६. परियत्तिवारो

७२४. चतस्सो पटिसम्भिदा – अत्थपटिसम्भिदा, धम्मपटिसम्भिदा, निरुत्तिपटिसम्भिदा, पटिभानपटिसम्भिदा.

तत्थ कतमा धम्मपटिसम्भिदा? इध भिक्खु धम्मं जानाति – सुत्तं गेय्यं वेय्याकरणं गाथं उदानं इतिवुत्तकं जातकं अब्भुतधम्मं वेदल्लं. अयं वुच्चति ‘‘धम्मपटिसम्भिदा’’. सो तस्स तस्सेव भासितस्स अत्थं जानाति – ‘‘अयं इमस्स भासितस्स अत्थो, अयं इमस्स भासितस्स अत्थो’’ति. अयं वुच्चति ‘‘अत्थपटिसम्भिदा’’. तत्र धम्मनिरुत्ताभिलापे ञाणं निरुत्तिपटिसम्भिदा. ञाणेसु ञाणं पटिभानपटिसम्भिदा. अयं परियत्तिवारो.

सुत्तन्तभाजनीयं.