३. पञ्हापुच्छकं

७४७. चतस्सो पटिसम्भिदा – अत्थपटिसम्भिदा, धम्मपटिसम्भिदा, निरुत्तिपटिसम्भिदा, पटिभानपटिसम्भिदा.

७४८. चतुन्नं पटिसम्भिदानं कति कुसला, कति अकुसला, कति अब्याकता…पे… कति सरणा, कति अरणा?

१. तिकं

७४९. सिया कुसला, सिया अब्याकता. सिया सुखाय वेदनाय सम्पयुत्ता, सिया अदुक्खमसुखाय वेदनाय सम्पयुत्ता. तिस्सो पटिसम्भिदा सिया विपाकधम्मधम्मा, सिया नेवविपाकनविपाकधम्मधम्मा; अत्थपटिसम्भिदा सिया विपाका, सिया विपाकधम्मधम्मा, सिया नेवविपाकनविपाकधम्मधम्मा. तिस्सो पटिसम्भिदा अनुपादिन्नुपादानिया; अत्थपटिसम्भिदा सिया अनुपादिन्नुपादानिया, सिया अनुपादिन्नअनुपादानिया. तिस्सो पटिसम्भिदा असंकिलिट्ठअसंकिलेसिका; अत्थपटिसम्भिदा सिया असंकिलिट्ठसंकिलेसिका, सिया असंकिलिट्ठअसंकिलेसिका.

तिस्सो पटिसम्भिदा सवितक्कसविचारा; अत्थपटिसम्भिदा सिया सवितक्कसविचारा, सिया अवितक्कविचारमत्ता, सिया अवितक्कअविचारा. सिया पीतिसहगता, सिया सुखसहगता, सिया उपेक्खासहगता. नेव दस्सनेन न भावनाय पहातब्बा. नेव दस्सनेन न भावनाय पहातब्बहेतुका.

तिस्सो पटिसम्भिदा सिया आचयगामिनो, सिया नेवाचयगामिनापचयगामिनो; अत्थपटिसम्भिदा सिया आचयगामिनी, सिया अपचयगामिनी, सिया नेवाचयगामिनापचयगामिनी.

तिस्सो पटिसम्भिदा नेवसेक्खनासेक्खा, अत्थपटिसम्भिदा सिया सेक्खा, सिया असेक्खा, सिया नेवसेक्खनासेक्खा. तिस्सो पटिसम्भिदा परित्ता; अत्थपटिसम्भिदा सिया परित्ता, सिया अप्पमाणा. निरुत्तिपटिसम्भिदा परित्तारम्मणा; तिस्सो पटिसम्भिदा सिया परित्तारम्मणा, सिया महग्गतारम्मणा, सिया अप्पमाणारम्मणा.

तिस्सो पटिसम्भिदा मज्झिमा; अत्थपटिसम्भिदा सिया मज्झिमा, सिया पणीता. तिस्सो पटिसम्भिदा अनियता; अत्थपटिसम्भिदा सिया सम्मत्तनियता, सिया अनियता. निरुत्तिपटिसम्भिदा न वत्तब्बा – मग्गारम्मणातिपि, मग्गहेतुकातिपि, मग्गाधिपतिनीतिपि; अत्थपटिसम्भिदा न मग्गारम्मणा, सिया मग्गहेतुका, सिया मग्गाधिपतिनी, सिया न वत्तब्बा मग्गहेतुकातिपि, मग्गाधिपतिनीतिपि; द्वे पटिसम्भिदा सिया मग्गारम्मणा, न मग्गहेतुका, सिया मग्गाधिपतिनो, सिया न वत्तब्बा मग्गारम्मणातिपि, मग्गाधिपतिनोतिपि.

तिस्सो पटिसम्भिदा सिया उप्पन्ना, सिया अनुप्पन्ना, न वत्तब्बा उप्पादिनोति; अत्थपटिसम्भिदा सिया उप्पन्ना, सिया अनुप्पन्ना, सिया उप्पादिनी. सिया अतीता, सिया अनागता, सिया पच्चुप्पन्ना. निरुत्तिपटिसम्भिदा पच्चुप्पन्नारम्मणा; द्वे पटिसम्भिदा सिया अतीतारम्मणा, सिया अनागतारम्मणा, सिया पच्चुप्पन्नारम्मणा; अत्थपटिसम्भिदा सिया अतीतारम्मणा, सिया अनागतारम्मणा, सिया पच्चुप्पन्नारम्मणा, सिया न वत्तब्बा अतीतारम्मणातिपि, अनागतारम्मणातिपि, पच्चुप्पन्नारम्मणातिपि. सिया अज्झत्ता, सिया बहिद्धा, सिया अज्झत्तबहिद्धा. निरुत्तिपटिसम्भिदा बहिद्धारम्मणा; तिस्सो पटिसम्भिदा सिया अज्झत्तारम्मणा, सिया बहिद्धारम्मणा, सिया अज्झत्तबहिद्धारम्मणा. अनिदस्सनअपटिघा.

२. दुकं

७५०. हेतू, सहेतुका, हेतुसम्पयुत्ता, हेतू चेव सहेतुका च, हेतू चेव हेतुसम्पयुत्ता च, न वत्तब्बा न हेतू सहेतुकातिपि, नहेतूअहेतुकातिपि.

सप्पच्चया, सङ्खता, अनिदस्सना, अप्पटिघा, अरूपा, तिस्सो पटिसम्भिदा लोकिया, अत्थपटिसम्भिदा सिया लोकिया, सिया लोकुत्तरा, केनचि विञ्ञेय्या, केनचि न विञ्ञेय्या.

नो आसवा. तिस्सो पटिसम्भिदा सासवा; अत्थपटिसम्भिदा सिया सासवा, सिया अनासवा. आसवविप्पयुत्ता. तिस्सो पटिसम्भिदा न वत्तब्बा आसवा चेव सासवा चाति, सासवा चेव नो च आसवा; अत्थपटिसम्भिदा न वत्तब्बा आसवो [आसवा (सी.) धातुविभङ्गे पन पाठनानत्तं नत्थि] चेव सासवा चाति, सिया सासवा चेव नो च आसवो [आसवा (सी.) धातुविभङ्गे पन पाठनानत्तं नत्थि], सिया न वत्तब्बा सासवा चेव नो च आसवाति. न वत्तब्बा आसवा चेव आसवसम्पयुत्ता चातिपि, आसवसम्पयुत्ता चेव नो च आसवातिपि. तिस्सो पटिसम्भिदा आसवविप्पयुत्ता सासवा; अत्थपटिसम्भिदा सिया आसवविप्पयुत्ता सासवा, सिया आसवविप्पयुत्ता अनासवा.

नो संयोजना…पे… नो गन्था…पे… नो ओघा…पे… नो योगा…पे… नो नीवरणा…पे… नो परामासा…पे… सारम्मणा. नो चित्ता, चेतसिका, चित्तसम्पयुत्ता, चित्तसंसट्ठा, चित्तसमुट्ठाना, चित्तसहभुनो, चित्तानुपरिवत्तिनो. चित्तसंसट्ठसमुट्ठाना, चित्तसंसट्ठसमुट्ठानसहभुनो, चित्तसंसट्ठसमुट्ठानानुपरिवत्तिनो, बाहिरा, नो उपादा, अनुपादिन्ना.

नो उपादाना…पे… नो किलेसा…पे… न दस्सनेन पहातब्बा. न भावनाय पहातब्बा. न दस्सनेन पहातब्बहेतुका. न भावनाय पहातब्बहेतुका. तिस्सो पटिसम्भिदा सवितक्का; अत्थपटिसम्भिदा सिया सवितक्का, सिया अवितक्का. तिस्सो पटिसम्भिदा सविचारा; अत्थपटिसम्भिदा सिया सविचारा, सिया अविचारा. सिया सप्पीतिका, सिया अप्पीतिका. सिया पीतिसहगता, सिया न पीतिसहगता. सिया सुखसहगता, सिया न सुखसहगता. सिया उपेक्खासहगता, सिया न उपेक्खासहगता. तिस्सो पटिसम्भिदा कामावचरा; अत्थपटिसम्भिदा सिया कामावचरा, सिया न कामावचरा. न रूपावचरा. न अरूपावचरा. तिस्सो पटिसम्भिदा परियापन्ना; अत्थपटिसम्भिदा सिया परियापन्ना, सिया अपरियापन्ना. तिस्सो पटिसम्भिदा अनिय्यानिका; अत्थपटिसम्भिदा सिया निय्यानिका, सिया अनिय्यानिका. तिस्सो पटिसम्भिदा अनियता; अत्थपटिसम्भिदा सिया नियता, सिया अनियता. तिस्सो पटिसम्भिदा सउत्तरा; अत्थपटिसम्भिदा सिया सउत्तरा, सिया अनुत्तरा. अरणाति.

पञ्हापुच्छकं.

पटिसम्भिदाविभङ्गो निट्ठितो.