप्पज्जिस्सति. सुद्धावासानं अरूपे पच्छिमभविकानं तेसं तत्थ चक्खायतनञ्च नुप्पज्जित्थ धम्मायतनं नुप्पज्जिस्सति.

(ख) यस्स वा पन यत्थ धम्मायतनं नुप्पज्जिस्सति तस्स तत्थ चक्खायतनं नुप्पज्जित्थाति?

पञ्चवोकारे पच्छिमभविकानं तेसं तत्थ धम्मायतनं नुप्पज्जिस्सति, नो च तेसं तत्थ चक्खायतनं नुप्पज्जित्थ. सुद्धावासानं अरूपे पच्छिमभविकानं तेसं तत्थ धम्मायतनञ्च नुप्पज्जिस्सति चक्खायतनञ्च नुप्पज्जित्थ. (चक्खायतनमूलकं)

११७. (क) यस्स यत्थ घानायतनं नुप्पज्जित्थ तस्स तत्थ रूपायतनं नुप्पज्जिस्सतीति?

रूपावचरानं तेसं तत्थ घानायतनं नुप्पज्जित्थ, नो च तेसं तत्थ रूपायतनं नुप्पज्जिस्सति. रूपावचरे पच्छिमभविकानं अरूपानं तेसं तत्थ घानायतनञ्च नुप्पज्जित्थ रूपायतनञ्च नुप्पज्जिस्सति.

(ख) यस्स वा पन यत्थ रूपायतनं नुप्पज्जिस्सति तस्स तत्थ घानायतनं नुप्पज्जित्थाति?

कामावचरे पच्छिमभविकानं तेसं तत्थ रूपायतनं नुप्पज्जिस्सति, नो च तेसं तत्थ घानायतनं नुप्पज्जित्थ. रूपावचरे पच्छिमभविकानं अरूपानं तेसं तत्थ रूपायतनञ्च नुप्पज्जिस्सति घानायतनञ्च नुप्पज्जित्थ.

(क) यस्स यत्थ घानायतनं नुप्पज्जित्थ तस्स तत्थ मनायतनं नुप्पज्जिस्सतीति?

रूपावचरानं अरूपावचरानं तेसं तत्थ घानायतनं नुप्पज्जित्थ, नो च तेसं तत्थ मनायतनं नुप्पज्जिस्सति. रूपावचरे अरूपावचरे पच्छिमभविकानं असञ्ञसत्तानं तेसं तत्थ घानायतनञ्च नुप्पज्जित्थ मनायतनञ्च नुप्पज्जिस्सति.

(ख) यस्स वा पन यत्थ मनायतनं नुप्पज्जिस्सति तस्स तत्थ घानायतनं नुप्पज्जित्थाति?

कामावचरे पच्छिमभविकानं तेसं तत्थ मनायतनं नुप्पज्जिस्सति, नो च तेसं तत्थ घानायतनं नुप्पज्जित्थ. रूपावचरे अरूपावचरे पच्छिमभविकानं असञ्ञसत्तानं तेसं तत्थ मनायतनञ्च नुप्पज्जिस्सति घानायतनञ्च नुप्पज्जित्थ.

(क) यस्स यत्थ घानायतनं नुप्पज्जित्थ तस्स तत्थ धम्मायतनं नुप्पज्जिस्सतीति?

रूपावचरानं अरूपावचरानं तेसं तत्थ घानायतनं नुप्पज्जित्थ, नो च तेसं तत्थ धम्मायतनं नुप्पज्जिस्सति. रूपावचरे अरूपावचरे पच्छिमभविकानं तेसं तत्थ घानायतनञ्च नुप्पज्जित्थ धम्मायतनञ्च नुप्पज्जिस्सति.

(ख) यस्स वा पन यत्थ धम्मायतनं नुप्पज्जिस्सति तस्स तत्थ घानायतनं नुप्पज्जित्थाति?

कामावचरे पच्छिमभविकानं तेसं तत्थ धम्मायतनं नुप्पज्जिस्सति, नो च तेसं तत्थ घानायतनं नुप्पज्जित्थ. रूपावचरे अरूपावचरे पच्छिमभविकानं तेसं तत्थ धम्मायतनञ्च नुप्पज्जिस्सति घानायतनञ्च नुप्पज्जित्थ. (घानायतनमूलकं)

११८. (क) यस्स यत्थ रूपायतनं नुप्पज्जित्थ तस्स तत्थ मनायतनं नुप्पज्जिस्सतीति?

अरूपानं तेसं तत्थ रूपायतनं नुप्पज्जित्थ, नो च तेसं तत्थ मनायतनं नुप्पज्जिस्सति. सुद्धावासानं अरूपे पच्छिमभविकानं तेसं तत्थ रूपायतनञ्च नुप्पज्जित्थ मनायतनञ्च नुप्पज्जिस्सति.

(ख) यस्स वा पन यत्थ मनायतनं नुप्पज्जिस्सति तस्स तत्थ रूपायतनं नुप्पज्जित्थाति?

पञ्चवोकारे पच्छिमभविकानं असञ्ञसत्तानं तेसं तत्थ मनायतनं नुप्पज्जिस्सति, नो च तेसं तत्थ रूपायतनं नुप्पज्जित्थ. सुद्धावासानं अरूपे पच्छिमभविकानं तेसं तत्थ मनायतनञ्च नुप्पज्जिस्सति रूपायतनञ्च नुप्पज्जित्थ.

(क) यस्स =९३ यत्थ रूपायतनं नुप्पज्जित्थ तस्स तत्थ धम्मायतनं नुप्पज्जिस्सतीति?

अरूपानं तेसं तत्थ रूपायतनं नुप्पज्जित्थ, नो च तेसं तत्थ धम्मायतनं नुप्पज्जिस्सति. सुद्धावासानं अरूपे पच्छिमभविकानं तेसं तत्थ रूपायतनञ्च नुप्पज्जित्थ धम्मायतनञ्च नुप्पज्जिस्सति.

(ख) यस्स वा पन यत्थ धम्मायतनं नुप्पज्जिस्सति तस्स तत्थ रूपायतनं नुप्पज्जित्थाति?

पञ्चवोकारे पच्छिमभविकानं तेसं तत्थ धम्मायतनं नुप्पज्जिस्सति, नो च तेसं तत्थ रूपायतनं नुप्पज्जित्थ. सुद्धावासानं अरूपे पच्छिमभविकानं तेसं तत्थ धम्मायतनञ्च नुप्पज्जिस्सति रूपायतनञ्च नुप्पज्जित्थ. (रूपायतनमूलकं)

११९. (क) यस्स यत्थ मनायतनं नुप्पज्जित्थ तस्स तत्थ धम्मायतनं नुप्पज्जिस्सतीति?

असञ्ञसत्तानं तेसं तत्थ मनायतनं नुप्पज्जित्थ, नो च तेसं तत्थ धम्मायतनं नुप्पज्जिस्सति. सुद्धावासानं तेसं तत्थ मनायतनञ्च नुप्पज्जित्थ धम्मायतनञ्च नुप्पज्जिस्सति.

(ख) यस्स वा पन यत्थ धम्मायतनं नुप्पज्जिस्सति तस्स तत्थ मनायतनं नुप्पज्जित्थाति?

पच्छिमभविकानं तेसं तत्थ धम्मायतनं नुप्पज्जिस्सति, नो च तेसं तत्थ मनायतनं नुप्पज्जित्थ. सुद्धावासानं तेसं तत्थ धम्मायतनञ्च नुप्पज्जिस्सति मनायतनञ्च नुप्पज्जित्थ.

उप्पादवारो.