१. तिकं

२२३. दसिन्द्रिया अब्याकता. दोमनस्सिन्द्रियं अकुसलं. अनञ्ञातञ्ञस्सामीतिन्द्रियं कुसलं. चत्तारिन्द्रिया सिया कुसला, सिया अब्याकता. छ इन्द्रिया सिया कुसला, सिया अकुसला, सिया अब्याकता.

द्वादसिन्द्रिया न वत्तब्बा – ‘‘सुखाय वेदनाय सम्पयुत्ता’’तिपि, ‘‘दुक्खाय वेदनाय सम्पयुत्ता’’तिपि, ‘‘अदुक्खमसुखाय वेदनाय सम्पयुत्ता’’तिपि. छ इन्द्रिया सिया सुखाय वेदनाय सम्पयुत्ता, सिया अदुक्खमसुखाय वेदनाय सम्पयुत्ता. तीणिन्द्रिया सिया सुखाय वेदनाय सम्पयुत्ता, सिया दुक्खाय वेदनाय सम्पयुत्ता, सिया अदुक्खमसुखाय वेदनाय सम्पयुत्ता. जीवितिन्द्रियं सिया सुखाय वेदनाय सम्पयुत्तं, सिया दुक्खाय वेदनाय सम्पयुत्तं, सिया अदुक्खमसुखाय वेदनाय सम्पयुत्तं, सिया न वत्तब्बं – ‘‘सुखाय वेदनाय सम्पयुत्त’’न्तिपि, ‘‘दुक्खाय वेदनाय सम्पयुत्त’’न्तिपि, ‘‘अदुक्खमसुखाय वेदनाय सम्पयुत्त’’न्तिपि.

सत्तिन्द्रिया नेवविपाकनविपाकधम्मधम्मा. तीणिन्द्रिया विपाका. द्विन्द्रिया विपाकधम्मधम्मा. अञ्ञिन्द्रियं सिया विपाकं, सिया विपाकधम्मधम्मं. नविन्द्रिया सिया विपाका, सिया विपाकधम्मधम्मा, सिया नेवविपाकनविपाकधम्मधम्मा. नविन्द्रिया उपादिन्नुपादानिया. दोमनस्सिन्द्रियं अनुपादिन्नुपादानियं. तीणिन्द्रिया अनुपादिन्नअनुपादानिया. नविन्द्रिया सिया उपादिन्नुपादानिया, सिया अनुपादिन्नुपादानिया, सिया अनुपादिन्नअनुपादानिया.

नविन्द्रिया असंकिलिट्ठसंकिलेसिका. दोमनस्सिन्द्रियं संकिलिट्ठसंकिलेसिकं. तीणिन्द्रिया असंकिलिट्ठअसंकिलेसिका. तीणिन्द्रिया सिया असंकिलिट्ठसंकिलेसिका, सिया असंकिलिट्ठअसंकिलेसिका. छ इन्द्रिया सिया संकिलिट्ठसंकिलेसिका, सिया असंकिलिट्ठसंकिलेसिका, सिया असंकिलिट्ठअसंकिलेसिका. नविन्द्रिया अवितक्कअविचारा. दोमनस्सिन्द्रियं सवितक्कसविचारं. उपेक्खिन्द्रियं सिया सवितक्कसविचारं, सिया अवितक्कअविचारं. एकादसिन्द्रिया सिया सवितक्कसविचारा, सिया अवितक्कविचारमत्ता, सिया अवितक्कअविचारा.

एकादसिन्द्रिया न वत्तब्बा – ‘‘पीतिसहगता’’तिपि, ‘‘सुखसहगता’’तिपि, ‘‘उपेक्खासहगता’’तिपि. सोमनस्सिन्द्रियं सिया पीतिसहगतं न सुखसहगतं न उपेक्खासहगतं, सिया न वत्तब्बं – ‘‘पीतिसहगत’’न्ति. छ इन्द्रिया सिया पीतिसहगता, सिया सुखसहगता, सिया उपेक्खासहगता. चत्तारिन्द्रिया सिया पीतिसहगता, सिया सुखसहगता, सिया उपेक्खासहगता, सिया न वत्तब्बा – ‘‘पीतिसहगता’’तिपि, ‘‘सुखसहगता’’तिपि, ‘‘उपेक्खासहगता’’तिपि.

पन्नरसिन्द्रिया नेव दस्सनेन न भावनाय पहातब्बा. दोमनस्सिन्द्रियं सिया दस्सनेन पहातब्बं, सिया भावनाय पहातब्बं. छ इन्द्रिया सिया दस्सनेन पहातब्बा, सिया भावनाय पहातब्बा, सिया नेव दस्सनेन न भावनाय पहातब्बा. पन्नरसिन्द्रिया नेव दस्सनेन न भावनाय पहातब्बहेतुका. दोमनस्सिन्द्रियं सिया दस्सनेन पहातब्बहेतुकं, सिया भावनाय पहातब्बहेतुकं. छ इन्द्रिया सिया दस्सनेन पहातब्बहेतुका, सिया भावनाय पहातब्बहेतुका, सिया नेव दस्सनेन न भावनाय पहातब्बहेतुका.

दसिन्द्रिया नेवाचयगामिनापचयगामिनो. दोमनस्सिन्द्रियं आचयगामि. अनञ्ञातञ्ञस्सामीतिन्द्रियं अपचयगामि. अञ्ञिन्द्रियं सिया अपचयगामि, सिया नेवाचयगामिनापचयगामि. नविन्द्रिया सिया आचयगामिनो, सिया अपचयगामिनो, सिया नेवाचयगामिनापचयगामिनो. दसिन्द्रिया नेवसेक्खनासेक्खा. द्विन्द्रिया सेक्खा. अञ्ञाताविन्द्रियं असेक्खं. नविन्द्रिया सिया सेक्खा, सिया असेक्खा, सिया नेवसेक्खनासेक्खा.

दसिन्द्रिया परित्ता. तीणिन्द्रिया अप्पमाणा. नविन्द्रिया सिया परित्ता, सिया महग्गता, सिया अप्पमाणा. सत्तिन्द्रिया अनारम्मणा. द्विन्द्रिया परित्तारम्मणा. तीणिन्द्रिया अप्पमाणारम्मणा. दोमनस्सिन्द्रियं सिया परित्तारम्मणं सिया महग्गतारम्मणं, न अप्पमाणारम्मणं, सिया न वत्तब्बं – ‘‘परित्तारम्मण’’न्तिपि, ‘‘महग्गतारम्मण’’न्ति पि. नविन्द्रिया सिया परित्तारम्मणा, सिया महग्गतारम्मणा, सिया अप्पमाणारम्मणा, सिया न वत्तब्बा – ‘‘परित्तारम्मणा’’तिपि, ‘‘महग्गतारम्मणा’’तिपि, ‘‘अप्पमाणारम्मणा’’तिपि.

नविन्द्रिया मज्झिमा. दोमनस्सिन्द्रियं हीनं. तीणिन्द्रिया पणीता. तीणिन्द्रिया सिया मज्झिमा, सिया पणीता. छ इन्द्रिया सिया हीना, सिया मज्झिमा, सिया पणीता. दसिन्द्रिया अनियता. अनञ्ञातञ्ञस्सामीतिन्द्रियं सम्मत्तनियतं. चत्तारिन्द्रिया सिया सम्मत्तनियता, सिया अनियता. दोमनस्सिन्द्रियं सिया मिच्छत्तनियतं, सिया अनियतं. छ इन्द्रिया सिया मिच्छत्तनियता, सिया सम्मत्तनियता, सिया अनियता. सत्तिन्द्रिया अनारम्मणा. चत्तारिन्द्रिया न वत्तब्बा – ‘‘मग्गारम्मणा’’तिपि, ‘‘मग्गहेतुका’’तिपि, ‘‘मग्गाधिपतिनो’’तिपि. अनञ्ञातञ्ञस्सामीतिन्द्रियं न मग्गारम्मणं, सिया मग्गहेतुकं, सिया मग्गाधिपति, सिया न वत्तब्बं – ‘‘मग्गहेतुक’’न्तिपि, ‘‘मग्गाधिपती’’तिपि. अञ्ञिन्द्रियं न मग्गारम्मणं, सिया मग्गहेतुकं, सिया मग्गाधिपति, सिया न वत्तब्बं – ‘‘मग्गहेतुक’’न्तिपि, ‘‘मग्गाधिपती’’तिपि. नविन्द्रिया सिया मग्गारम्मणा, सिया मग्गहेतुका, सिया मग्गाधिपतिनो, सिया न वत्तब्बा – ‘‘मग्गारम्मणा’’तिपि, ‘‘मग्गहेतुका’’तिपि, ‘‘मग्गाधिपतिनो’’तिपि.

दसिन्द्रिया सिया उप्पन्ना, सिया उप्पादिनो, न वत्तब्बा – ‘‘अनुप्पन्ना’’ति. द्विन्द्रिया सिया उप्पन्ना, सिया अनुप्पन्ना, न वत्तब्बा – ‘‘उप्पादिनो’’ति. दसिन्द्रिया सिया उप्पन्ना, सिया अनुप्पन्ना, सिया उप्पादिनो; सिया अतीता, सिया अनागता, सिया पच्चुप्पन्ना. सत्तिन्द्रिया अनारम्मणा. द्विन्द्रिया पच्चुप्पन्नारम्मणा. तीणिन्द्रिया न वत्तब्बा – ‘‘अतीतारम्मणा’’तिपि, ‘‘अनागतारम्मणा’’तिपि, ‘‘पच्चुप्पन्नारम्मणा’’तिपि. दसिन्द्रिया सिया अतीतारम्मणा, सिया अनागतारम्मणा, सिया पच्चुप्पन्नारम्मणा, सिया न वत्तब्बा – ‘‘अतीतारम्मणा’’तिपि, ‘‘अनागतारम्मणा’’तिपि, ‘‘पच्चुप्पन्नारम्मणा’’तिपि; सिया अज्झत्ता, सिया बहिद्धा, सिया अज्झत्तबहिद्धा. सत्तिन्द्रिया अनारम्मणा. तीणिन्द्रिया बहिद्धारम्मणा. चत्तारिन्द्रिया सिया अज्झत्तारम्मणा, सिया बहिद्धारम्मणा, सिया अज्झत्तबहिद्धारम्मणा, अट्ठिन्द्रिया सिया अज्झत्तारम्मणा, सिया बहिद्धारम्मणा, सिया अज्झत्तबहिद्धारम्मणा, सिया न वत्तब्बा – ‘‘अज्झत्तारम्मणा’’तिपि, ‘‘बहिद्धारम्मणा’’तिपि, ‘‘अज्झत्तबहिद्धारम्मणा’’तिपि. पञ्चिन्द्रिया अनिदस्सनसप्पटिघा. सत्तरसिन्द्रिया अनिदस्सनअप्पटिघा.