(४) पच्चुप्पन्नातीतवारो

(क) अनुलोमपुग्गलो

७०. (क) यस्स चक्खायतनं उप्पज्जति तस्स सोतायतनं उप्पज्जित्थाति? आमन्ता.

(ख) यस्स वा पन सोतायतनं उप्पज्जित्थ तस्स चक्खायतनं उप्पज्जतीति?

सब्बेसं चवन्तानं अचक्खुकानं उपपज्जन्तानं तेसं सोतायतनं उप्पज्जित्थ, नो च तेसं चक्खायतनं उप्पज्जति. सचक्खुकानं उपपज्जन्तानं तेसं सोतायतनञ्च उप्पज्जित्थ चक्खायतनञ्च उप्पज्जति.

यस्स चक्खायतनं उप्पज्जति तस्स घानायतनं…पे… रूपायतनं… मनायतनं… धम्मायतनं उप्पज्जित्थाति? आमन्ता.

यस्स वा पन धम्मायतनं उप्पज्जित्थ तस्स चक्खायतनं उप्पज्जतीति?

सब्बेसं चवन्तानं अचक्खुकानं उपपज्जन्तानं तेसं धम्मायतनं उप्पज्जित्थ, नो च तेसं चक्खायतनं उप्पज्जति. सचक्खुकानं उपपज्जन्तानं तेसं धम्मायतनञ्च उप्पज्जित्थ चक्खायतनञ्च उप्पज्जति. (चक्खायतनमूलकं)

७१. यस्स घानायतनं उप्पज्जति तस्स रूपायतनं…पे… मनायतनं… धम्मायतनं उप्पज्जित्थाति? आमन्ता.

यस्स वा पन धम्मायतनं उप्पज्जित्थ तस्स घानायतनं उप्पज्जतीति?

सब्बेसं चवन्तानं अघानकानं उपपज्जन्तानं तेसं धम्मायतनं उप्पज्जित्थ, नो च तेसं घानायतनं उप्पज्जति. सघानकानं उपपज्जन्तानं तेसं धम्मायतनञ्च उप्पज्जित्थ घानायतनञ्च उप्पज्जति. (घानायतनमूलकं)

७२. यस्स रूपायतनं उप्पज्जति तस्स मनायतनं…पे… धम्मायतनं उप्पज्जित्थाति? आमन्ता.

यस्स वा पन धम्मायतनं उप्पज्जित्थ तस्स रूपायतनं उप्पज्जतीति?

सब्बेसं चवन्तानं अरूपकानं उपपज्जन्तानं तेसं धम्मायतनं उप्पज्जित्थ, नो च तेसं रूपायतनं उप्पज्जति. सरूपकानं उपपज्जन्तानं तेसं धम्मायतनञ्च उप्पज्जित्थ रूपायतनञ्च उप्पज्जति. (रूपायतनमूलकं)

७३. (क) यस्स मनायतनं उप्पज्जति तस्स धम्मायतनं उप्पज्जित्थाति? आमन्ता.

(ख) यस्स वा पन धम्मायतनं उप्पज्जित्थ तस्स मनायतनं उप्पज्जतीति?

सब्बेसं चवन्तानं अचित्तकानं उपपज्जन्तानं तेसं धम्मायतनं उप्पज्जित्थ, नो च तेसं मनायतनं उप्पज्जति. सचित्तकानं उपपज्जन्तानं तेसं धम्मायतनञ्च उप्पज्जित्थ मनायतनञ्च उप्पज्जति. (मनायतनमूलकं)

(ख) अनुलोमओकासो

७४. यत्थ चक्खायतनं उप्पज्जति तत्थ सोतायतनं उप्पज्जित्थाति? आमन्ता.…पे….

(ग) अनुलोमपुग्गलोकासा

७५. (क) यस्स यत्थ चक्खायतनं उप्पज्जति तस्स तत्थ सोतायतनं उप्पज्जित्थाति?

सुद्धावासं उपपज्जन्तानं तेसं तत्थ चक्खायतनं उप्पज्जति, नो च तेसं तत्थ सोतायतनं उप्पज्जित्थ. इतरेसं सचक्खुकानं उपपज्जन्तानं तेसं तत्थ चक्खायतनञ्च उप्पज्जति सोतायतनञ्च उप्पज्जित्थ.

(ख) यस्स वा पन यत्थ सोतायतनं उप्पज्जित्थ तस्स तत्थ चक्खायतनं उप्पज्जतीति?

पञ्चवोकारा चवन्तानं अचक्खुकानं कामावचरं उपपज्जन्तानं तेसं तत्थ सोतायतनं उप्पज्जित्थ, नो च तेसं तत्थ चक्खायतनं उप्पज्जति. सचक्खुकानं उपपज्जन्तानं तेसं तत्थ सोतायतनञ्च उप्पज्जित्थ चक्खायतनञ्च उप्पज्जति.

(क) यस्स यत्थ चक्खायतनं उप्पज्जति तस्स तत्थ घानायतनं उप्पज्जित्थाति?

रूपावचरं उपपज्जन्तानं तेसं तत्थ चक्खायतनं उप्पज्जति, नो च तेसं तत्थ घानायतनं उप्पज्जित्थ. सचक्खुकानं कामावचरं उपपज्जन्तानं तेसं तत्थ चक्खायतनञ्च उप्पज्जति घानायतनञ्च उप्पज्जित्थ.

(ख) यस्स वा पन यत्थ घानायतनं उप्पज्जित्थ तस्स तत्थ चक्खायतनं उप्पज्जतीति?

कामावचरा चवन्तानं अचक्खुकानं कामावचरं उपपज्जन्तानं तेसं तत्थ घानायतनं उप्पज्जित्थ, नो च तेसं तत्थ चक्खायतनं उप्पज्जति. सचक्खुकानं कामावचरं उपपज्जन्तानं तेसं तत्थ घानायतनञ्च उप्पज्जित्थ चक्खायतनञ्च उप्पज्जति.

(क) यस्स यत्थ चक्खायतनं उप्पज्जति तस्स तत्थ रूपायतनं उप्पज्जित्थाति?

सुद्धावासं उपपज्जन्तानं तेसं तत्थ चक्खायतनं उप्पज्जति, नो च तेसं तत्थ रूपायतनं उप्पज्जित्थ. इतरेसं सचक्खुकानं उपपज्जन्तानं तेसं तत्थ चक्खायतनञ्च उप्पज्जति रूपायतनञ्च उप्पज्जित्थ.

(ख) यस्स वा पन यत्थ रूपायतनं उप्पज्जित्थ तस्स तत्थ चक्खायतनं उप्पज्जतीति?

पञ्चवोकारा चवन्तानं अचक्खुकानं कामावचरं उपपज्जन्तानं असञ्ञसत्तानं तेसं तत्थ रूपायतनं उप्पज्जित्थ, नो च तेसं तत्थ चक्खायतनं उप्पज्जति. सचक्खुकानं उपपज्जन्तानं तेसं तत्थ रूपायतनञ्च च उप्पज्जित्थ चक्खायतनञ्च उप्पज्जति.

(क) यस्स यत्थ चक्खायतनं उप्पज्जति तस्स तत्थ मनायतनं उप्पज्जित्थाति?

सुद्धावासं उपपज्जन्तानं तेसं तत्थ चक्खायतनं उप्पज्जति, नो च तेसं तत्थ मनायतनं उप्पज्जित्थ. इतरेसं सचक्खुकानं उपपज्जन्तानं तेसं तत्थ चक्खायतनञ्च उप्पज्जति मनायतनञ्च उप्पज्जित्थ.

(ख) यस्स वा पन यत्थ मनायतनं उप्पज्जित्थ तस्स तत्थ चक्खायतनं उप्पज्जतीति?

पञ्चवोकारा चवन्तानं अचक्खुकानं कामावचरं उपपज्जन्तानं अरूपानं तेसं तत्थ मनायतनं उप्पज्जित्थ, नो च तेसं तत्थ चक्खायतनं उप्पज्जति. सचक्खुकानं उपपज्जन्तानं तेसं तत्थ मनायतनञ्च उप्पज्जित्थ चक्खायतनञ्च उप्पज्जति.

(क) यस्स यत्थ चक्खायतनं उप्पज्जति तस्स तत्थ धम्मायतनं उप्पज्जित्थाति?

सुद्धावासं उपपज्जन्तानं तेसं तत्थ चक्खायतनं उप्पज्जति, नो च तेसं तत्थ धम्मायतनं उप्पज्जित्थ. इतरेसं सचक्खुकानं उपपज्जन्तानं तेसं तत्थ चक्खायतनञ्च उप्पज्जति धम्मायतनञ्च उप्पज्जित्थ.

(ख) यस्स वा पन यत्थ धम्मायतनं उप्पज्जित्थ तस्स तत्थ चक्खायतनं उप्पज्जतीति?

सब्बेसं चवन्तानं अचक्खुकानं उपपज्जन्तानं तेसं तत्थ धम्मायतनं उप्पज्जित्थ, नो च तेसं तत्थ चक्खायतनं उप्पज्जति. सचक्खुकानं उपपज्जन्तानं तेसं तत्थ धम्मायतनञ्च उप्पज्जित्थ चक्खायतनञ्च उप्पज्जति. (चक्खायतनमूलकं)

७६. (क) यस्स यत्थ घानायतनं उप्पज्जति तस्स तत्थ रूपायतनं उप्पज्जित्थाति? आमन्ता.

(ख) यस्स वा पन यत्थ रूपायतनं उप्पज्जित्थ तस्स तत्थ घानायतनं उप्पज्जतीति?

कामावचरा चवन्तानं अघानकानं कामावचरं उपपज्जन्तानं रूपावचरानं तेसं तत्थ रूपायतनं उप्पज्जित्थ, नो च तेसं तत्थ घानायतनं उप्पज्जति. सघानकानं उपपज्जन्तानं तेसं तत्थ रूपायतनञ्च उप्पज्जित्थ घानायतनञ्च उप्पज्जति.

(क) यस्स यत्थ घानायतनं उप्पज्जति तस्स तत्थ मनायतनं उप्पज्जित्थाति? आमन्ता.

(ख) यस्स वा पन यत्थ मनायतनं उप्पज्जित्थ तस्स तत्थ घानायतनं उप्पज्जतीति?

कामावचरा चवन्तानं अघानकानं कामावचरं उपपज्जन्तानं रूपावचरानं अरूपावचरानं तेसं तत्थ मनायतनं उप्पज्जित्थ, नो च तेसं तत्थ घानायतनं उप्पज्जति. सघानकानं उपपज्जन्तानं तेसं तत्थ मनायतनञ्च उप्पज्जित्थ घानायतनञ्च उप्पज्जति.

(क) यस्स यत्थ घानायतनं उप्पज्जति तस्स तत्थ धम्मायतनं उप्पज्जित्थाति? आमन्ता.

(ख) यस्स वा पन यत्थ धम्मायतनं उप्पज्जित्थ तस्स तत्थ घानायतनं उप्पज्जतीति?

सब्बेसं चवन्तानं अघानकानं उपपज्जन्तानं तेसं तत्थ धम्मायतनं उप्पज्जित्थ, नो च तेसं तत्थ घानायतनं उप्पज्जति. सघानकानं उपपज्जन्तानं तेसं तत्थ धम्मायतनञ्च उप्पज्जित्थ घानायतनञ्च उप्पज्जति. (घानायतनमूलकं)

७७. (क) यस्स यत्थ रूपायतनं उप्पज्जति तस्स तत्थ मनायतनं उप्पज्जित्थाति?

सुद्धावासं उपपज्जन्तानं असञ्ञसत्तं उपपज्जन्तानं तेसं तत्थ रूपायतनं उप्पज्जति, नो च तेसं तत्थ मनायतनं उप्पज्जित्थ. इतरेसं पञ्चवोकारं उपपज्जन्तानं तेसं तत्थ रूपायतनञ्च उप्पज्जति मनायतनञ्च उप्पज्जित्थ.

(ख) यस्स वा पन यत्थ मनायतनं उप्पज्जित्थ तस्स तत्थ रूपायतनं उप्पज्जतीति?

पञ्चवोकारा चवन्तानं अरूपानं तेसं तत्थ मनायतनं उप्पज्जित्थ, नो च तेसं तत्थ रूपायतनं उप्पज्जति. पञ्चवोकारं उपपज्जन्तानं तेसं तत्थ मनायतनञ्च उप्पज्जित्थ रूपायतनञ्च उप्पज्जति.

(क) यस्स यत्थ रूपायतनं उप्पज्जति तस्स तत्थ धम्मायतनं उप्पज्जित्थाति?

सुद्धावासं उपपज्जन्तानं तेसं तत्थ रूपायतनं उप्पज्जति, नो च तेसं तत्थ धम्मायतनं उप्पज्जित्थ. इतरेसं सरूपकानं उपपज्जन्तानं तेसं तत्थ रूपायतनञ्च उप्पज्जति धम्मायतनञ्च उप्पज्जित्थ.

(ख) यस्स वा पन यत्थ धम्मायतनं उप्पज्जित्थ तस्स तत्थ रूपायतनं उप्पज्जतीति?

सब्बेसं चवन्तानं अरूपकानं उपपज्जन्तानं तेसं तत्थ धम्मायतनं उप्पज्जित्थ, नो च तेसं तत्थ रूपायतनं उप्पज्जति. सरूपकानं उपपज्जन्तानं तेसं तत्थ धम्मायतनञ्च उप्पज्जित्थ रूपायतनञ्च उप्पज्जति. (रूपायतनमूलकं)

७८. (क) यस्स यत्थ मनायतनं उप्पज्जति तस्स तत्थ धम्मायतनं उप्पज्जित्थाति?

सुद्धावासं उपपज्जन्तानं तेसं तत्थ मनायतनं उप्पज्जति, नो च तेसं तत्थ धम्मायतनं उप्पज्जित्थ. इतरेसं सचित्तकानं उपपज्जन्तानं तेसं तत्थ मनायतनञ्च उप्पज्जति धम्मायतनञ्च उप्पज्जित्थ.

(ख) यस्स वा पन यत्थ धम्मायतनं उप्पज्जित्थ तस्स तत्थ मनायतनं उप्पज्जतीति?

सब्बेसं चवन्तानं अचित्तकानं उपपज्जन्तानं तेसं तत्थ धम्मायतनं उप्पज्जित्थ, नो च तेसं तत्थ मनायतनं उप्पज्जति. सचित्तकानं उपपज्जन्तानं तेसं तत्थ धम्मायतनञ्च उप्पज्जित्थ मनायतनञ्च उप्पज्जति. (मनायतनमूलकं)

(घ) पच्चनीकपुग्गलो

७९. (क) यस्स चक्खायतनं नुप्पज्जति तस्स सोतायतनं नुप्पज्जित्थाति? उप्पज्जित्थ.

(ख) यस्स वा पन सोतायतनं नुप्पज्जित्थ तस्स चक्खायतनं नुप्पज्जतीति? नत्थि.

यस्स चक्खायतनं नुप्पज्जति तस्स घानायतनं…पे… रूपायतनं… मनायतनं… धम्मायतनं नुप्पज्जित्थाति? उप्पज्जित्थ.

यस्स वा पन धम्मायतनं नुप्पज्जित्थ तस्स चक्खायतनं नुप्पज्जतीति? नत्थि.

८०. यस्स घानायतनं…पे… रूपायतनं… मनायतनं नुप्पज्जति तस्स धम्मायतनं नुप्पज्जित्थाति? उप्पज्जित्थ.

यस्स वा पन धम्मायतनं नुप्पज्जित्थ तस्स मनायतनं नुप्पज्जतीति? नत्थि.

(ङ) पच्चनीकओकासो

८१. यत्थ चक्खायतनं नुप्पज्जति…पे….

(च) पच्चनीकपुग्गलोकासा

८२. (क) यस्स यत्थ चक्खायतनं नुप्पज्जति तस्स तत्थ सोतायतनं नुप्पज्जित्थाति?

पञ्चवोकारा चवन्तानं अचक्खुकानं कामावचरं उपपज्जन्तानं तेसं तत्थ चक्खायतनं नुप्पज्जति, नो च तेसं तत्थ सोतायतनं नुप्पज्जित्थ. सुद्धावासे परिनिब्बन्तानं असञ्ञसत्तानं अरूपानं तेसं तत्थ चक्खायतनञ्च नुप्पज्जति सोतायतनञ्च नुप्पज्जित्थ.

(ख) यस्स वा पन यत्थ सोतायतनं नुप्पज्जित्थ तस्स तत्थ चक्खायतनं नुप्पज्जतीति?

सुद्धावासं उपपज्जन्तानं तेसं तत्थ सोतायतनं नुप्पज्जित्थ, नो च तेसं तत्थ चक्खायतनं नुप्पज्जति. सुद्धावासे परिनिब्बन्तानं असञ्ञसत्तानं अरूपानं तेसं तत्थ सोतायतनञ्च नुप्पज्जित्थ चक्खायतनञ्च नुप्पज्जति.

(क) यस्स यत्थ चक्खायतनं नुप्पज्जति तस्स तत्थ घानायतनं नुप्पज्जित्थाति?

कामावचरा चवन्तानं अचक्खुकानं कामावचरं उपपज्जन्तानं तेसं तत्थ चक्खायतनं नुप्पज्जति, नो च तेसं तत्थ घानायतनं नुप्पज्जित्थ. रूपावचरा चवन्तानं असञ्ञसत्तानं अरूपानं तेसं तत्थ चक्खायतनञ्च नुप्पज्जति घानायतनञ्च नुप्पज्जित्थ.

(ख) यस्स वा पन यत्थ घानायतनं नुप्पज्जित्थ तस्स तत्थ चक्खायतनं नुप्पज्जतीति?

रूपावचरं उपपज्जन्तानं तेसं तत्थ घानायतनं नुप्पज्जित्थ, नो च तेसं तत्थ चक्खायतनं नुप्पज्जति. रूपावचरा चवन्तानं असञ्ञसत्तानं अरूपानं तेसं तत्थ घानायतनञ्च नुप्पज्जित्थ चक्खायतनञ्च नुप्पज्जति.

(क) यस्स यत्थ चक्खायतनं नुप्पज्जति तस्स तत्थ रूपायतनं नुप्पज्जित्थाति?

पञ्चवोकारा चवन्तानं अचक्खुकानं कामावचरं उपपज्जन्तानं असञ्ञसत्तानं तेसं तत्थ चक्खायतनं नुप्पज्जति, नो च तेसं तत्थ रूपायतनं नुप्पज्जित्थ. सुद्धावासे परिनिब्बन्तानं अरूपानं तेसं तत्थ चक्खायतनञ्च नुप्पज्जति रूपायतनञ्च नुप्पज्जित्थ.

(ख) यस्स वा पन यत्थ रूपायतनं नुप्पज्जित्थ तस्स तत्थ चक्खायतनं नुप्पज्जतीति?

सुद्धावासं उपपज्जन्तानं तेसं तत्थ रूपायतनं नुप्पज्जित्थ, नो च तेसं तत्थ चक्खायतनं नुप्पज्जति. सुद्धावासे परिनिब्बन्तानं अरूपानं तेसं तत्थ रूपायतनञ्च नुप्पज्जित्थ चक्खायतनञ्च नुप्पज्जति.

(क) यस्स यत्थ चक्खायतनं नुप्पज्जति तस्स तत्थ मनायतनं नुप्पज्जित्थाति?

पञ्चवोकारा चवन्तानं अचक्खुकानं कामावचरं उपपज्जन्तानं अरूपानं तेसं तत्थ चक्खायतनं नुप्पज्जति, नो च तेसं तत्थ मनायतनं नुप्पज्जित्थ. सुद्धावासे परिनिब्बन्तानं असञ्ञसत्तानं तेसं तत्थ चक्खायतनञ्च नुप्पज्जति मनायतनञ्च नुप्पज्जित्थ.

(ख) यस्स वा पन यत्थ मनायतनं नुप्पज्जित्थ तस्स तत्थ चक्खायतनं नुप्पज्जतीति?

सुद्धावासं उपपज्जन्तानं तेसं तत्थ मनायतनं नुप्पज्जित्थ, नो च तेसं तत्थ चक्खायतनं नुप्पज्जति. सुद्धावासे परिनिब्बन्तानं असञ्ञसत्तानं तेसं तत्थ मनायतनञ्च नुप्पज्जित्थ चक्खायतनञ्च नुप्पज्जति.

(क) यस्स यत्थ चक्खायतनं नुप्पज्जति तस्स तत्थ धम्मायतनं नुप्पज्जित्थाति?

सब्बेसं चवन्तानं अचक्खुकानं उपपज्जन्तानं तेसं तत्थ चक्खायतनं नुप्पज्जति, नो च तेसं तत्थ धम्मायतनं नुप्पज्जित्थ. सुद्धावासे परिनिब्बन्तानं तेसं तत्थ चक्खायतनञ्च नुप्पज्जति धम्मायतनञ्च नुप्पज्जित्थ.

(ख) यस्स वा पन यत्थ धम्मायतनं नुप्पज्जित्थ तस्स तत्थ चक्खायतनं नुप्पज्जतीति?

सुद्धावासं उपपज्जन्तानं तेसं तत्थ धम्मायतनं नुप्पज्जित्थ, नो च तेसं तत्थ चक्खायतनं नुप्पज्जति. सुद्धावासे परिनिब्बन्तानं तेसं तत्थ धम्मायतनञ्च नुप्पज्जित्थ चक्खायतनञ्च नुप्पज्जति. (चक्खायतनमूलकं)

८३. (क) यस्स यत्थ घानायतनं नुप्पज्जति तस्स तत्थ रूपायतनं नुप्पज्जित्थाति?

कामावचरा चवन्तानं अघानकानं कामावचरं उपपज्जन्तानं रूपावचरानं तेसं तत्थ घानायतनं नुप्पज्जति, नो च तेसं तत्थ रूपायतनं नुप्पज्जित्थ. सुद्धावासानं अरूपानं तेसं तत्थ घानायतनञ्च नुप्पज्जति रूपायतनञ्च नुप्पज्जित्थ.

(ख) यस्स वा पन यत्थ रूपायतनं नुप्पज्जित्थ तस्स तत्थ घानायतनं नुप्पज्जतीति? आमन्ता.

(क) यस्स यत्थ घानायतनं नुप्पज्जति तस्स तत्थ मनायतनं नुप्पज्जित्थाति?

कामावचरा चवन्तानं अघानकानं कामावचरं उपपज्जन्तानं रूपावचरानं अरूपावचरानं तेसं तत्थ घानायतनं नुप्पज्जति, नो च तेसं तत्थ मनायतनं नुप्पज्जित्थ. सुद्धावासानं असञ्ञसत्तानं तेसं तत्थ घानायतनञ्च नुप्पज्जति मनायतनञ्च नुप्पज्जित्थ.

(ख) यस्स वा पन यत्थ मनायतनं नुप्पज्जित्थ तस्स तत्थ घानायतनं नुप्पज्जतीति? आमन्ता.

(क) यस्स यत्थ घानायतनं नुप्पज्जति तस्स तत्थ धम्मायतनं नुप्पज्जित्थाति?

सब्बेसं चवन्तानं अघानकानं उपपज्जन्तानं तेसं तत्थ घानायतनं नुप्पज्जति, नो च तेसं तत्थ धम्मायतनं नुप्पज्जित्थ. सुद्धावासानं तेसं तत्थ घानायतनञ्च नुप्पज्जति धम्मायतनञ्च नुप्पज्जित्थ.

(ख) यस्स वा पन यत्थ धम्मायतनं नुप्पज्जित्थ तस्स तत्थ घानायतनं नुप्पज्जतीति? आमन्ता. (घानायतनमूलकं)

८४. (क) यस्स यत्थ रूपायतनं नुप्पज्जति तस्स तत्थ मनायतनं नुप्पज्जित्थाति?

पञ्चवोकारा चवन्तानं अरूपानं तेसं तत्थ रूपायतनं नुप्पज्जति, नो च तेसं तत्थ मनायतनं नुप्पज्जित्थ. सुद्धावासे परिनिब्बन्तानं असञ्ञसत्ता चवन्तानं तेसं तत्थ रूपायतनञ्च नुप्पज्जति मनायतनञ्च नुप्पज्जित्थ.

(ख) यस्स वा पन यत्थ मनायतनं नुप्पज्जित्थ तस्स तत्थ रूपायतनं नुप्पज्जतीति?

सुद्धावासं उपपज्जन्तानं असञ्ञसत्तं उपपज्जन्तानं तेसं तत्थ मनायतनं नुप्पज्जित्थ, नो च तेसं तत्थ रूपायतनं नुप्पज्जति. सुद्धावासे परिनिब्बन्तानं असञ्ञसत्ता चवन्तानं तेसं तत्थ मनायतनञ्च नुप्पज्जित्थ रूपायतनञ्च नुप्पज्जति.

(क) यस्स यत्थ रूपायतनं नुप्पज्जति तस्स तत्थ धम्मायतनं नुप्पज्जित्थाति?

सब्बेसं चवन्तानं अरूपकानं उपपज्जन्तानं तेसं तत्थ रूपायतनं नुप्पज्जति, नो च तेसं तत्थ धम्मायतनं नुप्पज्जित्थ. सुद्धावासे परिनिब्बन्तानं तेसं तत्थ रूपायतनञ्च नुप्पज्जति धम्मायतनञ्च नुप्पज्जित्थ.

(ख) यस्स वा पन यत्थ धम्मायतनं नुप्पज्जित्थ तस्स तत्थ रूपायतनं नुप्पज्जतीति?

सुद्धावासं उपपज्जन्तानं तेसं तत्थ धम्मायतनं नुप्पज्जित्थ, नो च तेसं तत्थ रूपायतनं नुप्पज्जति. सुद्धावासे परिनिब्बन्तानं तेसं तत्थ धम्मायतनञ्च नुप्पज्जित्थ रूपायतनञ्च नुप्पज्जति. (रूपायतनमूलकं)

८५. (क) यस्स यत्थ मनायतनं नुप्पज्जति तस्स तत्थ धम्मायतनं नुप्पज्जित्थाति?

सब्बेसं चवन्तानं अचित्तकानं उपपज्जन्तानं तेसं तत्थ मनायतनं नुप्पज्जति, नो च तेसं तत्थ धम्मायतनं नुप्पज्जित्थ. सुद्धावासे परिनिब्बन्तानं तेसं तत्थ मनायतनञ्च नुप्पज्जति धम्मायतनञ्च नुप्पज्जित्थ.

(ख) यस्स वा पन यत्थ धम्मायतनं नुप्पज्जित्थ तस्स तत्थ मनायतनं नुप्पज्जतीति?

सुद्धावासं उपपज्जन्तानं तेसं तत्थ धम्मायतनं नुप्पज्जित्थ, नो च तेसं तत्थ मनायतनं नुप्पज्जति. सुद्धावासे परिनिब्बन्तानं तेसं तत्थ धम्मायतनञ्च नुप्पज्जित्थ मनायतनञ्च नुप्पज्जति. (मनायतनमूलकं)