१. तिकं

२१७. समुदयसच्चं अकुसलं. मग्गसच्चं कुसलं. निरोधसच्चं अब्याकतं. दुक्खसच्चं सिया कुसलं, सिया अकुसलं, सिया अब्याकतं. द्वे सच्चा सिया सुखाय वेदनाय सम्पयुत्ता, सिया अदुक्खमसुखाय वेदनाय सम्पयुत्ता. निरोधसच्चं न वत्तब्बं – ‘‘सुखाय वेदनाय सम्पयुत्त’’न्तिपि, ‘‘दुक्खाय वेदनाय सम्पयुत्त’’न्तिपि, ‘‘अदुक्खमसुखाय वेदनाय सम्पयुत्त’’न्तिपि. दुक्खसच्चं सिया सुखाय वेदनाय सम्पयुत्तं, सिया दुक्खाय वेदनाय सम्पयुत्तं, सिया अदुक्खमसुखाय वेदनाय सम्पयुत्तं, सिया न वत्तब्बं – ‘‘सुखाय वेदनाय सम्पयुत्त’’न्तिपि, ‘‘दुक्खाय वेदनाय सम्पयुत्त’’न्तिपि, ‘‘अदुक्खमसुखाय वेदनाय सम्पयुत्त’’न्तिपि. द्वे सच्चा विपाकधम्मधम्मा. निरोधसच्चं नेवविपाकनविपाकधम्मधम्मं. दुक्खसच्चं सिया विपाकं, सिया विपाकधम्मधम्मं, सिया नेवविपाकनविपाकधम्मधम्मं. समुदयसच्चं अनुपादिन्नुपादानियं. द्वे सच्चा अनुपादिन्नअनुपादानिया. दुक्खसच्चं सिया उपादिन्नुपादानियं, सिया अनुपादिन्नुपादानियं.

समुदयसच्चं संकिलिट्ठसंकिलेसिकं. द्वे सच्चा असंकिलिट्ठअसंकिलेसिका. दुक्खसच्चं सिया संकिलिट्ठसंकिलेसिकं, सिया असंकिलिट्ठसंकिलेसिकं. समुदयसच्चं सवितक्कसविचारं. निरोधसच्चं अवितक्कअविचारं. मग्गसच्चं सिया सवितक्कसविचारं, सिया अवितक्कविचारमत्तं, सिया अवितक्कअविचारं. दुक्खसच्चं सिया सवितक्कसविचारं, सिया अवितक्कविचारमत्तं, सिया अवितक्कअविचारं, सिया न वत्तब्बं – ‘‘सवितक्कसविचार’’न्तिपि, ‘‘अवितक्कविचारमत्त’’न्तिपि, ‘‘अवितक्कअविचार’’न्तिपि. द्वे सच्चा सिया पीतिसहगता, सिया सुखसहगता, सिया उपेक्खासहगता. निरोधसच्चं न वत्तब्बं – ‘‘पीतिसहगत’’न्तिपि, ‘‘सुखसहगत’’न्तिपि, ‘‘उपेक्खासहगत’’न्तिपि. दुक्खसच्चं सिया पीतिसहगतं, सिया सुखसहगतं, सिया उपेक्खासहगतं, सिया न वत्तब्बं – ‘‘पीतिसहगत’’न्तिपि, ‘‘सुखसहगत’’न्तिपि, ‘‘उपेक्खासहगत’’न्तिपि.

द्वे सच्चा नेव दस्सनेन न भावनाय पहातब्बा. समुदयसच्चं सिया दस्सनेन पहातब्बं, सिया भावनाय पहातब्बं. दुक्खसच्चं सिया दस्सनेन पहातब्बं, सिया भावनाय पहातब्बं, सिया नेव दस्सनेन न भावनाय पहातब्बं. द्वे सच्चा नेव दस्सनेन न भावनाय पहातब्बहेतुका. समुदयसच्चं सिया दस्सनेन पहातब्बहेतुकं, सिया भावनाय पहातब्बहेतुकं. दुक्खसच्चं सिया दस्सनेन पहातब्बहेतुकं, सिया भावनाय पहातब्बहेतुकं, सिया नेव दस्सनेन न भावनाय पहातब्बहेतुकं. समुदयसच्चं आचयगामि. मग्गसच्चं अपचयगामि. निरोधसच्चं नेवाचयगामिनापचयगामि. दुक्खसच्चं सिया आचयगामि, सिया नेवाचयगामिनापचयगामि. मग्गसच्चं सेक्खं. तीणि सच्चानि नेवसेक्खनासेक्खा. समुदयसच्चं परित्तं. द्वे सच्चा अप्पमाणा. दुक्खसच्चं सिया परित्तं, सिया महग्गतं. निरोधसच्चं अनारम्मणं. मग्गसच्चं अप्पमाणारम्मणं. समुदयसच्चं सिया परित्तारम्मणं, सिया महग्गतारम्मणं न अप्पमाणारम्मणं, सिया न वत्तब्बं – ‘‘परित्तारम्मण’’न्तिपि, ‘‘महग्गतारम्मण’’न्तिपि. दुक्खसच्चं सिया परित्तारम्मणं, सिया महग्गतारम्मणं, सिया अप्पमाणारम्मणं, सिया न वत्तब्बं – ‘‘परित्तारम्मण’’न्तिपि, ‘‘महग्गतारम्मण’’न्तिपि, ‘‘अप्पमाणारम्मण’’न्तिपि.

समुदयसच्चं हीनं. द्वे सच्चा पणीता. दुक्खसच्चं सिया हीनं, सिया मज्झिमं. निरोधसच्चं अनियतं. मग्गसच्चं सम्मत्तनियतं. द्वे सच्चा सिया मिच्छत्तनियता, सिया अनियता. निरोधसच्चं अनारम्मणं. समुदयसच्चं न वत्तब्बं – ‘‘मग्गारम्मण’’न्तिपि, ‘‘मग्गहेतुक’’न्तिपि, ‘‘मग्गाधिपती’’तिपि. मग्गसच्चं न मग्गारम्मणं मग्गहेतुकं, सिया मग्गाधिपति, सिया न वत्तब्बं – ‘‘मग्गाधिपती’’ति. दुक्खसच्चं सिया मग्गारम्मणं न मग्गहेतुकं, सिया मग्गाधिपति, सिया न वत्तब्बं – ‘‘मग्गारम्मण’’न्तिपि, ‘‘मग्गाधिपती’’तिपि. द्वे सच्चा सिया उप्पन्ना, सिया अनुप्पन्ना, न वत्तब्बा – ‘‘उप्पादिनो’’ति. निरोधसच्चं न वत्तब्बं – ‘‘उप्पन्न’’न्तिपि, ‘‘अनुप्पन्न’’न्तिपि, ‘‘उप्पादी’’तिपि. दुक्खसच्चं सिया उप्पन्नं, सिया अनुप्पन्नं, सिया उप्पादि. तीणि सच्चानि सिया अतीता, सिया अनागता, सिया पच्चुप्पन्ना. निरोधसच्चं न वत्तब्बं – ‘‘अतीत’’न्तिपि, ‘‘अनागत’’न्तिपि, ‘‘पच्चुप्पन्न’’न्तिपि. निरोधसच्चं अनारम्मणं. मग्गसच्चं न वत्तब्बं – ‘‘अतीतारम्मण’’न्तिपि, ‘‘अनागतारम्मण’’न्तिपि, ‘‘पच्चुप्पन्नारम्मण’’न्तिपि. द्वे सच्चा सिया अतीतारम्मणा, सिया अनागतारम्मणा, सिया पच्चुप्पन्नारम्मणा, सिया न वत्तब्बा – ‘‘अतीतारम्मणा’’तिपि, ‘‘अनागतारम्मणा’’तिपि, ‘‘पच्चुप्पन्नारम्मणा’’तिपि. निरोधसच्चं बहिद्धा. तीणि सच्चानि सिया अज्झत्ता, सिया बहिद्धा, सिया अज्झत्तबहिद्धा. निरोधसच्चं अनारम्मणं. मग्गसच्चं बहिद्धारम्मणं. समुदयसच्चं सिया अज्झत्तारम्मणं, सिया बहिद्धारम्मणं, सिया अज्झत्तबहिद्धारम्मणं. दुक्खसच्चं सिया अज्झत्तारम्मणं, सिया बहिद्धारम्मणं, सिया अज्झत्तबहिद्धारम्मणं, सिया न वत्तब्बं – ‘‘अज्झत्तारम्मण’’न्तिपि, ‘‘बहिद्धारम्मण’’न्तिपि, ‘‘अज्झत्तबहिद्धारम्मण’’न्तिपि. तीणि सच्चानि अनिदस्सनअप्पटिघा. दुक्खसच्चं सिया सनिदस्सनसप्पटिघं, सिया अनिदस्सनसप्पटिघं, सिया अनिदस्सनअप्पटिघं.